Home Rula Repubalika, Volume I, Number 3, 9 November 1901 — Page 6

6  HOME RULA REPUBALIKA, POAONO, NOVEMABA 9, 1901.

 

Ka Nupepa
Home Rula Repubalika
ELUA PUKA ANA O KA PULE
POAKOLU a me POAONO
KEENA, POKA HALE, ALANUI NUUANU

 

No ka Makahiki.... $4.00
No Eono Mahina.... $2.25
No Ekolu Mahina.... $1.20
No Hookahi Mahina.... .40
Kuike ka Rula

                Aole e hoounaia aku kekahi Nupepa ma ka owili pakahi ke ole e hookaa mua ia mai kona ola.
                Aole e hoopukaia a hoolahaia kekahi manao ma na kolamu o keia Pepa malalo o kekahi inoa kapakapa, ke ole e hoike mai i kona inoa pololei i ka Lunahooponopono.
                O na Kauoha Nupepa ana a pau, e kauoha pololei mai i ka Lunahooponopono.
                E hoouna pololei mai i na Nuhou—na Kumumanao—Na Olelo Hoolaha a me na Kanikau i ka Lunahooponopono o keia Pepa.
                E paiia no na Olelo Hoolaha—na Mele Inoa me ke Kanikau—ma ke Dala Kuike.
                E hookaa polei ia mai no ka Auhau o ka Nupepa e like me ia i hoakakaia maluna ae.

MRS. ROBERT W. WILCOX, Ona me Puuku
SOLOMON MEHEULA, Lunahooponopono

HONOLULU, POAONO, NOVEMABA 9, 1901

                Hauoli loa o "Kuokoa" Unihipili i ka makemake o na Repubalika e olepe ae ia Kuelo (he keiki Hawaii) mai kona noho lala ana no ke Komite Kuwaena o ka Aoao Repubalika a e hookomo aku ia J. C. Lane (he keiki Hawaii) ma ia wahi. Oia hoi, aole i makemakeia e hoomahuahua aku i na Hawaii maloko o ia Komite, aia no a i poe ilikea ke hoomahuahua mau. No ka nui loa o ka hauoli o kahi "unihi pili," ua loheia aku kona mau mapuna leo kupinai ma na kakai pali o Waolani penei: Akaka wale no Haleakala, ka uwe a ke kini o Koolau.

                He hauoli loa na Home Rula i ka ike aku i na Hawaii opio e hoi mai ana i ko lakou po-ai oiwi. Ua like ka Aoao Home Rula me kela makuakane o ke keiki uhauha, ka makaukau mau e apo aku i kana mau keiki. He menemene makou i ka ike aku i ko makou mau hoa oiwi e olepelepe wale ia ana e ka poe a lakou i manao ai he poe hoaloha. He mea hauoli iho la nae ia na kekahi o ko lakou hoa oiwi i hoolimalimaia e lumalumai i na keiki Hawaii iloko o ke kiowai lepo o ka Aoao Repubalika Hookamani.

                Mawaena o na pila kanawai a pau i noonooia imua o ka Ahaolelo, aole paha he pila kanawai oi ae ka nui o na poe i kakauinoa i ka palapala noi e hooholoia ia pila mamua ae o ka pila kanawai Kaahapaumi. Ke kuhi mai nei nae na lima o ke Kuokoa i ka hoopau manawa o na Lunamakaainana maluna o ia pila. Ina i hakilo pono ka mea kakau o ka nupepa Kuokoa i ke ano o na hana i lawelaweia mahuna o ia pila, aole paha oia e walaau ae no ia pila. Ua make loa no ia pila i kona wa i pii mai ia no ka heluhelu elua. He hoike keia no ke olalau maoli o ka mea kakau o ke Kuokoa no ka ike ole i ka palapala hemolele.

                Me he mea la aole paha i ike kekahi o ko makou mau makamaka namu he oi loa aku ka nuha a me ka hoololohe o ke kekake ma ka lihi auwai ina e pekupeku mau ia kona mau aoao, no ka mea, ina paha ia i ike mua aole paha ia e pekupeku mau i kela Komite Kuwaena o ka Repubalika. E hele malie, e ka makamaka. E hiki mai ana no ka la o na Hawaii opio i hookaeia e ike ai aia lakou iwaena o na poe hookaeia a hoi mai no i ko lakou poe ponoi.
                Me ka ike iho no o ka Papa Loio Hawaii ua kiolaia mai nei ka lakou mau hoopii mahaoi e ka Loio Kuhina Knox, me ko lakou nuku pu ia mai no ka hookiekie imua o ka Lunakanawai Humepere, hoopaakiki no nae lakou nei ua pono no lakou. Aole makou e puiwa ke lohe aku e hoopii ia ana ka Loio Kuhina Knox.

