Home Rula Repubalika, Volume I, Number 15, 25 February 1902 — Page 4
Home Rula Repubalika
KA WAHAOLELO O KA LEHULEHU
BUKE I HELU 15 HONOLULU, T. H., POALUA, FEBERUARI 25, 1902 KOPE HOOKAHI 10 KENETA
KA MOOLELO
O
NAPOLIONA KA NUI
KA PUNIPAKE MAU LAWELAWE
KAUA ANA MA ITALIA, 1796-7.
I ka wanaao o kekahi la ae, ua hoi ae la o Napoliona a ma ke poo o na puali koa. Ua hookomo ae la oia i ka po mamua iho he elua mau pu-kuniahi, a ua hoomaka hou ka hakaka ana me ka hahana. Ua hoomauia keia hakaka ana no kekahi manawa me ke akaka ole o ka aoao nana e ahai ana o ka lanakila. I keia manawa, ua haalele hou iho la o Napoliona i keia puali malalo o ka Ramepona alakai ana, a holo aku la oia e hui me Beretia a me Masena, na kenerala na laua e hoomalu ana na puali waena a me ko ke kihi hema, a mamua o ka mahui ana o ka enemi, ua kaa mai la lakou mahope, a oia ko lakou manawa i ike ai i ko lakou kupilikii, oiai na koa Farani e luku mai ana ia lakou mamua, mahope, a ma ka aoao hema, a iloko o ka manawa pokole loa ua auhee aku la na koa Aukekulia, a ua haalele iho la o Kenerala Akeneku i kona hae a me na pu-kuniahi, me hookahi tausani koa make a elua tausani i lawe pio ia.
Pela iho la i ulupaia ai ka mahele waena, a o ka oi no hoi o na pualikoa o Aukekulia, me ka ike ole o ko lakou alihikaua nui e hoomalu ana i na koa ma ke kihi hema, a me Kenerala Koli hoi ma ke kihi akau, eia ke hoomaka nei ke kaua. I kekahi mau makahiki mai mahope, i ko Napoliona wa i lilo ai i Emepera no Farani, ua pane ae la o Napoliona i ka Emepera o Aukekulia: "No ko'u mau kupuna? Ea, owau iho no ko'u kupuna; ua hoomaka mai ko'u kulana alii mai kela kaua mai o Monetenote!"
Ma o ka loaa ana o keia lanakila ia Napoliona i hiki ai i kekahi mahele o na koa Farani, malalo o ke alakai ana a La Hape, ke komo aku ma Kairo a hoomoana iho ma ia aoao o na Mauna Alepa ma kahi e kokoke ana ia Lomebadi.
Ua kuemi hope aku la o Bo-lu a hiki i Dego, kahi e hiki ai iaia ke panai elele aku me Koli, oiai hoi o Koli i nee hope aku ai a hiki i Milesimo, he wahi taona uuku keia nona ke kowa he eiwa mile mai Dego aku. Ma keia wahi i manaolana ai na Kenerala o na puali hui e hiki ana ia laua ke hoohui i ko laua mau puali. Ma keia mau wahi laua i hookahua iho ai a hoouna aku la i na elele i Mailana e hoouna hou mai i poe koa; a mamua o ka hiki ana mai o na koa hou a laua i kauoha aku ai, aole loa laua i manao he hana naauao na laua ka hoao hou ana e lele kaua aku maluna o na koa Farani. Aole no hoi o laua manao e nee hou aku mai keia mau kahua aku a hiki i ka loaa ana o kekahi mau kokua mai Lomebadi mai; aka, aole loa pela ko Napoliona manao—he like ole loa kana mau hooneenee ana me ka na kenerala e ae.
(Aole i pau.)
O AIWOHI KANAKA O KA LIPO.
O Aiwohi kanaka o ka lipo,
Ko ka wai nau kula lehua ka manu—e,
Ai—la.
Ai 'ho la ke 'kua i ka pua,
Hoomaunauna i ke ola haalele,
I ka nui nahele,
I ka mehameha o ka laau,
O Palai o Paliuli,
Uli kaunoa pehu i ka la,
Pa iho la makou i ka wela,
Holopu i ka ua a ka awaawa,
Le—le.
He mea lele wale no ka makemake.
—Na Kilinahe.
E LALAU ANA NO HIHIMANU.
E lalau ana no Hihimanu,
E kalele iho ana mamalahoa,
E wawa mai ana ka ua o Hanalei,
E hanunanuna mai ana no,
E nonoho mai ana ke one i Nohili,
Pehea wau a pehea wau,
O oe na,
O wau nei—e,
Poha ka wai—e,
O Kumiki—e,
E pe e pe—e,
O ka hale a ka makani,
Oo mai ana na ha—ha,
Kukuna o ka ua,
Paapu paapi,
Ka Puka i Kane,
Ha kaneue,
Kane puu,
O ka ilio e—mau—e.
A pela no o Puukoaniani elike me keia, Kaawale Puna, kaawale Kona la—
Hoi au—e.
Ke hoi nei no ko Kona keiki la,
Aloha Kona—e,
Oia Kona—e.
Oia maka Kona, Waiolono la,
Lawe au—e,
Lawe au—e,
Lawe au—e,
Lawe au—e.
Lalawe, lawe, lawe au li—lo,
Lililo, lilo ia'u—e,
Me he manu e au mai ana 'a,
Keolewa e au mai la me he manu la,
A ka mole o hehei ku makani la,
Kapu ka niu o ka nana,
Ha ka nana,
Ha ka nana,
Ha ka nana.
Ha ka nanaueue la—
Ha lawe—au—e,
Ha lawe au,
Lawe au,
Lawe au
Lalawe, lawe, lawe au li—lo,
Lililo, lilo ia'u—e,
Ka maha, ka lole, lole,
Lau ka lole, lole,
Hinau, hinawe ka lole, lole,
Nau ka lole, lole,
O ka pua i ka wai—la,
Lawe au—e,
Lawe au—
Lawe au—
Lawe au.
Lalawe, lawe au li—lo,
Lililo, lilo ia'u—e.
—Na Niau.
He Hoemi
Makepono Loa
NO KA
Makahiki 1902
MA NA
Lole Hulu Lahilahi
Nani i Hanaia ma Falani.
Ma ko makou manao, aole mea i oi ae ka ui, ka paa, ame ke kupono i keia aina, no ka noho hale, a i ole, no na lole ike anaina paha, mamua o keia mau lole lahilahi, aka nae, me ka paa loa.
Ke kahea aku nei makou ia oukou e hele mai e ike pu i na LOLE KAHAKAHANA PERESIA, na mea ano hou loa a na poe Palani e hono mai nei i keia mau la, e ike nui ia aku ana hoi ma Nu Ioka i keia mau la wela e hiki mai ana.
He elua wale no kumukuai: Na mea kahakaha ole 50 keneta no ka I-a. Na kahakaha Silika 90 keneta no ka I-a.
WHITNEY & MARSH
(LIMITED)
Alanui Papu