Ke Alaula, Volume II, Number 12, 1 March 1868 — Page 45

KE ALAULA.
BUKE II. HONOLULU, MARAKI, 1868. HELU 12.

KA LEINE-DIA O LAPALANA A ME KA MALAMALAMA O KA AKAU.

                Puni wale kekahi poe i ka makemake e makaikai ma ia aina aku, ia aina aku; aka, he mea hiki ole ia kakou a pau ke hele i na aina e. He pono loa e noho no ka nui o kakou ma ko kakou home nei, a na ka poe i holo aku i na aina e e hoike mai ia kakou ma na buke a ma na nupepa i ka lakou mau mea i ike ai ma ko lakou kaahele makaikai ana.
                Eia ke holo nei keia kanaka maluna o ka hau ma ka holopapa i kauoia e ka leine-dia. Ua hanaia ka papa me he waa uuku la, a kau ke kanaka hookahi. Ua hoopuniia ka ili kauo ma ka a-i o ke dia, a holo ke kaula malalo o kona opu a puka aku mawaena o kona mau wawae hope.

                Holo kekahi haole o Nu Ioka e makaikai i keia aina anu, a penei kana: Uhiia ke poo i ka papale kapu huluhulu i paleia o loko me ka hulu pahee a mehana o ka manu koloa (eider duck); wahiia na wawae me na ili leine-dia; o na lima ua uhiia i ke komo-lima ili ilio; hookomoia na kamaa nui i hoopihaia a puni i ka mauu maloo; mawaho ae ua aahuia he koloka ili dia.

Hoao kela e holo.

                A paa ua haole nei i na kapa mehana i oleloia'i maluna, kau aku kela maluna o kekahi holowaa a hoao i ka holo ana. "Lele koke aku kuu dia a huli koke ma ke kihi o ka hale, a hoomaka e iho ma kekahi alanui. Lelele ino aku kuu holopapa maluna o ka hau me he waa la maluna o na ale i puhiia i ka makani ikaika. Hookahi no sekona a i ka lua hookahuliia au, a e kaa ana i ka hau. Ala mai au, e ku malie ana kuu dia, a e nana pono mai ana ia'u. Hooponopono au i kuu wahi waa kahulihuli wale, a kau hou no; aka, aole emo mahope o kuu hoomaka ana e holo, hookahuli hou ia au." Noho kela he mau mahina malaila, a maa loa ia i ka hookele ana i na waa i kauoia e na dia maluna o ka hau. Ma ia hope mai, he mea uuku loa iaia ka holo ana he mau haneri mile maluna o ka hau paakiki a pahee no hoi.

Waiwai ka Leine-dia.

                He mea nui i na kanaka o ia aina anu ma ka akau o Rusia ka loaa ana o keia holoholona. Aiia ka io, inuia ka waiu, aahuia ka ili, a kauoia ke kanaka me ka holo mama loa ma kahi loihi maluna o ka hau. Me he mau bea opio la i ka nana'ku na keiki o Lapalana i aahuia i ka ili holoholona. Ma kekahi aoao o ke kii maluna ae nei e ikeia ai kekahi mau hale o ka poe Lapalana.

Ka Malamalama o ka Akau.

                He loihi ka po ma na aina anu i ka hooilo, a ma ia mau po ua pii mai ka malamalama a kau mai me ka akau, e holo manamana ana iluna e like me ka mea i hoikeia'i ma ke kii. He mea kupanaha loa no keia; aole hoi i ikeia ma keia aina a ma na aina wela a pau, ma na aina anu wale no. He mea keia e hoomalamalama iki ai i na po loihi o ia mau aina. Kohu ole no ka noho ana ma ia mau aina anu loa i ko kakou manao, aka i ka manao o na kanaka o Lapalana; aole aina maikai e ae e like me ka lakou, ke imiia a puni ka honua.

"E KE KANAKA, PULE ANEI OE I KE AKUA?"

                Ma ke ALAULA o ka malama o Feberuari aku nei i hala, ua haiia ka moolelo o kekahi keiki uuku i loaa i kekahi luahine haipule e hoohiki ino ana ma ka huina alanui o kekahi kulanakauhale o Enelani, a i alakaiia e ua wahine la i ke kula Sabati a aoia malaila, a mahope lilo oia i misionari na Kina. Oia ka misionari mua i holo aku i ke aupuni pegana o Kina, a nana hoi i unuhi aku i ka Baibala ma ka olelo Pake. O ka inoa o kela misionari kaulana o Kauka Molesona (Dr. Morrison.)
                I kekahi holo ana o Molesona i Kina, holo mua oia i Piledelepia, ma Amerika, a malaila i ee ai oia maluna o kekahi moku e holo ana i Kina. I kekahi po, oiai e kali ana oia ma Piledelepia, haawi kekahi keonimana iaia i kekahi o na keena moe o loko o kona hale i wahi e moe ai. Ua hoomoe mua ia kekahi keiki uuku ma ia keena maluna o kona wahi moe uuku. I ke komo ana o Kauka Moresona ma ia keena, puoho ae kahi keiki uuku, a i ka ike ana i keia malihini i komo mai ma kona keena moe ua pihoihoi kona manao, a ninau ae kahi keiki, "E ke kanaka, pule anei oe i ke Akua ?" Pane aku o Kauka Morisona, "Ae, pule mau no au i ke Akua. Ua maa no wau i ka pule aku iaia." I ka lohe ana o kahi keiki i keia pane ana a ka malihini, pau kona makau, pili koke no kona poo i ka uluna, a hiamoe koke aku no.
                Naauao kahi keiki! Ike oia ina he kanaka pule keia i ke Akua, aole ona hana ino mai, aka ina he pule ole keia malihini i ke Akua, alaila piha oia i ka makau, o hana ino mai kela.