Ke Alaula, Volume II, Number 12, 1 March 1868 — Page 48

48 KE ALAULA.

KA PAPA KOA KULA SABATI.
The Sunday School Army.—ORIOLA.

Mai pau-pau-a- ho o-e, Ie- su kou ho- a mau. Mai pau-pau-a-ho o- e, Ie- su kou ho-a mau; Ma o na la e la- na- ki- la, Ma o na la e la- na- ki- la. A mau ke ku- paa o'u. O- li au e ku a pa- io, O- li au e ku a pa- io, O- li au e ku a pa- io No ke Ku- la Sa- ba- ti.
2. E paio e na koa,
E na koa keiki hou,
E paio e na koa,
Na koa keiki hou;
Iesu no ka Alihi kaua,
Iesu no ka Alihi kaua,
E lanakila no.
HUI--Oli au e ku a paio,
Oli au e ku a paio,
Oli au e ku a paio,
No ke Kula Sabati,
Ma o na la e lanakila,
Ma o na la e lanakila,
A mau ke kupaa o'u.
3. A pau ka paio ana,
E hui me Iesu,
A pau ka paio ana,
E hui me Iesu,
A e mele mau no ia ia,
A e mele mau no ia ia,
Ma Kanaana hou.
HUI--Oli au e ku a paio,
Oli au e ku a paio,
Oli au e ku a paio,
No ke Kula Sabati,
Ma o na la e lanakila,
Ma o na la e lanakila,
A mau ke kupaa o'u. H. M. H.

KULA POKII.

SABATI I.
HE MAKANI INO MA KA MOANA.--LUKA VIII. 22-25.

1. Owai na haumana a Iesu ka i loaa he moku?
He wahi moku uuku ka Iakoba a me Ioane, a he moku paha ka Petero.
2. Owai kekahi i holoholo pu me lakou i ka moku?
Holo pu o Iesu i kekahi manawa.
3. Pehea la i kekahi holo ana?
Pa mai he makani ino, a poi ia lakou na ale.
4. Pehea na haumana?
Makau loa lakou.
5. Pehea o Iesu?
E hiamoe ana oia ma ka uluna mahope o ka moku.
6. Aole o Iesu makau?
Aole; e hiamoe malie ana no.

SABATI II.
PAPAIA KA MAKANI, A MALIE IHO LA.

1. A pilikia loa iho na haumana i ka makau, heaha ka lakou hana?
Hoala aku lakou ia Iesu.
2. Pehea aku lakou iaia?
"E ke kumu, he mea ole anei ia oe ke make makou?"
3. Pehea o Iesu?
Ala mai ia a papa aku i ka makani.
4. Heaha la kana olelo e hoomalu ai i ka makani?
"Hamau; e noho malie."
5. A pehea iho la?
Ka pio koke no ia o ka makani, a malie loa iho la ke kai.
6. Pehea ka pane ana o Iesu i kana mau haumana?
"No ke aha la oukou i makau ai?"
7. He hiki anei ia Iesu ke hoopakele ia lakou i ka poino i kona wa e hiamoe ana?
Ae, he hiki no.
8. Pehea ka olelo a na haumana i ka ike ana ua hoolohe na makani iaia?
Olelo lakou, "o ke Keiki keia a ke Akua."

SABATI III.
KE KAIKAMAHINE A IAIRO.--LUKA VIII. 41-46.

1. Holo mai kekahi kanaka waiwai io Iesu la a kulou imua ona, a nonoi mai pehea?
"Hookahi o'u wahi kaikamahine aloha, ua mai: e hele mai oe a hoola iaia."
2. Ae anei o Iesu?
Ua ae no, a hele pu.
3. A kokoke aku lakou i ka hale, holo mai na kauwa a pane mai pehea?
"Ua make kau kaikamahine, he makehewa ka hoopilikia hou aku i ka Haku."
4. Pehea aku o Iesu?
"Mai makau; e manaoio mai no ia'u."
5. A hiki i ka hale, pehea aku o Iesu?
Ae aku kela i ka makuakane, ka makuahine, o Petero, Iakoba a me Ioane e komo pu me ia; aole mea e ae i aeia.
6. E aha ana na kanaka?
E uwe ana, e kanikau ana me ka walaau nui.

SABATI IV.
HOOLAIA MAI KA MAKE MAI.

