Ke Alaula, Volume III, Number 3, 1 June 1868 — Page 12
12 KE ALAULA.
NAUE AE, NAUE AE.
Sunday School Battle Song.—HAPPY VOICES.
1. Nau - e ae, nau - e ae, me ka hau - o - li nae. Ko Zi - o - na mau ko - a ke - i - ki mae - mae, Me ka hae o ke O - la e ma - lu mai ai, Me ke ka - hi - ko kau a ka ole - lo mai - kai. Nau - e mau, nau - e mau, kau - a pu ka - kou, kau - a pu ka - kou, Ie - su no ka Ali - hi kau - a, a e kau - a no - na no; nau - e mau, nau - e mau, o a kau - a pu, o a kau - a pu, Mele mau ka la - na - ki - la, "Ha - le - lu - ia ia Ie - su."
2. Paio ae, paio ae i na enemi nei,
I na kuko, na hua na hana kue,
No ke Lii, no ke ola e paio mau ai,
Alualu a hoi, ulupa a kinai.
HUI. Paio mau, paio mau, paio pu kakou, paio pu kakou,
Iesu no ka Alihikaua, a e kaua nona no,
Paio mau, paio mau, o a paio pu, o a paio pu,
Mele mau ke lanakila, "Haleluia ia Iesu."
3. Mele ae, mele ae, i ka hoi ana mai.
Me na hae o na koi i paa i na leo
Hea mai na anela e pii i ke ao.
A na Iesu e haawi i lei ola mau.
HUI. Mele mau, mele mau, oli pu kakou, oli pu kakou.
Me Iesu ka Alihikaua, nona mai ke oia mau;
Mele mau, mele mau, o a oli pu, o a oli pu.
Mele mau, "na lanakila, Haleluia ia Iesu."
HAWAII.
KULA POKII.
SABATI I.
KA PULE A KA HAKU.—MAT. VI., 9-13.
1. Pehea ka Iesu pule pu ana me kana mau haumana?
Pule oia a hoolohe aku lakou.
2. Heaha ko lakou nonoi iaia?
"E ka Haku, e ao mai oe ia makou e pule."
3. Ae anei o Iesu i ka lakou noi?
Ae; ae no kela, a ao mai ia lakou i kekahi pule, penei:
"E ko makou makua iloko o ka lani, e hoanoia kou inoa. E hiki mai kou aupuni; e malama ia kou makemake ma ka honua nei, e like me ia i malamaia ma ka lani la; e haawi mai ia makou i keia la i ai na makou no neia la; e kala mai hoi ia makou i ka makou lawehala ana, me makou e kala nei i ka poe i lawehala i ka makou. Mai hookuu oe ia makou i ka hoowalewale mai; e hoopakele no nae ia makou i ka ino; no ka mea, nou ke aupuni, a me ka mana, a me ka hoonaniia, a mau loa aku. Amene."
SABATI II.
1. Pule pinepine anei o Iesu ?
Ae, pule pinepine; ma ka mauna i kekahi manawa, a i ka po hoi.
2. Ua ao mai anei ka oukou mau makua ia oukou e pule?
3. Heaha ke ano o keia olelo, "E hoanoia kou inoa?"
Ua like ka olelo hoanoia me ka hoomaikaiia a me ka hoonaniia.
4. Heaha keia mea o ka lawehala ana?
Oia na hewa a kakou.
5. Pehea, ina e nonoi aku oukou, e hoouna mai anei ke Akua i kona uhane e noho pu iloko o ka naau o oukou, na keiki?
Ae; ua haawi mai oia i ka ai, a me ka ia, a me ka lole, a e haawi mai no hoi i kona uhane ke noiia'ku.
6. Pehea na keiki haipule ?
E lilo ana lakou i keiki pono, a e komo no lakou i ka lani, a noho pu me a Haku a me ka poe pono a pau.
SABATI III.
1. Ike mua anei o Iesu i na mea a pau?
Ae, ua ike no. Ua ike oia ua kokoke kona manawa e make ai.
2. Heaha kekahi mau mea ana i hai ai i kana mau haumana?
Hai aku oia ia lakou i kana mau mea huna, me ka olelo aku, ua kokoke ka manawa e haalele aku ai au ia oukou.
3. Pehea hou kana olelo?
E hoomaewaewaia ana au, e hoopaa mai ana na kanaka ia'u i na kaula, a hahau mai, a pepehi ia'u a make, aka e ola hou no au.
4. Pehea na haumana i ka lohe ana i keia ?
Kaumaha loa lakou.
5. Ma ke kulanakauhale hea la na kanaka i makemake e pepehi ia Iesu?
Ma Ierusalema.
SABATI IV.
