Ke Alaula, Volume II, Number 7, 1 October 1867 — Page 28
28 KE ALAULA.
KE KANAKA I HOOLA I KE KEIKI I MAKE.
Ma ke ALAULA o Sepatemaba ua haiia no kekahi kanaka i hanaiia e na manu i kona noho ana ma kahi mehameha ma kapa o kekahi muliwai ma ka waoakua; a i ka maloo ana o ia muliwai, hele aku oia a noho me kekahi wahine kane-make. He wahi koena palaoa uuku ka ua wahine la malalo o ka pahu. Ai iho lakou ekolu, o ka wahine a me kana keiki a me ua kanaka nei, aole nae i emi iho kahi koena palaoa. Lohe mai makou i ka manao o kekahi mau keiki i hai mai i ko lakou manao, "O Elia no ua kanaka manu la i olelo, 'aole no e ua ana iloko o na makahiki ekolu,' a ko io no kana, a na na manu o ka lewa i malama mai i ka ai nana."
Eia hou no kekahi mea kupaianaha a ua kanaka la i hana ai. Oi noho no ia me ua wahine la a liuliu, loohia ke keiki i ka mai a make loa, a pau ka hanu. Olelo aku kela i ke kanaka o ke Akua, "Ua hele mai nei anei oe io'u nei e hoakaka i ko'u hewa a e pepehi mai hoi i ka'u keiki?" Lawe ke kanaka o ke Akua i ke kino o ke keiki ma ka poli o ka makua, a waiho aku iaia maluna o kona wahi moe ma ke keena maluna. Kukuli iho kela a pule aku i ke Akua me ka nonoi aku iaia e hoola mai i ke keiki. Oia no ka kakou e ike nei ma ke kii maluna ae. O ke keiki make, ke waiho nei ma kekahi moe, a o ke kanaka o ke Akua, ke kaula, o Elia, oia no ka mea e kukuli nei ma ka aoao o ka moe, me ka pule aku i ke Akua "e hoihoi hou mai i ka uhane o keia keiki iloko ona." Ekolu ana hoomoe ana iaia iho maluna o ke keiki, "a hoi hou mai la ka uhane o ke keiki iloko ona, a ola ae la ia." Hoi hou mai kona hanu, kaakaa kona mau maka, a ala ae la a ku iluna, a kamailio mai la.
Lawe aku la o Elia i ke keiki ilalo, a hoihoi hou ae la iaia ma ka lima o kona makuahine, me ka olelo aku, "E ike hoi, ke ola nei kau keiki."
Olelo mai la ka wahine, "Ano ke ike aku la au he kanaka oe no ke Akua, a o ka olelo a Iehova ma kou waha he oiaio." Kupanaha no ka mana o ke kaula a ke Akua.
KULA POKII.
SABATI I.
1. E noho ana kekahi mau kanaka haipule a waiwai hoi mahea?
Ma kahi aina mamao loa aku ma ka hikina.
2. Ua ike lakou i keaha?
Ike lakou ua hoouna mai ke Akua i kana keiki i ke ao nei, ua hanauia he keiki liilii.
3. Ike anei lakou i kahi e loaa ai ke keiki?
Aole lakou i ike.
4. Heaha la ka elele a ke Akua i hoouna mai ai e alakai ia lakou?
He hoku e kau ana maluna ma ka lewa.
5. Pehea ke kauoha a ke Akua?
E hahai oukou i ka hoku.
6. Pehea la ua mau kanaka naauao la?
Haalele lakou i ka lakou wahi, a hele loa aku i ka aina e, e hahai ana i ka hoku.
SABATI II.
1. Heaha la kekahi mea a lakou i paa iho ai ma ko lakou mau lima?
He mau makana no ke Alii, ke Keiki a ke Akua.
2. Heaha kekahi mau makana?
He gula a he mau mea ala.
3. Nana mau aku lakou i keaha?
Nana mau i ka hoku e kau ana imua o lakou.
4. Alakai ka hoku ia lakou ihea?
Alakai aku ia lakou a hiki loa i kekahi hale ma Betelehema.
5. Olioli lakou i ke komo ana a ike ia wai?
Ia Maria a me kana keiki, o Iesu.
6. Kulou iho lakou imua ona a kapa aku iaia pehea?
Kapa aku iaia ke Keiki a ke Akua, ko lakou Alii.
7. Pehea na makana a lakou?
Haawiia na makana nona, a lako iho o Maria i ke dala e kuai i na mea kupono no ke keiki.
SABATI III.