1. Pehea ke kauoha a Iesu?
E hookaa wale ka poe kanikau a pau iwaho.
2. Pehea ko Iesu olelo no ke kaikamahine?
Olelo kela e hiamoe iki ana, a nana no e hoala mai.
3. Pehea aku na kanaka?
Henehene lakou iaia me ka olelo, "aole hiki iaia ke hoala."
4. A pau ka lehulehu i ka hookaawaleia, koe na makua a me na haumana ekolu, heaha kana hana?
Lalau oia i ka lima o ke kaikamahine a olelo aku, "E ke kaikamahine, e ala."
5. A pehea?
Kona ala mai no ia, a hele ae no.
6. Ehia na makahiki o keia kaikamahine?
He umi-kumamalua.
7. Pehea ka Iesu kauoha?
"E haawi i wahi ai iaia."
8. Pehea na makua?
Olioli loa laua.

I NA LUNA O KE ALAULA.

                ALOHA OUKOU, E NA HOA HANA:--He poe kahu ekalesia ka nui o oukou, he mau kumu kula Sabati, a he mau kumu kula la no kekahi. Auhea oukou! O ka makou hana oia no ka imi ana i na manao momona a me na manao hoohauoli i ka naau o ka poe e lawe ana i keia pepa, a e hoopiha ae i na kolamu me ia mau mea. A hoopukaia ka pepa, o ka oukou hana oia no ka hoolaha ana'ku iwaena o kanaka.
                I keia helu pau ka lua o na makahiki o ka hoopukaia ana o keia wahi hoa kamakamailio o ka poe opio. Iloko o Aperila e hoomaka ai ke kolu o kona mau makahiki. Nolaila, ke koiia nei oukou e na luna lawe, e hoike kokemai i ka nui o na pepa e hoouna aku ia oukou o ka helu akahi o ka makahiki hou. I ka malama o Iune e hookaa mai ai na luna i ka uku makahiki no na pepa a lakou e lawe ai.
O. H. KULIKA, Luna Hoopuka.

HE POPOKI KUPAIANAHA.

                He manu laka ka kekahi wahine a hanai pinepine ia ua manu la i kela la i keia la. I kekahi kakahiaka, oiai e ai ana ua manu la i na hunahuna berena i helelei malalo o ka papa-aina, aia hoi, lele mai ka popoki ponoi a ka wahine a hopu i ka manu ma kona waha, a lele pu me ia maluna o ka papa-aina. Aloha loa ua wahine la i kana manu, no ka mea ua manao kela e pepehi ana ka popoki iaia a make loa. Akahi no hoi a ikeia ua popoki la e lawelawe ana i ka manu ma kona waha. I ka huli ana ae o ka wahine, ikeia ke kumu o kana hana ana pela. Ua hoohamamaia ka puka o ka hale, a komo mai kekahi popoki malihini. I ke kipakuia ana o ua popoki e nei iwaho, lele mai ka popoki ponoi a ka wahine mai ka papa-aina mai, a hookuu koke i ka manu, me ka poholehole ole o ka ili. Ua manao wale paha kela ua komo mai ua popoki malihini la iloko o ka hale me ka manao e pepehi i ka manu, a oia ke kumu o kona kokua ana iaia.

AOLE O KA HELE HOOKAHI.

                Aole no i maopopo loa ia'u e puka ana i ka lani ka mea i manao e hele hookahi aku ilaila. Aia a imi oe i mau hoa hele e hele pu aku i keia aina anoano, alaila e hiki io no oe ilaila. Owai kau e imi nei e kauo pu aku me oe ilaila?

NA TALENA EKOLU.

                O ka manawa, o ka noonoo, a me ke dala, oia na talena ekolu i haawiia mai ia kakou e malama, a e hoopukapuka no ke Akua.

KE ALAULA,
He Nupepa Hoikeike Kii.
Hoopuka mau ia ma Honolulu, i kela malama keia malama e ka PAPA HAWAII, no na Kamalii Hawaii.

                25 keneta ka uku no ka makahiki no ka pepa hookahi; 20 keneta pakahi ka uku no na pope he iwakalua a oi aku paha ma ke ope hookahi, ME KA HOOKAA MUA IA MAI.
O. H. KULIKA, Luna Hoopuka.