Ke Alaula, Volume I, Number 10, 1 January 1867 — Page 39
KE ALAULA. 39
manao i ke Akua, me ka hoike aku i ko oukou nele, a me ko oukou mau pilikia a kaumaha a pau, a nana no e hoomaha mai a e hoopomaikai mai.
E nana aku oukou i ke Akua me ka hoopii aku ma ka inoa o ko kakou Haku o Iesu, ma kahi mehameha. E nana mau aku iluna, a e ike auanei oukou i ke ao ua uuku e hoea mai ana, a e haule mai ka ua nui o na pomaikai maluna iho o ko oukou mau poo.
Na'u, na ka oukou hoa'loha,
E. M. LONA.
KE KEPOA.
(THE JERBOA.)
He wahi Iole keia i ikeia ma na aina o ka hikina, oia hoi ma Palesetina a me Aigupika. He holoholona uuku keia. Ewalu iniha ka loa o ke kino, a he umi iniha ka loa o ka huelo. Ua like iki keia Iole me ke Kanakaru ma ka loloa ana o na wawae hope, a pekepeke loa na wawae mua. He noho kiekekei wale iluna me ka hilinai aku maluna o kona huelo nui. O kona poo, a me na pepeiao, ua ano like me ko ka Iole Kahiki. I kona wa e holo mama ai, he lele wale aku ia me he ukulele la, eono a ewalu kapuai, a haule aku maluna o na wawae mua. Ke ala koke mai no ia a lele hou aku no. Pela e lele mama loa ai a hala loa aku imua. Ua ai ia keia Iole e na kanaka o Aigupika a me Arabia. A oia paha ka Iole i papa ia na mamo o Iseraela aole e ai ma Oihana Kahuna 11:29.
He noho akoakoa keia ano Iole ma kahi hookahi, me ka eli like i na lua o lakou iloko o ka lepo. He elua anana ka hohonu o kahi a lakou e eli ai. Hoopiha aku hoi lakou ia loko i ka mauu maloo, a iloko olaila e moe ai a e hoopunana ai. He hiamoe lakou i ke ao ma na lua poopoo a lakou, a i ke ahiahi puka mai e imi i ai no lakou, a i ka po no e holoholo nui ai.
HE MAU KEIKI KAMAILIO LANI.
I ka wa e kaa ana o Aka, keiki hanai a Rev. O. H. Kulika ma, i kona mai i make ai, hiki mai la o Mere, ke kaikamahine o Kamalani, ma ko moe ana, ike e mai la kela iaia nei, a hawanawana ae la kela i na makua, me ka olelo ae, "O Mere la!" A noho kela ma ka aoao o kona ike au i na wili ko o Maui, a me ka ulu ana o na mala ko "—no kona ike paha he kaikamahine kela na ka mea wili ko a kanu ko o Waialua. Mahope olaila, ninau aku la o Mere iaia, "E ike e aku ana paha oe i kela aina maikai?" I mai la kela, " Pela paha." Olelo hou aku la o Mere "He wahi kaikunane no hoi ko'u la, aia ilaila." Pane mai la kela me ka hoihoi, "He wahi kaikuahine no hoi ko'u aia ilaila." Aole i hala ka la hookahi ma ia hope iho, a komo aku la ia i kela aina pomaikai, a hui me kolaila poe maikai.
Pela no, he mau pule elua mamua ae o kona mai ana, ua pii oia me kona makuahine i Maemae, a komo i ka pa kupapau, a nana laua i ka pa kupapau o kona makuahine ponoi a me kona kaikuahine; a ia laua e huli hoi ana, pane mai la kela i ka makuahine, "Aole no paha kakou e minamina i ko lakou waiho ana maanei, no ka mea, ua komo aku la no lakou i kahi nani maluna." I ka lohe ana o ka makuahine ia olelo a ua wahi keiki nei, nalu iho la ia iloko ona, "Ina paha e hele e aku oia nei, e hoomanao no wau i keia olelo ana."
Ea, oia ka hua o ka noho Kristiano o na makua. Pomaikai na keiki, ke piha ka manao no ka lani. Na'u na M. KUAEA.
HAPENUIA—NO 1867.
1. Hapenuia ke ALAULA,
Me ka poe lawe pu:
Aole pau kou makahiki,
Umi no malama ou,
Nui nae a puipui,
Ono maoli kou waiwai,
Kau liilii kou mau kukuna,
Naauao na kamalii.
2. Hapenuia, Ianuari,
Ka malama mua nei,
Keia la, ka la hauoli,
Lele, oli, kamalii.
3. Feberuari, me Maraki,
Aperila, a me Mei,
Hahai kahi i kekahi,
Hahai ano koa, e,
Na malama ua anu,
A makani huhu no,
Nui nae na hua pono,
Hapenuia no oukou.
