Ke Alaula, Volume III, Number 2, 1 May 1868 — Page 8
8 KE ALAULA.
KA IESU KAMAIKI WAU.
Jesus' Little Lamb.—GOLDEN CENSER.
1. Ka Ie-su ka-ma-iki wau, Oli le-a kuu na-au, Alo-ha o-la, I-ke mai la, Ha-lia mai a hoo-mai-kai ia, Ha-nai po-no, lau-na pu, He-a i ka ino-a o'u.
2. Hele au a hoi mai,
Iaia wau e malu ai,
Ma na kula uliuli
Ai a maona ke pololi,
Ma na kahawai maikai
Inu au ke makewai.
3. Pono ia'u ke oli ae
Ma ko Iesu kihapai,
Oia no ke kahuhipa
Nana wau la e hookipa
I kuu hele mai nei au
A i kela ao maikai. WAIKOLOA.
HE PAILA WAHIE NUI.
I ka hoi ana mai o Wile laua me Neke mai ke kula mai i ke awakea, nana mai la o Neke a olelo ia Wile, "Aia hoi, he nui ka hana nou. He pono i kou makuakane ke hana e like me ko'u makuakane, a hoolimalima i kanaka nana e halihali ua wahie la a pau iloko o ka hale; aole kupono i ke keiki opiopio ke hoohana nui loa ia, wahi a kuu makuahine. E pau auanei ke koena o keia la i ka hana; aole wahi manawa e paani ai. Mai hana oe, Wile e, he luhi maoli."
Pela ke ano o ko Neke kamailio ana ia Wile i ko laua ku ana imua o ua paila wahie la, a i kona kamailio, me he mea la ua ulu ae ua paila la, a lilo i mea nui loa. A i kona noonoo ana, manao iho la ia, "Kai ka luhi o ka hana!" I kona komo ana iloko o ka hale, i mai la kana makuahine iaia, "He wahi hana nou; ua ike anei oe i kela wahi paila wahie maikai?"
I iho la ia iaia iho, "Ua ike no hoi au," aole nae i olelo me ka leo akaka. He nui na malama i moe ai kona makuakane me ka mai, aole hiki ke hana. A he aina anu hoi ua aina la a Wile me kona mau makua i noho ai. He pono ke makaukau ka wahie iloko o kahi hale waiho wahie. Aka, nana iho la o ua o Wile la i ka paila wahie, a olelo iho la, "He paila wahie nui no ka hoi."
"Nani ka pomaikai," wahi a ka makuahine; "he anu, a he loihi ka hooilo e hiki mai ana."
Makaukau iho la ka aina awakea; ua haliia ka papa ma ke keena kuke; hele mai la ka makuakane i kokuaia e na kaikamahine elua, o kekahi ma kekahi aoao, a o kekahi ma kekahi aoao, e koo ana. Noho iho la na makua me ka manao aloha i ke Akua; o na kaikamahine hoi kamakamailio iho la me ka oluolu. Aka nalu iho la o Wile iloko o kona naau me ke kaumaha no ua paila wahie "ano e" la. Nuha iho la ia. Kamailio oluolu mai kona makuakane, aole nae a oluolu iki o ua Wile nuha nei. "Aia hoi kela wahie," wahi a ka makuakane; "he pono ia oe e hooikaika mua a komo iloko o ka hale; aole kula i keia koena la--ua lawa no ka manawa."
"E poeleele auanei au ma ia hana," wahi a Wile; "e hele ana na kamalii mauka e ohi hua ono."
Aole pana mai ka makuakane. He makuakane aloha, i pilikia i ka mai lolo. No keaha la i nuha ai kana wahi keiki? Ninau iho la o Wile i kana makuahine ina aole hiki ke hoolimalima i kekahi kanaka nana e hana, e like me ko Neke makuakane. "He okoa loa ko Neke mau makua—he waiwai; aka o kou makuakane he"--a piha iho la kana mau maka i na waimaka.
Komo mai o Mele, kana kaikuahine, a holo aku la o ua Wile makou hana nei iwaho, a nana hou i ka paila wahie "nui launa ole." Noho iho la ia ma kekahi laau, me ka manao kanalua i ka nui o ka hana.
Mahope iho puka mai la ka makuahine. Lele ae la o Wili iluna. Olelo oluolu mai la ka makuahine, "Ina hoi oe e lalau i ka hana i keia manawa, aole emo pau."
"He nui launa ole hoi, a e make auanei au i ka hana," wahi a ua keiki nuha la.
