Ke Alaula, Volume II, Number 3, 1 June 1867 — Page 12

12 KE ALAULA.

ALOHA KE KEIKI HIPA AUWANA.

1. He wahi hipa makalii
I lele a auwana,
Mawaho o ka pa maikai;
He hupo kana hana.

2. Nana ke kahu, ike ae
I kona nalo ana,
Hu ae ke aoha, ninau mai,
"Auhea kuu hipa auwana?"

3. Na hipa paa, ua waihoia,
A imi ae ke kahu
I kana mea alohaia,
Ka hipa palupalu.

4. He mea ole iaia nei
Ke anu, ua, pouli,
Ua huli a ua loaa mai,
Ua hina, a maule.

5. Ua apo, a hoomoe ae
A paa ma kona poli,
Ia hipa liilii auwana e,
Me e ka olioli.

6. Pela na kamalii liilii,
Na kamalii auwana,
Mawaho o ka pa maikai,
A naaupo ka hana.

7. Nana oukou e hoomaikai,
A paa ma kona poli,
E kaikai iluna'e,
A mau ae ka hauoli. WAIKOLOA.

HE HALE KULA.

                Aia ma ke alanui o Gerenawiki, ma ke kulanakauhale o Nu Ioka, he hale kula uinihepa; eha hale ke kiekie o ua hale la. Maloko o keia hale hookahi ua hoakoakoaia mai na keiki hookahi tausani a me ewalu haneri e kula ai. Ma ka papa-hele o lalo loa na keena nui e paani ai lakou i na hapa hora hoomaha iki o ke kula. Ma ka lua o na papa-hele maluna ae, ua kulaia na keiki liilii e hoomaka ana i ka a, e, i, a me ka hookuikui. Ma ke kolu o na papa-hele ua kulaia na kaikamahine nunui ae; a ma ka ha o na papa-hele, oia ke keena maluna loa, na keikikane nui. He iwakalua-kumamakolu ka nui o na keena ma keia hale kula, me na kumu, e lawa ai no na keena a me na papa kula a pau, me na haumana he umi-kumamawalu haneri.
                I kekahi la e kula ana na keiki a pau, a loaa iho la i kekahi kkumu ka mai huki, a haule iho la oia ilalo. Uwa iho la kona mau haumana kaikamahine i ka makau i ka ike ana i ko lakou kumu e kupaka ana, a e kaawili ana me ka eha nui. I ka lohe ana e na kaikamahine e ae i ka uwa ana o keia papa kaikamahine, ilihia iho la lakou a pau i ka makau, a hoomaka like i ka holo iwaho. Lohe na keiki liilii o lalo i ka uwa ana a me ka holo nui ana o na keiki o luna, hikilele wale ae no me ka ike ole i ka mea e hoopuiwa ai, a hoomaka i ka holo kiki aku iwaho. No ka hooke ana o na keiki kekahi i kekahi, aole hiki ke wehe mai i ka ipuka hale e puka aku ai i ke alanui, a ua kupilikii lakou maloko o ua puka nei. Hooke mai no hoi na kaikamahine maluna iho kekahi i kekahi, a pilikia loa; a no ka ikaika loa o ka hooke ana, naha mai ka pale maluna o kahi alapii, a haule nui mai ko luna mau keiki maluna o na keiki o lalo i ku maloko mai o ka puka e puka aku ai i ke alanui. Haule mai ko luna mau keiki maluna, a pa maluna o na poo o na keiki liilii o lalo, a hehi lakou kekahi maluna o kekahi, me ka mea ole nana e wehe i ko lakou pilikia. Lohe na keikikane maluna loa i ka haunaele nui ana a me ka leo uwe o na keena o lalo, hikilele ae lakou, a uwa ae kekahi, "Fire! fire!"--"ua wela ka hale i ke ahi," a pela aku. Holo aku kekahi o lakou ma kekahi ala ma ke kua o ka hale, a o kekahi lele wale aku ma na puka aniani, a haule aku ilalo me ka hakihaki o na iwi. Loheia ma na alanui ka uwa nui ana ma ka hale kula, holo mai na makamaka a me na makua e kokua i ka lakou mau keiki. Wawahi iho lakou i ka ipuka o ka hale kula, a ike aku i na keiki i pailaia maloko, kekahi maluna iho o kekahi, a he umi paha kapuai ka hohonu. He kanaha-kumamakolu ka nui o na keiki i make loa mamuli o keia puiwa wale ana o lakou me ke kumu ole e makau ai, e manao wale ana ua wela paha ka hale, a e pilikia ana lakou, no ka uwa ana o kekahi poe. Aloha ino ka make mainoino ana o ia mau keiki i hehi wale kekahi i kekahi.
                Eia na olelo-ao i loaa mai ia kakou ma ka ike ana i keia pilikia kumu ole o ia poe keiki:
                1. Mai uwa wale a hoolilo loa ia oe iho i ka makau a me pihoihoi a ike pono aku oe i kou mea e makau ai.
                2. I ka loaa maoli ana ia oe ka pilikia nui, mai haalele wale i ka noonoo pono ana, aka, e imi oe i ike pono i ke ano maoli o ka pilikia i ili mai maluna ou, alaila e imi i mea e pale aku ai.
                3. E hoomanao mau oe, eia koke ae ka make ma ka ipuka, a e ili mai ana ia i ka hora au e manao ole ai.

