Ke Alaula, Volume IV, Number 2, 1 May 1869 — Page 8

8 KE ALAULA.

KUU BAIBALA MAIKAI WALE.
BLESSED BIBLE.--Golden Censer.

1. Kuu Bai-ba-la mai-kai wa-le! O kuu me-a ma-ka-mae! Na-na mai kuu o-li-o-li, No na mai kuu po-mai-kai. Hewa au a i-ke o-le I ka mea e po-no ai; Pu-ka mai la kuu Bai-ba-la, Po-ha mai ka la-ma e. Kuu Bai-ba-la, Kuu Bai-ba-la, Ku-mu o kuu o-li nei; nei.
2. Kuu Baibala, hoa poli,
Pili mau i kuu naau,
Nau no wau e hoohauoli
Ma ka po, a ma ke ao;
Lilo au i ka auwana.
Loaa kuu Baibala nei,
Paipai mai e hoi au la,
Lohe au a hoi mai.
Kuu Baibala, kuu Baibala, &c.
3. Kuu Baibala nani wale!
Paa no oe iloko o'u,
Oe no kuu hoahele
Mai nei ae a make no;
Oe hoi ko'u kokoolua
Ma ke awawa lua po,
A maluna ma ka lani,
Paa mau ia'u ka maikai no.
Kuu Baibala, kuu Baibala, &c. WAIKOLOA.

KULA POKII.
SABATI I.
NO IOANE.--HOIKEANA I: 2-19. IV: 1-5. XXII.

1. Pehea ka make ana o na Lunaolelo?
Pau ka nui o lakou i ka pepehiia.
2. Pehea la ka make ana o Petero?
Ua kaulia oia ma ke kea.
3. Pehea o Ioane?
Hopu aku kekahi alii ino iaia a hoopaa iaia ma kekahi mokupuni.
4. I ko Ioane noho aha ma ia mokupuni o Palemosa, heaha kana mea i ike ai i kekahi la Sabati?
Iho mai o Iesu mai ka lani a kamailio pu me Ioane, a lawe aku iaia i ka lani, a kauoha aku iaia e kakau i na mea ai e ike ai.
5. Na wai i hooikeike aku iaia i i na mea o ka lani.
Na kekahi anela.
6. Heaha na mea ana i ike ai?
Ike oia i ka noho alii o ke Akua, a me ke anuenue e hoopuni ana ia.

SABATI II.
NA IOANE.

1. Heaha ka Ioane i ike ai e hoopuni mai ana ma ka noho alii o ke Akua ma ka lani?
He anaina kanaka nui loa i aahuia me ke keokeo, me na lei alii gula ma ke poo.
2. Heaha ka lakou hana?
Hoolei lakou i ko lakou lei alii imua o ka noho alii, me ka hoonani ia Iesu ke Keikihipa a ke Akua.
3. Owai hou ka Ioane i ike ai.
Ike oia i na anela he nui i hiki ole ke helu ia e hoopuni ana i ka noho alii, a e hoonani ana i ke Keikihipa.
4. Heaha ka oi o na mea a pau a Ioane i ike ai ma ka lani?
O ke Akua no.
5. He la anei kekahi malaila?
Aole he la malaila, aole mahina, aolo po malaila, aole hoi make kukui; no ka mea, na ka Haku na ke Akua e hoomalamalama ia lakou.
6. Owai ka poe i ae ole ia e komo ilaila?
O ka poe hoopunipuni a me ka poe hana ino a pau.
7. Owai ke noho nei malaila?
Malaila o Ioane e noho pu la me ka Haku, a malaila ka poe pono a pau e noho ai.

SABATI III.
NO KA LA HOOKOLOKOLO.--1 TESALONIKE IV: 15-17. HOIKEANA XX: 11-15.

1. Ahea la e hoi hou mai ai o Iesu i ke ao nei?
Aole i hoike ia mai ia kakou ka wa o kona hoi hou ana mai.
2. Pehea ia manawa?
E noho ana no na kanaka pono a me ka poe hewa.
3. E hookani ka anela i ka pu, a hea ma ia hope iho?
E ala mai ka poe make mai na ilina, a o ka poe pono, e pii ae lakou e lahawai me Iesu ma ke ao.
4. Pehea e noho ai o Iesu?
E noho oia ma ka noho alii keokeo, a e puni mai ana na anela.
5. E wehe ia ana na buke, Heaha ka i kakau ia ma na buke?
Na hana ino a pau a kanaka i hana ai.
6. E heluhelu ia mai na mea a pau i kakauia, a o ko wai hala ke kalaia ana?
E kala ia na hala o ka poe i paulele ia Iesu?
7. Pehea lakou?
E kalaia ko lakou waimaka, a e noho pu lakou me ka Haku.

SABATI IV.