1. No keaha la i hooino ai na kanaka ia Iesu?
No kona hai ana aku ia lakou i ko lakou hewa.
2. Heaha ko Iesu manao i ka hai ana aku i ko lakou hewa?
E hoohuli mai ia lakou i ka pono.
3. Pehea kona hai ana ia lakou?
He hookiekie ka oukou hana, he hookamani ko oukou pule, a he ino ko oukou naau.
4. A huhu na kanaka iaia, pehea ka lakou olelo?
"Aole o ke Akua kou Makua."
5. Pehea aku o Iesu?
"O ko'u makua no ia; mai ka lani mai la au, a e hoi hou aku no au ilaila.
6. Heaha ka lakou i hana mai ai?
Lalau lakou i na pohaku e kipehi mai iaia.
7. Pehea o Iesu?
Hoonalo oia iaia iho, a hele aku i kahi e loa.
KA HOOMAINOINO ANA I NA MEA UHANE OLE.
O Pika Romio, he keiki na kekahi kanaka mahiai kuonoono, a he keiki lokoino loa i na holoholona liilii, na manu, a me na mea kolo a mea lele a pau. Hopu kela i na owao, na ilio, na nalo, na manu liilii, a uhai aku i ko lakou mau wawae, na eheu, a hoomainoino wale aku. O ka leo uwe o na holoholona liilii i haule iloko o kona mau lima menemene ole, he mea lealea loa no ia no kona mau pepeiao. Aole i hiki i keia mau mea liilii ke hoopakele ia lakou iho mai kona lima aku, aole hoi e hoopai aku iaia no kona hana ino wale ana; aole he kanaka nana e hoopakele ia lakou. Aka ua nana mai no ke Akua, a nana no i hoopai i ka hewa o keia keiki i hana ino wale aku i na mea ana i hana ai.
A nui ae o Pika a lilo i kanaka makua, hoolimalima aku oia iaia iho i kekahi kanaka puhi rama. I kekahi la haule kona papale iloko o ka ipuhao nui, kahi e puhiia ana ka rama. I kona kulou ana imua me ka manao e hopu i ua papale la, pakika kona wawae, a pahu kona kino holookoa iloko o ka ipuhao e paiia ana. Hoopaa oia i ke kae o ka ipuhao me kona mau lima, a kahea nui aku. Kokua koke ia mai oia, a hukiia iwaho. Ua wela nae kona mau wawae. Uwe leo nui oia me ka hoino i ka inoa o ke Akua. A oluolu iki iho ka walania o ka eha, kena oia ia lakou e kii akui kahuna pule e hele mai e ike iaia. Olelo aku kela i ke kahunapule, "He weliweli ko ke Akua hoopai ana ia'u no ko'u mau hewa i ka hoomainoino ana i kana mau mea ana i hana'i. He nui na haneri o na holoholona a'u i hoopilikia ai a i pepehi a make. Ina he kanaka aihue au, ina no ua hiki ia'u ke hoihoi aku i ka'u mau mea a'u i aihue ai; aka ua lawe au i ke ola a ke Akua i haawi mai ai, a eia ke hoopai mai nei ke Akua ia'u."
Noi ke kauka e oki aku i na wawae a i elua o Pika, a olelo kela ina aole e okiia, make no ia. No kona minamina i kona ola, ae kela i ke kauka e oki aku i kona mau wawae me ka pahi. Hoomanao ae la ia i na holoholona nona na wawae ana i oki kolohe ai.
Hele pinepine mai ke kahunapule a ao mai iaia, a mihi io no ia. Loihi no kona moe ana a ola ae no, me ka muumuu nae o na wawae. Ua oi aku ko ke Akua lokomaikai i ko ke kanaka. Hai pinepine mai oia i ka moolelo o kona hana hewa ana, me ke ao aku i ka poe opio, i ole e hahai mai iaia ma ka hoomainoino ana i na mea a ke Akua i hana'i.
O ke ala a ka poe pono, ua like ia me ka malamalama e aa ana, e mahu hua mau ana i ke awakea loa. O ka aoao o ka poe hewa, ua like ia me ka pouli; aole i ike i ko lakou mea e hina ai.
E na punahele, ina e hoahewa ole mai ko kakou naau ia kakou iho, alaila ua loaa ia kakou ka wiwo ole imua o ke Akua.
KE ALAULA,
He Nupepa Hoikeike Kii,
Hoopuka mau ia ma Honolulu, i kela malama kela malama a e ka PAPA HAWAII, no na Kamalii Hawaii.
25 keneta ka uku no ka makahiki no ka pepa hookahi; 20 keneta pakahi ka uku no na pepa he iwakalua a oi aku paha ma ka ope hookahi, ME KA HOOKAA ANA IA MAI.
O. H. KULIKA, Luna Hoopuka.