HUI NO KE ALAULA.

                E KA NUPEPA ALAULA—ALOHA OE:--Ua kukulu ae makou, na keiki o Waiehu nei, i hui ma kou inoa, i mea hoomanao iwaena o makou a me oe, e lawe mau aku i kou kino i malamalama io no ko makou noho ana opio, a e hookipa mai me ka oluolu ma ko makou mau home pouli, i wehe ia ae ke alaula o ka malamalama o ka naauao, oiai makou e noho hupo nei, i lilo ai oe i hoa kuka no makou no keia awawa anoano i paa mau i ka pouli, i hoa haiahi manao no ka aluna ahiahi, i hookahi hipuu na kakou, e ka hoa opio. Ua halawai iho nei makou me kou helu mua o ka buke elua. E hanai no makou i kou ola e like me kou makemake.
Owau no kekahi o keia hui,
Waiehu, Aperila 18, 1867. MOSE.

                E aloha aku oe i kou hoalauna e like me oe ia oe iho.

KULA POKII.

SABATI I.

1. Pehea ka olelo o ke Akua i kana Keiki?
E make auanei o Adamu laua o Ewa a me ko laua mau keiki a pau ke ole oe e make no lakou.
2. Pehea hou aku ke Akua i kana Keiki?
E hoouna aku wau ia oe i ka honua.
3. Pehea kana olelo i kana Keiki no ke kino?
E haawi au ia oe he kino kanaka.
4. E malama aku oia i keaha?
E malama aku oe i ke kanawai.
5. A heaha la ka hope?
E make oe no na hewa o Adamu a me kana mau mamo.

SA BATI II.

1. Pehea aku ke Keiki a ke Akua?
Ke hauoli nei au e hana aku i kou makemake.
2. A ae oia e aha?
Ae oia e make no na kanaka o ke ao nei.
3. A pehea kana hana?
Haalele oia i kona noho alii ma ka lani a iho mai i ke ao nei.
4. Owai ka poe ana i haalele ai ma ka lani?
O kona Makua a me na anela nani.
5. Pehea la ke kino ana i lawe ai nona?
He kino kanaka e like me ko kakou mau kino nei.
6. Pehea keia hana a ke Keiki i ko oukou manao?
He mea e ke aloha.

SA BATI III.

1. Owai kekahi poe mamo a Adamu?
O kakou no.
2. Owai hoi kekahi?
O na kanaka a pau e noho nei.
3. I make o Iesu ke Keiki a ke Akua no wai?
No kakou no.
4. Heaha ko kakou ano?
He hewa wale no.
5. Ina ole i make o Iesu no kakou, ina ua aha?
Ina no ua pau kakou i ka make.
6. Aole he wahi e pakele ai?
Aole no he wahi e ae e pakele ai.

SABATI IV.

1. Heaha ka pono no kakou no keia hana a ka Makua a me ke Keiki?
E aloha aku.
2. Pehea ka manao o na anela i keia hana a ke Akua?
Kahaha lakou, a hoonani i ke Akua.
3. Hoouna koke mai anei ke Akua i kana keiki i ke ao nei?
Aole; kali aku no kela a liuliu.
4. Pehea hoi ke Keiki i kona kali ana?
Noonoo nui kela i ka hana i waihoia imua ona.
5. No wai ke ola i hoomakaukauia?
Aole; ua kipakuia lakou i ka make mau.
6. No wai ke ola i hoomakaukauia?
No kakou, na kanaka hewa.

KE ALAULA.
He Nupepa Hoikeike Kii.
Hoopuka mau ia ma Honolulu i kela malama keia malama e ka PAPA HAWAII, no na Kamalii Hawaii.

                25 keneta ka uku no ka makahiki no ka pepa hookahi; 20 keneta pakahi ka uku no na pepa he iwakalua a oi aku paha ma ke ope hookahi, ME KA HOOKAA MUA IA MAI.
O. H. KULIKA, Luna Hoopuka.