                Ke aa nei makou e paio me na unihipili a pau o ka aoao hookamani maluna o na kumuhana hoakaka maoli ia, a aole hoi maluna o kela a me keia hapala wale ae no. Ina ua ike lakou i ka pauku iwi iloko o na hana a ka Ahaolelo kii pololei aku a malaila mahiki ae a hoikeike mai imua o ka Lahui.

Mai Hoohewahewa.

                Mai puni wale a kuhihewa hoi i na olelo haanui wale a ka poe opu keemoa wale, oiai, he mau manao hoino wale no ko lakou, he poe lakou i uku ia e na enemi e hoomahae i ka lokahi o ka lahui i hiki ai i na enemi ke komo i na wahi e hiki ai e luku mai ia oe e ka ka Lahui.
                Aole no makou o ka Repubalika a ka poe nana i hoao e kaihi i ko kakou mau pono ma ka hoao ana e hoohaiki i ka pono koho balota o ka Lahui ma ka Ahaolelo Lahui o Amerika Huipuia. Aka, o ka Lahui no makou, o ka Home Rula no, a o na koo no o ka Lahui. He mea oiaio no paha o ka inoa Home Rula Repubalika, na o mai la ia noi; a oia ka Repubalika o Amerika Huipuia, ka Repubalika a ka Peresidena Roosevelt, ko kakou Peresidena, a o kona makemake no ia.
                Nolaila, ke ike aela no oukou, aole o ka Repubalika poalo maka a Kakina ma aole no hoi o ka Repubalika o Honolulu nei i noho poo ia e na moo ino o Hawaii nei. Ke ike mai la no oukou o ka Lahui no makou ou e Hawaii.

E NA HOME RULA

                Na makaainana aloha aina oiaio aloha alii eia ko kakou Moiwahine ke holo nei no Aferika Huipuia ma keia Poaono he mea pono e hele ae e ike iaia, na kane, na wahine me na keiki a kakou; e hoopiha ae i ka uwapo mai nana maka kakou nona.

                Ma ka mokuahi Kina e holo aku ana i ka laapopo e haalele mai ai ka Moiwahine Liliuokalani i na aekai o Hawaii nei no ka aina makua. E hoohala ana oia i kekahi mau la ma Kapalakiko, alaila, hele makaikai aku a hiki loa i Nu Ioka a mailaula mai a Wasinetona. E naue nui ae e iki iaia mamua o kona holo ana aku.

J. M. Maunakea

Loio, Luna Hooiaio
Keena Helu 20 me 21
Hale o ka Ona Miliona
Huina o Alanui Papu
a me Kalepa
Honolulu T. H.

HUI MOKUAHI O WAILA
HOOLAHA
HOOLOLI UKU O NA OHUA.

Mai ka la 1 aku o Dekemaba, 1901, e auhauia ana na ohua penei:
Ohua Oneki mai Honolulu a Hawaii, $3.00.
Ohua Kapena, mawaena o Honolulu, Hona, Hamoa a me Kipahulu, ma ka Mokupuni o Maui, $7.00.
Ma ia la e hoopau loa ia ai na auhau kuikawa, koe ko na kahunapule.
C. L. WIGHT.
Peresidena.

B. F. EHLERS & CO.
(PAINAPA MA.)

Kuai Nui o na Waiwai
Koena!
O na ano waiwai liko ole a pau iloko o ka Halekuai.
E hoomaka ana ma ka Poalima,
Novemaba La 1.
E hoemi loa ia ana ke Kumukuai o na
Koena Pokopoko
Me ka Nana Ole i ke Kumu Lilo.
Ka Hoemi Kamahao
O na Lihilihi
a me na Kua.
E hoomaka ana keia Hoemi Nui ma ka Poalima, Novemaba 1. He hoemi i ike ole ia ma Honolulu nei.
B. F. EHLERS & CO.
Alanui Papu.

Ka
HUI LAKO HALE
O POKA MA....

KA LAKO HALE NANI HOU LOA
NA MOE KU I KINOHINOHIIA
NA PAHU BUKE, NA PAKAUKAU KAKAU
NA PAKAUKAU KAKAUOLELO
HE HELUNA NUI O NA NOHO I-E.
Na Noho Paipai Oka a me na Lako Lumi Hookipa.
HE NUI NA ANO LAKO KEENA MOE,
na Moena Veleveta, na Paku, na Pela, Koki, Uluna. Pela aku, a pela aku.
HE HAUOLI loa makou i ka hoikeike aku i na poe a pau e kipa mai ana i o makou nei, no ka mea, he makemake makou e kuai aku. He emi loa ka makou mau kumukuai, a e hoao hou no makou e hooko aku i ko oukou makemake.

L. J. SUN
MEA KUMU LOLE

ALANUI NUUANU
Kokoke i ke Alanui Pauahi.
Na Lole nu paikini o na Lede, na paleili o na wahine, na Paku Makika, Pale Uluna, Paleili, a me na Muumuu. E loaa mau no i na wa a pau.
Aole kaki wale ke ku ole I ka makemake.