4. Iune, Iulai, me Augate,
Na malama maikai nei,
Pua na kula i ka uli,
Nani na mahinaai;
Lele no, a o na manu,
Ono no na hua oo.
Aia puka mai oukou la,
Hapenuia ia oukou.
5. Sepatemaba, Okatoba,
Novemaba, hui pu,
Na malama malie keia,
Holo, lele na keiki,
Kula a paani pu;
Wiki mai oukou, e wiki
I hapenuia ia no.
6. Dekemaba, pau ia oe
Keia makahiki hou,
Pomaikai ke hiki ilaila,
Me ka maluhia no;
Nani no ke ahonui,
Ke aloha o Iesu!
Pau me oe na malama
I ka hapenuia pu. WAIKOLOA.
HOIKEIKE HOOKUPU MA MAKAWAO.
Ma ka Poakolu, Dekemaba 19, ua hoikeike ia na lihilihi a me na mea a pau a na kaikamahine i humuhumu molowa ole ai, a ua kau pu ia no maluna o kela mea keia mea pakahi na kumukuai. A ua hoomakaukau ia no hoi he mau mea ono, pakaukau inu ki, a he ahaaina kanaka. O ka huina o na dala i loaa mai, he $400 a keu iki ae. Mahaloia no ka ikaika o kahi kuaaina ma keia hana maikai.—Nupepa Kuokoa.
KAMAKAMAILIO.
He mau pule i hala ae nei, e kamakamailio ana kekahi kahunapule me kekahi wahi keiki nona na makahiki eono paha. A penei ka laua kamailio ana:
Kahuna.—Nawai oe i hana?
Keiki.—Na ke Akua.
Kahuna.—Owai ia Akua?
Keiki.—O Iehova.
Kahuna.—Ehia Akua?
Keiki.—Eha.
Kahuna.—Owai na inoa?
Keiki.—O Iehova, Iesu, Maria, a poina iho la ka ha.
Kahuna.—Eha ka Akua?
Keiki.—Pela ka pule Farani.
Kahuna.—He Faran ka oe?
Keiki.—Ae; he Farani ko'u makuakane, a he Maleka ko'u makuahine.
Kahuna.—He maka no nae paha ko ke Akua?
Keiki.—Aole.
Kahuna.—A pehea e ike mai ai ia oe?
Keiki.—Ma kona mana no paha.
Kahuna.—He wawae no ko ke Akua?
Keiki.—Aole.
Kahuna.—A pehea e hiki ai iaia ke hele?
Keiki.—He lele maoli no me he manu la.
Ea, ma keia kamailio ana, ua maopopo ka malamalama iki o keia wahi keiki ma na mea o ke Akua, a hookahi wale no mea hemahema—o ka aha Akua, oia hoi o Maria.
Ea, e na makua mea keiki, e no pono i na keiki ma na inoa o ke Akua, a me kona mau ano, a me na ninau ma ka hope o ke ALAULA. E hoomaka paha penei, a me na buke "Ui:"
Makua.—Nawai oe i hana?
Keiki.—Na ke Akua.
Makua.—Owai ke Akua?
Keiki.—O Iehova. Ekolu ano: o ka Makua, ke Keiki, a me ka Uhane Hemolele.
Makua.—Akolu anei Akua?
Keiki.—Aole; hookahi wale no.
Makua.—Mahea la i hookahi ai?
Keiki.—Ma ko lakou like loa ma na mea a pau.
Pela no e ninaninau mau i ke keiki, i na wa kupono a pau, i maopopo iaia kona men nana i hoi o ka lani. M. K.
KA LIMA O KE AKUA.
Iloko o na manao a me na hana a pau o kanaka, "ka lima o ke Akua." Kanaha makahiki paha mamua ae nei, e noho ana kekahi kane me kana wahine ma Hawaii. I ka wa e wehe mai ana ke alaula o ka euanelio malaila, hapai iho la ka wahine i ke keiki. A maopopo ia laua ia mea, alaila ohumuhumu iho la laua no ua wahi keiki nei. I aku la ke kane i ka wahine, "Ina i hanau ae keia wahi keiki, a he wahi kaikamahine, hoola, a ina he wahi keiki kane, alaila pepehi; no ka mea, ua kena ae nei hoi i ka hanai i keiki kane; " a holo like ae la ia laua ia manao. Aole i loli ae ia manao o laua a hiki i ka manawa i hanau ai.
I ka hiki ana mai o ka la e hanau ai, haalele iho la laau i ka hale, a hele aku la laua ma ka malu a ke opu koli e ku mai ana ma ke alo aku o ka hale. Hele pu aku la ke kane me ka makaukau i na ukana a ka make, a eli iho la i ka