Hawaii Holomua, Volume I, Number 1, 23 September 1893 — "ALOHA AINA." [ARTICLE]

"ALOHA AINA."

"Aloha aina" ko'u inoa ia, He opio au he kamaiki E kipa aku ana ia oukou Na ewe aloha o ka aina. Ua ao ia au i ka Pi-a-pa A loaa ia'u keia moto, E aloha au i ko'u Lahui E aloha i kuu Aliiaimoku. A e aloha au i kuu aina, Kahi o’u e haaheo ai, Me kona mau kahakai olino A me na puu uli o ma-o. Ekolu mau mea i huiia O keia moto kamahao, Alii Lahui a me ka aina I apo ia a paa e ke aloha. O kela ha'i Euanelio Pookela A ka uhane Hemolele i hookamaai, Ekolu no ana mea mau kamahao I ulana ai ma luna o ka Ilihipa. Ka manaoio manaolana me ke aloha O ke aloha ka mea oi i na mea apau Pela wau e manao aku nei E apo ohaoha mai oukou ia'u. O kela koa kaulana o Talafalaga Kai rula ae i na ale moana; Me ke ahi a me ka pauda, Aka, owau ia, aole loaa pela. Me ka maka peni au e rula ai. E kakoo ai i ka pono o kuu Lahui, E paio ai no kuu aina, A kau hou o Liliu i ke Kaiaunu. O ko'u kuleana ka Lahui Hawaii. Aolel au me ka poe Hoohui Aina, Alana ia au i Elele ahailono. E ka poe kupaa i ke aloha aina. Poni ia au e hoike i ka oiaio, I na hana poholalo a ka enemi, Ka poe lokoino pakaha aina, Ke "aloha ka oi aole ka mohai." Ke pule nei au e ola ka Lahui, E ola pu me ke Aliiaimoku. A mau ke aloha i ke one oiwi, O "aloha aina" ko'u inoa, Chorus:— "Aloha aina" ko'u inoa. "Aloha aina" owau ia. Aloha mau aloha pilipaa, Ke one oiwi o na Hawaii.