"E make ka anei!" wahi a ka makuahine. "E nana mai i keia paila nui; he nui no paha; aka ina e lawe pakahi oe i na laau iloko, aole oe e kaumaha ana; hookahi wale no laau i ka manawa hookahi. Aka e pau ana ua paila wahie nei i ka hoihoiia iloko, ke lawe pakahi oe i na laau. Aole emo pau iloko. E hoao hoi, e Wile e."
Maikai ke ao ana o ua makuahine la, a ua pau ko Wile kanalua. "Hookahi wale no laau i ka manawa hookahi, ka! e pau ana no ka." Emi iho la ka nui o ua paila nui launa ole nei; no ka mea ua hoao o Wile me ka hoihoi e lawe pakahi i na laau; mama iho la ka hana.
"Papa e," wahi a ua Wile ikaika nei, "heaha ka hora?" i kona holo ana iloko o ka hale me ka olioli i ka pau ana o ua paila nui la iloko.
"O ka hora ekolu me na minute keu ekolu," wahi a ka makuakane i kona nana ana i kana wati.
"Keu ha!" wahi a Wile, "a ua pau hoi ka paila i ka puehu."
Akahi no a ike o Wile i kona ikaika. Imi iho la ia i kona makuahine, a honi iho la, me ka olelo, "He keiki kolohe no au, aka na keia wahi olelo i hoohuli ia'u, "hookahi laau i ka manawa hookahi."
Pela no e na pokii, ina he nui ka hana ia oukou i keia hope aku, e noonoo, aole no e hiki ia oukou ke amo ae i ka paila okoa ma ko oukou mau poohiwi; aka e lawe pakahi i na laau, a e pau no ka paila okoa i ka laweia. L. L. N.
Ma na kulanakauhale nui o na aina e, ua ike pinepineia na keiki opiopio e alakai ana i ka poe makapo ma na alanui. He hana pono a aloha maoli keia.
O KUU AIE I KA HAKU.
(He Ninau)
O kuu aie! o kuu aie
Ia Iesu no heaha la?
E hai maopopo mai,
I ike au a hookaa ae.
(Ka Haina)
O kou aie ia Iesu e—
Ina e holu pau mai oe
Na one o ke kahakai,
A me na kulu o ke kai,
Alaila pani like mai
I dala kini maikai mai,
Aole no e kaa pau
Ka aie nui loa ou.
Ina he ao okoa no,
A miliona mai na ao,
He gula wale no a pau,
Aole no e lawa kau.
Ke koko waiwai o Iesu,
Ke koko makamae a mau,
Oia la no ke holoi mai
Kou aie nui a waiwai. E.
KULA POKII.
SABATI I
KA IESU ALOHA I KA MAKUAHINE I NONI MAI.--MAT. XV., 21-28.
1. Hahai mai kekahi wahine a nonoi mai ia Iesu pehea?
E aloha mai oe ia'u, a e hoola i kuu kaikamahine.
2. Heaha la ka pilikia o kana kaikamahine?
Ua uluhia e ke daimonio.
3. Ae koke anei o Iesu i kana nonoi?
Aole; kali wale kela me ka pane ole aku a liuliu.
4. Pehea kau na haumana?
Noi aku lakou ia Iesu e hoihoi aku i kela wahine walaau wale mahope o lakou.
5. Pehea ka wahine?
Hele mai a moe iho mamua ona, me ka nonoi mai, "E ka Haku, e kokua mai."
6. Pehea aku o Iesu?
"E ka wahine, he nui kou manaoio. E ola kau kaikamahine." A ola no ia hora.
SABATI II.
ALOHA IESU I NA KEIKI.--MAR. X., 13-10.
1. Heaha ka na makuahine i lawe mai ai ia Iesu?
Hali mai i ka lakou mau keiki.
2. Owai ke ku mai ana?
O na haumana e ku mai ana, a papa aku lakou i na makuahine mea keiki, o pilikia ka Haku.
3. Pehea aku o Iesu?
Huhu aku o Iesu i na haumana, me ka olelo aku, "E kuu mai na kamalii io'u nei."
4. Pehea ka Iesu hana?
Hipoi iho la oia ia lakou, a kau ae i kona mau lima maluna o lakou, a hoomaikai ia lakou.
5. Pehea kela mau keiki i ka oukou manao?
He pomaikai loa lakou i ka hoomaikaiia e Iesu.
6. He kapaia na keiki maikai pehea?
Na keiki hipa a Iesu.
Ka Iesu kamaiki wau,
Oli lea kuu naau,
Aloha ola, ike mai ia,
Hali mai a hoomaikai la,
Hanai pono, launa pu,
Hea i ka inoa o'u.