Ke Alaula, Volume I, Number 7, 1 October 1866 — Page 28

28 KE ALAULA.

keke iloko o ka ulu laau, a o ka holo koke aku no ia i kahi e loa. O ke ano o kona mau wawae ua like me ko ke kao aka ua nunui loa aku.
                He maikai ka ai ana i ka io o keia dia. O na Ilikini ka poe i ai mau i kona io. O kona ili ua hooluuia e lakou, a loaa ke kamaa palupalu, a me na kapa aahu no lakou. O kona mau kiwi ua hanaia he mau kiaha no lakou. Pomaikai loa lakou i keia holoholona.

NO KA PUAHIOHIO.

                Ua maa na kamalii e olelo aku i ka puahiohio he akua lapu, i ka wa e ike ai lakou i ka puahiohio e wili-koiula ana ka lepo lele i ka lani. Makau maoli no kekahi poe kamalii ke loaa i ka puahiohio i kahi mehameha, a holo aku me ka uwe, a me ka eehia o ka naau, me he mea la e alualu ia mai ana--no ka maa i ka olelo a na makua, a me na kaikuaana, he akua ka puahiohio, he uhane no ka poe i make.
                Pela no i kekahi Poaha i hala ae nei. I ka pau ana o ka halawai kamalii, wili ae ana he wahi puahiohio maloko o ka pa o ka luakini. Hooho ae la kekahi poe kamalii: "He akua la! ke wili mai nei i ka lepo a me ka opala ! Owai la? E hele ana la ihea?" He poe keiki maoli, a he poe keiki hapahaole, e olelo ana pela.
                E na makua naaupo a me na keiki naaupo, mai olelo hou aku oukou i ka puahiohio he akua lapu, no ka mea, aole ia he akua. He mau makani elua i halawai hi-o, a no ka oi aku o ka ikaika o kekahi i ko kekahi, nolaila ua poai laua, a wili i ka lepo a me ka opala, me he mau bipi la e hakaka ana a ku ka ea o ka lepo. M. K.

KE KAIKAMAHINE MANAOIO.

                Ua pilikia loa ka poe mahiai ma kau wahi o Enelani no ka nui o ka la, a no ka ua ole. Hoomaopopo na kanaka o kekahi kulanakauhale i la e pule ai, a e nonoi ai i ke Akua i ua, i ole e wi lakou.
                E akoakoa ana na kanaka ma ka luakini e pule, a hoomakaukau kekahi wahi kaikamahine, o Kini kona inoa, e hele aku i ka halawai. Lalau aku oia i kona loulu a hoomakaukau e hele. Ike ke kahunapule iaia e lawe ana i kona loulu, ninau mai la oia iaia, "He mea aha la ka loulu au e paa nei? Aole no i ikeia ka ua i keia manawa loihi."
                Pane ae ua kaikamahine nei i ke kahunapule me ka i ana aku, "Kai noa e hui ana kakou i keia la e nonoi aku i ke Akua e haawi mai i ua; nolaila e paa aku ana no wau i kuu loulu." A pela no ia i paa hele ai me kona loulu.
                Halawai no na haipule a pule aku no e like me ka mea i hoakaka mua ia, e nonoi ana i ua. I ka puka ana aku o ke anaina pule mai ka luakini aku, i ka pau ana o ka halawai, hiki mai kekahi kua-ua maluna o lakou, a u-u aku keia wahi kaikamahine i kona loulu a hoi aku me ka pulu ole i ka ua. Oiloli iho la ke kahunapule i ka loaa ana ia Kini i ka loulu, a komo pu aku oia me ia malalo o ka loulu a hiki aku i kona wahi.
                Nani ka manaoio o keiki liilii. Ko ka Isaia i olelo ai (Mok. 66:24): "Mamua o ko lakou hea ana, e ae aku no wau, a ia lakou e olelo ana, e hoolohe no au."

KA NONANONA.

