Ke Alaula, Volume II, Number 11, 1 February 1868 — Page 44

44 KE ALAULA.

KE KAHUHIPA MAIKAI.
Savior, like a Shepherd lead us.--ORIOLA.

1. Ie- su e ke ka- hu- hi- pa. Ka- hu- hi- pa mai-kai e, Nau e a- la- kai ma- li- e, Ia ma-kou na po- kii nei. E a- lo- ha, e a- lo- ha, E hii- poi a ha- nai mai. E a- lo- ha, e a- lo- ha, E hii- poi a ha- nai mai.
2. Nau makou e kai aloha
Ma na kahawai maikai,
Ma na kula uliuli,
Kahi e maona ai.
E aloha, e aloha,
Kiai, a hoomalu mai.
3. Mai haalele a kuu wale
Ia makou na keiki nei.
O auwana a lilo aku
Ma na waonahele e.
E aloha, e aloha,
Hoopaa ma kou pa maikai.
4. Kena mai ke kahuhipa,
I na kamalii liilii
E kaiia i o na la
I hoomaikaiia mai.
E aloha, e aloha,
I koonei mau kamalii.
5. Eia makou na haumana
O ke kula maikai nei,
Ke hele la i ke Kahu;
Kahuhipa maikai e.
E aloha, e hookipa,
Hoomaikai ia makou nei. WAIKOLOA.

KULA POKII.

SABATI I.
HOOLAIA KA WAHINE KOLOPUPU.

1. E aha ana o Iesu i kekahi la Sabati?
E hai-olelo ana iloko o kekahi luakini.
2. Ike aku oia ia wai?
He wahine i loohia i ka mai i na makahiki he umi-kumamawalu, a ua hookulouia.
3. Pehea ke ano o kona mai?
Ua peluia kona kua ilalo, aole hiki iaia ke ku iluna; he kokolo ka hele.
4. Pehea aku o Iesu iaia?
E ka wahine, ua weheia oe mai kou mai ana.
5. Pehea iho la?
Kau aku o Iesu i kona mau lima maluna ona, a ua hoolaia oia; a ua hoopololeiia kona kua.
6. Pehea ka wahine?
Hoonani aku oia i ke Akua.

SABATI II.
HOOLAIA KE KANAKA I MAKE.

1. E hele ae ana o Iesu ma ke alanui; owai ke ukali ana iaia?
Ka lehulehu kanaka i makemake e lohe i kana olelo a e ike i kana mau hana mana.
2. Owai ka i loaa aku ia lakou?
He huakai hoolewa kupapau o kekahi kanaka i make.
3. Owai ka i hahai mai mahope koke iho o ke kupapau?
O ka makuahine o ke kanaka i make.
4. E aha ana?
E uwe ana, no ka mea, o kana keiki kamakahi no ia.
5. Pehea o Iesu?
Ehaeha kona naau no ka wahine kanemake.
6. Kii malie na kanaka e halihali ana i ke kupapau, a pehea aku o Iesu?
Olelo kela, E ke kanaka opio, e ala'e.
7. A pehea?
Ala mai ka mea i make, a olelo o Iesu i ka makuahine, eia kau keiki.

SABATI III.
PAINA O IESU ME SIMONA, KA PARISAIO.

1. Kono aku kekahi Parisaio ia Iesu e paina me ia, e aha?
E lohe paha i kana olelo, a e henehene paha.
2. Hookipa maikai anei keila ia Iesu?
Aole hookipa pono loa; aole no i honi mai, aole haawi i wai holoi.
3. Owai ka i hele mai ilaila e ike ia Iesu?
He wahine hana hewa.
4. Pehea kana hana?
Hele mai kela a mahope o Iesu e uwe ai.
5. Heaha kana manao?
He hiki ia Iesu ke kala mai i kuu hewa.
6. Pehea hou aku kana hana?
Kulu iho kona mau waimaka maluna o ko Iesu mau wawae, a holi ae kela me kona lauoho.

SABATI IV.
PONIIA KO IESU MAU WAWAE.