1. Ina e makemake oe e kakau ia kou inoa ma ka buke o ke ola, pehea la e hana ai?
E nonoi aku iaia e haawi mai i ka Uhane Hemolele, alaila e aloha aku ia Iesu, a e hoowahawaha i ka hewa.
2. Heaha ka ke Akua e hana aku ai i ka poe hewa?
E hoopaa ia lakou i ka hao, a hoolei ia lakou iloko o ka lua ahi.
3. Pehea lakou malaila?
Malaila lakou e uwe ai a e uwi ai na niho.
4. Owai kekahi e hoolei pu ia ana ilaila?
O Satana, ka makua o ka poe hewa.
5. Heaha ka olelo o kekaki poe ke hiki aku ilaila?
"Ke mihi nei au no kuu hoolohe ole ana i ka'u mau kumu ao."
6. E aha ana o Satana i keia manawa?
Ke hele nei e imi i kana mea e ole ai.
7. Pehea na keiki a ke Akua i ka wa e ike ai lakou i keia ao e pau ana lakou i ke ahi?
Aole o lakou makau iki, no ka mea, e malu ana lakou pu me Iesu.

KAHI MI SIONARI OPIO LOA.

                "Makemake au e lilo i misionari e like me kuu makuakane, o Wilama," wahi a Elene liilii. "Manao anei oe, e kuu makuahine, e ae oia ia'u e hele pu me ia?"
                "A haalele oe i kou mama?" pela ka ninau mai o kahi leo aloha mahope ona.
                "Aole, e kuu mama, aole hiki ia'u ke haalele ia oe; aka, iini loa au e lilo i misionari."
                "A ina ua aeia keia makemake o kuu kaikamahine, pehea la kana hana e hooko ai ia makemake ou?"
                Pane mai o Elene, "E ao aku au i na keiki liilii no Iesu, no kona aloha ana ia lakou, a e noi au ia lakou e aloha aku iaia e hiki ai lakou i ka lani."
                "E Elene, e ae no au ia oe e lilo oe i misionari, aka e pono e hoomaka oe ma kou home nei. He hiki no ia oe ke hoike i ke ano maikai imua o kou kaikunane uuku, no ka mea ina he keiki aloha, hoolohe oe, alaila e hoohalike oia me oe; a i keia wa i hiki ole iaia ke heluhelu, he pono ia oe ke ao aku iaia he mau pauku, a he mau himeni, a e hai aku iaia na moolelo maikai mai loko o ka Baibala."
                Pane koke o Elene, "Ae, e mama, he hiki no ia'u ke hana pela; a ina e oluolu oe e hai mai ia'u ano he wahi pauku maikai, na'u no e ao aku ia Wile."
                "Pehea keia pauku, e Elene? e na keiki liilii, e aloha kekahi i kekahi." wahi a ka makuahine.
                Haule koke ka maka o Elene, no ka mea ua hoomanao oia i ka wa i hoopilikia mai kona kaikunane iaia, ua huhu pinepine aku oia, a poina loa keia pauku ma ka Baibala. Aka hele aku ia e huli ia Wile, a loaa oia, noho pu laua a ao aku o Elene i kona kaikunane i ka pauku a wehewehe oia i ke ano e like me kona ike.
                Auwe o Elene! ua hoomaka pono oia i keia la, aka aole napoo ka la a hoao i kona aloha. A pau ka aina awakea hele aku oia e paani pu me Wile, a loaa oia iaia e noho ana ilalo i ka papahele e uhai ana i kekahi buke maikai ona. Kahea koke ia, "E Wile, Wile, he keiki ino loa oe; no keaha la oe i hana ino ai i ko'u buke maikai?"
                "E na keiki liilii, e aloha aku kekahi i kekahi," pela ka hawanawana ana mai o ko Elene lunaikehala iloko ona, aka aole makemake oia e hoolohe. Aka i kona ike ana i ka haaloulou o ka maka o kona makuahine, a lohe i kona olelo ana mai, "E Elene, he ano misionari anei kela?" ehaeha loa kona naau a holo oia me ka uwe nui.
                Hooluolu ka makuahine i ka uwe ana o Wile, a ao aku iaia no kona hewa i ka uhai ana i na mea o kona kaikuahine, alaila imi oia ia Elene. A mahea la i loaa aku ai iaia? E kukuli ana ma ka aoao o kona moe, e nonoi ana ia Iesu e kala mai i kona huhu, a kokua iaia e lanakila maluna o ia hewa, a hoolohe mai no o Iesu, ka mea e hoolohe mau ana i na pule o na keiki liilii, a kokua iaia; no ka mea, mai ia manawa aku, ikaika loa oia e pale aku i na olelo huhu, a lanakila no ia. Hoomau no oia i kona hana misionari, e ao ana ia Wile, a pule pu me ia, a ao oia e pule nona iho no ka mea ua ike oia he mea ole ka pule ana o na kanaka pono a pau no kakou, ina aole pule kakou no kakou iho. Ua ao o Elene ia Wile e aloha aku ia Iesu.