                "E ka mea hiamoe, e hele oe i ka anonanona,
                "E hana i kona aoao a e hoomanao iho."
                Ua ike pinepine paha oukou ma na alanui, mahope koke iho o ka ua, i na wahi puu lepo liilii i hoolei ia iluna e na naonao ma ka lakou eli ana iho i na lua a lakou iloko o ka lepo.
                He nui na ano o na naonao a me na nonanona ma Hawaii nei, a ma na aina he nui hou aku no na ano. He liilii loa iho no kekahi a nunui iki ae kekahi. He ulaula kekahi, he ahinahina kekahi, he eleele kekahi, a he keokeo kekahi. He aki mai kekahi a he holo wale aku no kekahi ke paa i ka lima. Aka, ma na ano nui o ka noho ana, ua like no ko lakou mau ano.
                He noho hui lakou ma kahi hookahi, me he aupuni kanaka la, a lokahi lakou i ka hana ana i na hale o lakou a me ka malama keiki ana. Ua like iki no lakou me na nalo-meli ma ke ano o ko lakou noho hui ana, a me ka noho ana o kekahi o lakou i alii wahine no ka ohana lehulehu; a na ua alii wahine la e hoohaule i na hua, a mai loko mai o na hua a ke alii wahine i hoohaule ai, ua puka mai na ilo, a nui ae ua mau ilo nei, lilo ae lakou i naonao, a i nonanona.
                Ma ka Hema o Aferika he ano nonanona nunui keokeo. I ka lakou hana ana i hale no lakou, ua ku ke ahua nui. E nana oe ma ke kii i hoikeia'i maluna. He haahaa ke kanaka, a ua kiekie ae ka puu lepo a na nonanona i kukulu ai i hale no lakou. Mea e ka ikaika o keia mau mea kolo liilii i ka hana ana i hale nui no lakou. Ina pela ka ikaika o kanaka, paa no ka hale nui o lakou. Ina hoi e ao ia ka poe hiamoe e keia kumu ao liilii, ina no aole e wi ka aina e like me ka kakou e lohe pinepine nei; "ua wi o Waialua, ua wi o Koolau, ua wi o Maui, ua wi o Kona, ua wi o Puna," a pela aku.
                "O ka poe anonanona, he poe ikaika ole lakou; hoomakaukau no nae i ke kau i ka lakou ai."—Sol. 30:25.

HELELEI NA PUA.

                Ua loaa mai nei ia makou ka palapala a kekahi o na makamaka ma Kohala e hai mai ana no ka make ana o Karai Kuke, he kaikamahine nona na makahiki he umi-kumamakolu. I ka hai ia mai, he kaikamahine haipule keia, he hoolohe i na makua, he heluhelu mau i ka Palapala Hemolele, he maa i ke kokua i na hana pono a pau, he alakai i kona mau pokii ma na hana maikai. Nolaila, ua oluolu ka hoomanao ana o kona poe pili iaia, a ua lana ka manao aia no ia me ka Haku. E hahai aku kakou i na kapuai o ka poe i make aku iloko o ka Haku.

KULA POKII.
SABATI I.

1. O na kanaka pono i hoola ia, o lakou wale no anei ka i noho ma ka lani?
Aole.
2. Owai kekahi malaila?
O na anela.
3. Owai la na anela?
O na uhane maikai a ke Akua i hana'i ma ka lani.
4. I ka wa hea i hana ia lakou?
Ua hana ia kekahi o lakou i kinohi.
5. Ehia ka nui o na anela a ke Akua i hana ai?
He nui wale lakou.
6. Heaha kekahi ano o lakou?
He nani loa lakou.

SABATI II.

1. Mahea kahi e ku ai na anela?
Ku poai puni lakou i ka noho alii o ke Akua.
2. Pehea na helehelena o na anela?
Ua olinolino e like me ka la.
3. Pehea na kapa?
He hulali e like me ka hau.
4. Heaha kekahi hana a lakou?
He hoomaikai i ke Akua no kona aloha, kona ike, a me kona mana.
5. He luhi iho anei lakou?
Aole o lakou luhi, aole make-hiamoe, aole mai.
6. He kaumaha anei lakou?
Aole; he hauoli mau.

SABATI III.

1. Ina i hewa na anela, e hauoli anei lakou?
Aole; o ka hewa no ka mea e kaumaha ai.
2. Heaha la kekahi ano o lakou?
He hemolele lakou, e hoolohe ana i ke Akua.
3. Heaha la kekahi mea a lakou?
He eheu e lele ai.
4. Hoouna ae ke Akua ia lakou ihea?
I ke ao nei.
5. E aha ai?
E malama ia kakou.
6. He hiki anei ia lakou ke kokua ia kakou?
Ae; he ikaika loa lakou.

SABATI IV.

1. Pehea ka manao o na anela ia kakou?
He aloha maoli.
2. Heaha ko lakou makemake?
E noho pu kakou me lakou ma ka lani.
3. A mai, a aneane make ke keiki liilii, kena ke Akua ia wai e kii aku iaia?
I na anela.
4. A paniia na maka o ke keiki a paa kona hanu, lilo aku la kona uhane ihea?
Laweia kona uhane e na anela i ka lani.
5. Pehea iho la ke keiki?
Pomaikai: loaa he mea kani ma kona lima a he leo maikai no hoi kekahi.
6. Waihoia ka wahi kino o ke keiki mahea?
Ma ka ilina, a hiki i ka la e ala hou mai ai, alaila e ola hou.

"KE ALAULA,"
He Nupepa Hoikeike Kii,
Hoopuka mau ia ma Honolulu, i kela malama keia malama e ka PAPA HAWAII, no na Kamalii Hawaii.

                25 keneta ka uku no ka makahiki no ka pepa hookahi; 20 keneta pakahi ka uku no na pepa he iwakalua a oi aku paha ma ke ope hookahi, ME KA HOOKAA MUA IA MAI.
O. H. KULIKA, Luna Hoopuka.