Ke Alaula, Volume I, Number 4, 1 July 1866 — Page 13

KE ALAULA.
BUKE 1. HONOLULU, IULAI, 1866. HELU 4.

KE KEIKI I KANALUA OLE I KA HANA.

                Ua ike pinepineia na ao polohiwa e hoopouli ana i ke ala a ka mea opiopio, a mahope i ka wa i oo ai ke kanaka, pau ka haule ana o ka ua naulu o na pilikia, o ka ilihune a me ka nele, a puka mai ka la laelae o ka noho pomaikai ana a me ka mahaloia.
                Elua haneri a me kanahiku makahiki i hala iho nei e noho ana ma kekahi kulanakauhale liilii ma Enelani, kekahi keiki ilihune, o Ioane Pilekeu (John Prideaux) kona inoa. He poe ilihune noho pono kona mau makua, a he mahiai ka hana. He umi-kumamalua a laua mau keiki--he ehiku mau keiki kane a he elima mau kaikamahine. Kokua pu na keiki i na makua ma na hana a pau o ka mahiai ana.
                He keiki haipule o Ioane, a kokua oia i ka luna o ka papa mele ma ka hoolea ana i ke Akua ma ka hoomana ana ma ka luakini.
                I ka loaa ana iaia i na makahiki he umikumamahiku, haalele oia i ka hale o kona mau makua, a hele imi i ola nona. Lawe oia he wahi puolo kapa ma kona lima, a ma kona eke he mau wahi apana kala a kona makuahine i haawi mai ai iaia. Hele pu kona makuahine me ia ma ke alanui mai ko lakou hale aku, a malaila uwe pu a helelei kona waimaka. Me ka pule i ke Akua i haalele ai laua kekahi i kekahi.
                Hele wawae aku keia keiki me kona mehameha a komo aku i ke kulanakauhale o Ekekela (Exeter.) Nana aku oia i ka luakini nani, a ike hoi i na hale kuai buke. Iini iho la kona naau i ka ike palapala, a haliu koke ae oia i ke kula nui ma Okapoka (Oxford.) He elua haneri mile ke kaawale o ia kulanakauhale mai kona wahi aku. Hele wawae aku no ia a pau ia ala loa. I ka po komo aku ia i kekahi manawa i na hale hanai holoholona, a i kekahi manawa moe oia iloko o na puu mauu ma kapa alanui. O ka berena a me ka wai kana ai ma ia alanui, me ka loaa ana i kekahi manawa he waiu i kokua aloha ia mai. A hiki aku oia i Okopoka, hele aku ia i ke kula nui o Ekekela (Exeter) ma ia kulanakauhale. I kona hiki ana ilaila aole i ae ia e komo i haumana no ke kula, a ua hoolimalima ke kuke iaia i hope nona, e kokua iaia ma ka lawe ana mai i ka wahie a me ka nanahu, a me ka anai ana i na ipuhao; a me na ipu piula, a me na hana o ia ano. Olioli loa o Ioane i ka loaa ana iaia keia hana.
                Ma ke kii maluna ae ke ike nei kakou iaia e hana ana, a oiai e anai ana ia i ka ipuhao, e waiho ana imua ona he buke, a e heluhelu ana ia—e hoopaanaau ana paha. Hoowahawaha ole oia i na hana lima, a me ia hana i awili pu ai oia i ka imi naauao ana mai loko o na palapala.
                Ike mai na kumuao a me na luna o ke kula nui i kona ano hooikaika i ka imi naauao, a hookomo mai lakou iaia i ke kula nui, me ke kokua mai no hoi i kona mau lilo a pau. Hoikaika loa ia i ka huli i na palapala, a aole emo ua lilo oia ka mua loa ma kona papa kula.
                I kona oo ana ae lilo ia i kahunapule kaulana loa, e hai ana i ka Euanelio o Kristo. Kakau oia he mau buke e wehewehe ana i ke ano o ka Baibala, a eia no me kakou i keia wa na buke a keia keiki haahaa i kakau ai i kona wa kanaka naauao. Ua noho oia a loaa i na makahiki he kanahiku kumamalua.
                Olioli loa na makua ona i keia keiki naauao a laua. Ka moolelo keia a ke kahunapule kaulana o Ioane Pilekeu (John Prideaux,) ke keiki hoowahawaha ole i na hana haahaa a i hooikaika pu no i ka huli naauao.

KULA SABATI O WAIALUA.

                I ka la 20 o Iune he hoike Kula Sabati ma Waialua, kela aina i kupolua la i ka lai. Nani no na hana o ia la. He nui no na malihini i hiki mai e ike i na kaikamahine a lakou ma ke Kula Nui, a noho mai no lakou e ike pu i na hana o ke Kula Sabati.
                He elua haneri me kanalima na haumana o keia kula, a i ua la hoike la, ua hiki mai he elima haneri a keu paha na kanaka. He kanalima ka nui o ka papa haumana liilii i kapaia o na pokii. Kulaia lakou ma ka moolelo o Samuela. Pela hoi ua hoike pakahi ia na papa eiwa o keia Kula Sabati, mai na pokii, na kamalii, na kanaka ui; na wahine opiopio, a hiki loa iluna i ka papa o ka poe elemakule.
                Hoike mai na malihini haole a me na malihini Hawaii i ko lakou mahalo a me ka olioli i ka holo ana o keia kula.
                Mamua o ke komo ana i ka luakini, a ma ka puka ana mai, ua hele huakai ke kula, me ka lakou mau hae e welo ana i ka makani, a me ke kani o ka leo lea o na keiki himeni, e hele lalani ana. A pau ka hoike ana ma ka luakini, ua malamaia he ahaaina i hoomakaukauia e na makua aloha no na keiki a lakou, a no na hoalauna a me na makamaka a pau. No ka lokahi o ka manao o na kumu a me na haumana, na makua a me na keiki, oia ke kumu o ka holo maikai ana o na hana o keia Kula Sabati. A o ka hopena o keia hana, oia ka ike i na mea i aoia mai ma ka Baibala, a me ke ola o ka lahui. "Nui loa iho la ka olioli ma kela kulanakauhale."