1. Heaha ka kela wahine i lawe mai ai?
He ipu aila ala makamae, a me ia i poni ai i ko Iesu mau wawae, a honi aku.
2. Mahalo anei ka Parisaio waiwai i ka hana a keia wahine?
Aole; huhu no ia i ka wahine.
3. Pehea aku o Iesu iaia?
He uuku kou aloha ia'u, he nui ke aloha o keia wahine.
4. Pehea hou aku o Iesu?
Aole ou haawi mai i wai holoi wawae, ua holoi mai keia; aole oe i honi mai ia'u, ua honi mau keia; aole no oe i poni i kuu poo, aka ua poni keia i kuu mau wawae.
5. Pehea aku oia i ka wahine?
Ua kalaia kou mau hewa.
6. Ua oluolu anei ka poe Parisaio i ka lohe ana i keia olelo ana?
Ua huhu lakou.
7. Ka wai hewa ka Iesu e kala ai?
Ko ka poe naau haahaa a mihi io, aole o ka poe naau hookiekie.

KA PEPEHI KANAKA MA MAUI.

                Ua lohe wale paha oukou no ka pepehiia ana o kekahi mau kanaka Hawaii ma Hamakaapoko i ka po o ka la 12 o ka malama i hala. Ua pololei ia lohe. Elua mau kanaka e noho ana ma ko laua wahi pupupu hale mehameha ma ka la a ma kahi i haiia maluna, aia hoi komo mai la eha mau Pake a hoala ana i na kanaka a kokoe i ke kukui, a ninau koke aku la i na mea nona ka hale, "Auhea ke dala?" Hoole laua la, aohe dala, a ia wa koke no pepehiia iho la laua a make loa kekahi, a mauliawa wale no kekahi, me ke kuhi o na Pake ua make like no laua a elua, e puhi ae ana lakou la i ka hale i ke ahi, a o ke kanaka i make loa, oia o Napua, ua paapaa loa kona kino i ke ahi, a o Kaauwaeaina, ua poaloia kona mau maka a hoopaaia, a ma ona la i loheia mai ai, he mau Pake hele mau no ilaila na mea laua i pepehi. Ma ka la 16 no o ia malama make iho la ia. Ua hoopaa koke ia ekolu Pake, a mahuka hookahi, a ma ka la 19 loaa ua Pake mahuka nei, a ua laweia mai lakou a pau i Honolulu nei, e kakali ana no ko lakou hookolokoia i ke kau jure. E na kamalii, he hana ino weliweli loa keia malalo iho o ka la a ke kanaka e hana ai. E na punahele, mai hoomahui i ka hewa.

"E KAU HOU AE I KA POHAKU."

                Oiai e noho ana o Generala Wasinetona ma Bosetona me kona mau koa, i kekahi la hele aku oia me kekahi mau luna koa i Kelesia, he kulanakauhale e kokoke mai ana, a kipa ae lakou me kekahi kanaka hanohano ma kona hale nani. He welawela ka la, a he wahi malumalu kela, a he lokomaikai ka haku hale. Iho mai lakou mai na lio, a hoopaa iho ia lakou malalo o na laau malumalu, a komo aku e paina i na mea momona a ka haku hale. A puka mai lakou, i ka wehe ana ae o kekahi keonimana i kona lio, ua haule aku kekahi pohaku mai luna iho o ka pa pohaku e holo ana ma ka aoao o ka hale. Olelo aku o Wasinetona iaia, "He pono e kau hou ae i ka pohaku." Hoole kela, "Aole; na kekahi no ia e kau hou ae." Ka hele aku no ia o Wasinetona a kau hou aku i ka pohaku ma kahi ana i haule mai ai, me ka i ana ae: "He rula no ka'u, e waiho aku i na mea a pau ma kahi i hookipaia mai ai au, e like me ka pono o ka hoonohoia ana i kuu wa i komo aku ai ilaila." E hoomanao i keia rula a Wasinetona, e ke keiki hooponopono ole.

                Ua hopuia o Kapena Kiai o ke kuna Neti Mela, maluna o ka moku, e kona mau luina a me ka malama-moku, he ekolu la mahope o ko lakou haalele ana ia Waimea me ka manao e holo i ka aina e. Ua hoihoiia mai a Waimea, a mai laila mai, eia ma ka hale-paahao o Kawa, e kali ana no kona hookolokoloia.

                HALE KAMANA.—O ke poo o ke kanaka palauolelo he hale kamana no ke diabolo.

KE ALAULA.
He Nupepa Hoikeike Kii,
Hoopuka mau ia ma Honolulu i kela malama keia malama e ka PAPA HAWAII, no na Kamalii Hawaii.

                25 keneta ka uku no ka makahiki no ka pepa hookahi; 20 keneta pakahi ka uku no na pepa he iwakalua a oi aku paha ma ka ope hookahi, ME KA HOOKAA MUA IA MAI.
O. H. KULIKA, Luna Hoopuka.