1. He alii ino loa e noho kokoke mai ana i Betelehema; owai kona inoa?
O Herode.
2. Lohe oia i ka olelo a kekahi poe ua hanauia ma Betelehema he keiki e lilo ana i alii, pehea kona manao?
Aole oia i oluolu e noho alii kekahi, oia hookahi wale no.
3. Aole oluolu oia e noho alii ke Keiki a ke Akua?
Aole loa no.
4. Pehea kana olelo?
"E pepehi au i keia keiki i kapaia ke Alii."
5. Ua ike anei o Herode i kahi i noho ai ua keiki nei?
Ae, ua ike no aia ma ke kulanakauhale alii o Betelehema.
6. He nui na keiki uuku ma Betelehema; ua ike anei o Herode i keia keki i oleloia e lilo ana i alii?
Aole i ike o Herode, a o ka poe i ike, huna iho lakou, aole i hai.
SABATI IV.
1. Heaha ka manao ino loa i komo iloko o Herode?
Manao oia e pepehi i na keiki liilii a pau ma Betelehema, i make ua keiki alii nei.
2. Pehea kela alii, o Herode, i ko oukou manao?
He alii ino loa,—he puni koko, a pepehi i na keiki liilii.
3. Ae anei ke Akua ia Herode e pepehi i kana Keiki?
Aole no.
4. Ua ike mua anei ke Akua i ka manao o Herode?
Ae; ua ike mua no.
5. Hoopakele anei ke Akua i kana Keiki?
Ae; ua hoouna aku ke Akua i na makua me ua keiki liilii la i ka aina e e pakele ai.
HE MELE NO KA HOOMAHA KULA.
["We love to sing together."]
O RIOLA.
I.
W. E ku a mele like,
K. me W. E ku a mele like,
Na leo, na naau,
W. Hoomaikai i ka Makua,
K. me W. Hoomaikai i ka Makua,
Me kana Keiki mau,
W. E ku, e ku, e ku, e ku, e ku e mele like,
Pau loa. E ku, e ku, e ku, e ku, e ku e mele like.
II.
W. E ku a pule like,
K. me W. E ku a pule like,
Ia Iesu ke 'Lii mau,
W. I lilo kakou nona,
K. me W. I lilo kakou nona,
A nona mau loa no,
W. E ku, e ku, e ku, e ku, e ku a pule like,
Pau loa. E ku, e ku, e ku, e ku, e ku a pule like.
III.
W. E ku a helu like,
K. me W. E ku a helu like,
Ka olelo e ola'i,
W. He lamaku no oia,
K. me W. He lamaku no oia,
He Alakai maikai,
W. E ku, e ku, e ku, e ku, e ku a helu like,
Pau loa. E ku, e ku, e ku, e ku, e ku a helu like.
I V.
W. E ku a noho like,
K. me W. E ku a noho like,
Ma kahi kula nei,
W. A ma ka luakini,
K. me W. A ma ka luakini,
Hoomana like ae,
W. E ku, e ku, e ku, e ku, eku a noho like,
Pau loa. E ku, e ku, e ku, e ku, e ku a noho like.
V.
W. E ku a huli like,
K. me W. E ku a huli like,
A naue like ae,
W. Iluna i ka lani,
K. me W. Iluna i ka lani,
I ola a pomaikai,
W. E ku, e ku, e ku, e ku, e ku a huli like,
Pau loa. E ku, e ku, e ku, e ku, e ku a huli like.
VI.
E ku, aloha like,
Na hoa kula nei,
Ke pau nei ka hoike,
Ke hele liilii ae,
E ku, e ku, e ku, e ku, e ku a aloha like,
E ku, e ku, e ku, e ku, e ku a aloha like.
VII.
E ku a hoi like
I kahi e maha'i,
A maha ma na home,
E hoi like mai.
E ku, e ku, e ku, e ku, e ku a hoi like;
E ku, e ku, e ku, e ku, e ku a hoi like.
Ma ke ku ana mai o Kilauea i ka Poano iho nei, ua loheia mai ua pau ke kialua Kohala i ke ahi. Ua pau pu aku me kekahi mau waiwai.
KE ALAULA.
He Nupepa Hoikeike Kii,
Hoopuka mau ia ma Honolulu, i kela malama keia malama e ka PAPA HAWAII, no na Kamalii Hawaii.
25 keneta ka uku no ka makahiki no ka pepa hookahi; 20 keneta pakahi ka uku no na pepa he iwakalua a oi aku paha ma ka ope hookahi, ME KA HOOKAA MUA IA MAI.
O. H. KULIKA, Luna Hoopuka.