Ke Alaula, Volume II, Number 3, 1 June 1867 — Page 9

KE ALAULA.
BUKE II. HONOLULU, IUNE, 1867. HELU 3.

NA KAMAA-BUKI HOU.

                Loaa ia Kale he mau kamaa-buki hou. Na kona makuakane i kuai nona ma ka hale hana kamaa. Hookomo koke iho oia, a hele mao a maanei iloko o ka hale e hehi kaumaha ana me ua mau kamaa uwi nei. Akahi no loaa iaia na kamaa-buki e like me kela; he pau pono ka wawae a hala iluna. Komo ole ka lepo, pule ole na wawae i ka hau o kakahiaka, mehana pono loa na wawae i na kakahiaka anu. Nolaila, ua olioli loa ko Kale naau, a ua kau nui kona manao i keia mau kamaa-buki hou.
                Hehi kaumaha o Kale ma na wahi a pau o ka hale--aole no oia e noho iki ilalo, he holoholo wale iloko o ka hale no ka lealea o kona pepeiao i ka lohe i ka uwi mau ana o kana mau kamaa. Na keia mau kamaa i hapai ai iaia, a ua hookiekie loa iho la kona naau. Aole no i loaa i na hoa paani ona na kamaa e like me keia ka maikai. Nolaila, manao iho la oia e nui mai paha ka mahalo mai o na keiki a pau iaia. I iho la ia, "aia a ike mai o Kekauwa i kau mau kamaa, e noi aku auanei oia i kona makuakane e kuai i kamaa nona."
                A hala kahi wa loihi ia Kale i ka hookomo wale ana, e uwi mau ana a e hehi kaumaha ana, e hoohaalulu ana i ka hale, molowa kona makuahine i ka lohe mau ana. Pane mai kela ia Kale e noho paha kela ilalo, a i ole ia, e wehe ae paha i keia mau kamaa hoonakeke lua, a hookomo iho i na kamaa kahiko ona. Aole loa e makemake iki o Kale e hoolohe i keia manao o kona makuahine, no ka mea ua hookano oia i keia mea hou i loaa iaia.
                E hiamoe ana kahi bebe ma ke keena moe o lakou, a ua ike lea o Kale, he mea pono ole iaia ke komo aku ilaila, a hooala ia ke keiki. Aka,

aole ona wahi manao iki no ke keiki liilii. Komo wale aku oia ilaila a wehe ae i ka puka aniani me ka hoonakeke lua, a puoho ae kahi keiki a uwe mai la. Aole no o Kale wahi manao aloha iki i kona wahi pokii, no ka mea ua makemake oia  e ike aku i ka hele ana ae o kekahi mau hoa paani ona ma ke alanui, a hiki iaia ke kahea aku a hoikeike i kona mau kamaa-buki hou. Hoomanao iho la oia ia Sara, he wahi kaikamahine hoa paani maikai ona, he kaikamahine oluolu a launa pono mai me ia ma na paani a pau. Holo koke aku keia e hoike aku i kona mau kamaa iaia. I kona ike ana, ua olioli loa no kela, a ua hauoli pu no me ia i kana haawina maikai. Mahalo mai kela i ka manoanoa o ka ili o lalo, i ke kiekie o hope, a me kahi ili ulaula o luna loa iho. A pau ka nana ana, noi mai kahi kaikamahine e ae aku iaia e hoao e hookomo. Pane ae o Kale, "kahaha! he kohu ole i na kaikamahine na kamaa-buki." No keaha la hoi e kohu ole ai?" "No ka mea, he kaikamahine lakou." Ulaula loa iho la na papalina o ua o Sara; ku malie wale iho la no, e nana ana ilalo i na kamaa-buki. Ka hookano loa iho la no ia o Kale, a hoomaka oia e lele iluna, ilalo, e hehi kaumaha ai me kona mau kamaa, me ka pekupeku aku ia Sara. Makemake ole o Sara i ka pekuia mai, a pane aku oia, "mai hana oe pela;" aka e like me ka nui o ko Sara noi ana mai, pela ka nui o ko Kale peku ana 'ku iaia. No ka hapai loa ia o kona naau a kiekie, nolaila manao ole oia i ko hai pono, aole hoi e hoolohe iki aku ia hai.
                I ka hoi ana o Kale i kona hale, ike oia ua pau ka mahaloia o kana mau kamaa-buki. a i kona wa i wehe ae ai, ua hoolei koke ia aku ma kuono, me he mea la ua pau ka makemake o kona poe e ike.
                Eia nae ka mea i hoopilikia loa i kona manao: ua makau loa o Sara e paani pu me ia, a ike mai, hoi wale kela iloko o kona hale. Ike aku o Kale iaia i kekahi manawa iloko o kona pa-hale, a kahea aku e hele mai e paani pu me ia. Ninau koke mai kela, "ke komo la anei oe i kou mau kamaa-buki hou?" Makau wale kela i kona mau kamaa-buki.

"KAHAHA! HE MEA HAULE KA'U."

                Ke lana mai nei kuu manao e kamaili kakou no kela mau hua e kau ae la maluna, oiai o oukou, e na hoa opiopio, ka poe e lawe nui ana i keia pepa.
                He pinepine hoi ko'u lohe ana i keia mau huaolelo e puka ana mai ko oukou mau waha mai. Penei: Ina e loaa i kekahi kahi mea haule, a ike paha kekahi keiki ka mea nana ka mea i haule, alaila kii aku kela i ka ia la mea haule, o ka puka koke mai no ia mai ka waha mai o ke keiki i loaa ai ka mea haule, "Kahaha! he mea haule ka'u."
                E noho malie oe, e ke keiki e olelo ana pela. Eia ka pono: Ina e loaa ia oe kekahi mea haule, e kukala oe penei: "Nawai keia mea i haule iho nei, e?" A kii ole mai ia a hala na la au i manao ai, alaila e pono no oe ke malama me ka maikai. Na'u, na
S. M. P. KALEOOPIO.
Halona, Aperila 23, 1867.