Ke Alaula, Volume III, Number 10, 1 January 1869 — Page 37

KE ALAULA.

BUKE III. HONOLULU, IANUARI, 1869. HELU 10.

O KE AO ANA I KAHI POKII KAIKUNANE HELUHELU.

                Lealea o Iosepa i ka paani, i ka holoholo i na wahi lio laau ana, a i ka hoohana ana i kana wahi kao keiki i ke kauo laau me he bipi kauo la, aka he molowa ia i ke ao heluhelu palapala. Hoonoho mai kona makuahine ia Lepeka e ao i kona wahi pokii i ka heluhelu. Molowa kahi Iosepa, a hoonaulu i kona kaikuahine i ka hoolohe ole a lilo i ka paani, e hoohei ana i ke owao i ka wa e aoia aku ai na hua A, E, I, a pela aku.
                I kekahi manawa ua hoomanawanui loa o ua o Lepeka i ke kolohe a kahi pokii, a alako iaia me ka leo aloha, a hoopaa mai iaia a paa pono na wahi haawina kupono i ka noonoo kamalii o kahi lolo opiopio. I ka wa e pauaho ai hoi o Lepeka huki ino i kahi kaikunane, a pai aku iaia me ka huhu a uwe kela, a hoole i ka nana i ka buke, a kue laua, a holo ole ke ao ana.
                Olelo o Iosepa i kekahi la i kona makuahine, "Aole o'u makemake e noho hou i haumana na Lepeka." "Makemake nae paha oe e noho i haumana na ke Akua ?" Hookakaa o Iosepa i kona mau maka a ninau mai me ke kahaha, "He makemake anei ke Akua ia'u i haumana au nona ? E kolohe loa paha anei au ina o ke Akua ke kumu." Ae mai kona makuahine, "Ae, he makemake no ke Akua ia oe i haumana nona. Elua hoi ana mau buke e ao ai oe." "Heaha ia mau buke elua ?" wahi a Iosepa. "O kekahi o ia mau buke oia no ka buke o kana mau mea ana i hana'i. He buke nui no ia, a he nui na haawina maikai i kupono ia oe ke ao. Malaila e ao ai kakou no na laau, na mea ulu, na mea kanu, a me na holoholona; na bipi, na lio, na hipa: na manu; no ka la, ka mahina, na hoku; no ka honua nei, ke ea, ka wai, ke kai. Ma ke ao ana no keia mau mea, ao mai ke Akua ia kakou i kona ike, kona akamai, a me kona lokomaikai. Nolaila oma e ao no keia mau mea a pau, he haumana oe no ko Akua." Pane ae kahi keiki liilii o Iosepa, "Ina pela, e ao au me ka hoolohe pono."
                "O ka lua hoi o kana mau buke, oia no kana olelo hemolele. Ua piha ia buke i na haawina maikai loa. Malaila i kakau ia'i kona kanawai, ka mea e alakai ia kakou i ka pono a me ka pomaikai. Malaila i kakauia'i ka moolelo no kana Keiki i iho mai i ke ao nei e hoola ia kakou, a e lilo i kumu alakai e hoohalike aku ai kakou. Malaila i haiia mai kahi a ka poe pono e hele aku ai, a me kahi e hele aku ai ka poe hewa."
                "Ina la pela e ao no wau."
                "Pela io no," wahi a kona makuahine, "a e haalele i ka molowa a me ke kolohe."
                "Aole paha e hiki i ke keiki liilii e noho pono i na manawa a pau," wahi o Iosepa.
                "E kokua nae kona Kumu iaia," wahi a kona kana mau haumana a pau, a ina e nonoi aku oe iaia e kokua oia ia oe me kona Uhane Hemolele, hooliloia oe i haumana imi, ahonui, hoomanawanui a akahai, a e hooluolu i kou wahi naau."
                "O ka'u mea no ia e iini loa ai e loaa mai, a e lilo io au i haumana nana."
                Mai ia manawa mai ua ano hou ae o ua o Iosepa, a ua loaa ole ole ia Lepeka kekahi pilikia i ke ao ana i kona wahi pokii.

KE KAAO OIAIO A MAKOU.

                Eia ma kekahi kolamu o keia pepa ke hoomaka nei makou e hoopuka aku he kaao no kekahi keiki i nalowale no na makahiki ehiku. Ina e malama pono ia na pepa o kela malama keia malama, alaila o ike auanei ka poe heluhelu i ka pili pono ana ae o kekahi haku ana i ko kekahi iho a pau pono; na helu o ia kaao. E pii mau ana ka maikai o keia kaao oiaio a hiki aku i ka pau loa ana iloko o na helu ehia la.

HE KEIKI NAAUAO.

                E noho ana kahi keiki liilii nona na makahiki eha ma ka papa i hele, a komo mai kona makuakane, a hapai iaia maluna o kona uha.
                Ninau ka makuakane i kana wahi keiki, pehea la e hoohauoli ai kahi keiki uuku i kona makuakane.
                Noonoo iki o Kale a pane mai me keia,
                "O ke keiki naauao, hoohauoli mai oia i kona makuakane."
                Aole i hoohilahila kela wahi keiki i kona mau makua, a lilo oia i kanaka makua i mahaloia.