Ke Alaula, Volume IV, Number 3, 1 June 1869 — Page 9

KE ALAULA.
BUKE IV. HONOLULU, IUNE, 1869. HELU 3.

KA LOAA ANA IA MOSE.

                Hooholo ke alii hooluhi o Aigupita, oia o Parao, e pepehiia na keikikane a pau o kekahi hapa o kona lahui, oia hoi o ka poe Hebera.
                Oia no kekahi wa i uwe ai na kaikamahine a Rahela. Ua lohea ka leo, ma Gosena he pihe, he uwe ana, a me ke kanikau he nui; e uwe ana na kaikamahine o Rahela no ka lakou mau keiki, aole loa e na, no ka mea ua make lakou, na mea hala ole, i ka lima menemene ole o ke alii puni koko. Nui ka pilikia ma ia aina.
                Hanau ia mai he wahi keiki kane maikai na kekahi wahine haipule. Huna kona makuahine iaia ekolu mahina mai na makai a Parao. He elua mau keiki hanau mua ma keia ohana. O Miriama ka mua, he kaikamahine, nona na makahiki he umi, a he keikikane, nona na makahiki ekolu, i hanau ia mamua o ke kau ia mai o keia kanawai, o Aarona kona inoa.
                Makau loa paha keia mau keiki o lohe aku auanei o Parao i ka loaa ana ia laua he wahi pokii.
                A hala ka wa i hiki ai i na makua e huna hou aku ai i keia wahi keiki a laua, heaha ka mea i hiki ia laua e hana hou aku ai. Paulele ka makuahine i ke Akua nana e malama i kana wahi keiki. Ua ike oia he mea hiki i ke Akua e hoopakele i kana keiki, ina he mea pono ia i kona manao.
                Hele aku oia a ohi mai i kekahi mau akaakai mai ke kapa o ka muliwai o Nile, a ulana iho he wahi waa. Hapala iho oia i ua waa nei mawaho i ke kepau, i komo ole ka wai.
                Maloko o keia wahi waa hinai uuku, i waiho ai ka makuahine i kona wahi bebe. Manao au ua uwe pu lakou a pau, a honi ae i ke keiki, a waiho aku iaia iloko o kona wahi waa; uhiia paha kekahi mea maluna iho i wela ole mai ke keiki i ka la, alaila lawe ae ka makuahine iaia a waiho aku e lana ana maluna o ka wai ma kahi e ulu ana na akaakai ma kapa o ka muliwai.
                Pehea, aole anei e hele mai na kerokedila, na moo nui ai kanaka o ka Nile, a ai iho i keia wahi keiki? Aole anei e pa mai ka makani a hookahuli i keia wahi waa? Aole, no ka mea, o ke Akua hookahi no nana i hoolana i ka manao o ka makuahine, nana no e malama i ke keiki.
                I ka wa i hoi aku ai ka makuahine i ka hale, noho iho o Miriama e kiai i kahi waa iki e lana mai ana ma kapa muliwai. Emo ole iho mai la he wahine hanohano me kona mau wahine e auau ma ka muliwai. He kaikamahine alii keia, ke kaikamahine a Parao. I kona hele ae ana ma kapa o ka muliwai, ike aku oia i keia wahi waa e lana mai ana, a kena aku oia i kekahi o kona mau wahine e kii aku.
                E nana ae oukou ma ke kii maluna ae nei a ike i ka waa ua kokoke i kapa, a ua wehe ia ke poi. Uwe iho kahi keiki, a ike ke kaikamahine a Parao i ka uwe ana o ke keiki a aloha iaia. I iho la kela, o kekahi keia o na keiki o ka poe Hebera. E kiai mai ana o Miriama ma kahi kokoke, a i kona ike ana i ke aloha ia o kona wahi pokii e ke kaikamahine o Parao, ua nui paha kona olioli, a ninau mai kela, e kii paha au i mea nana e malama i ke keiki. Ae mai kela, a kii koke o Miriama i ka makuahine.
                Olelo mai ke kaikamahine o Parao iaia, e lawe oe i keia keiki a e hanai iaia no'u, a na'u no e uku aku ia oe. Nani wale ka olioli o ka naau oia makuahine. Ike oia ua ae mai ke Akua i ka leo o kona nonoi ana. Ua hoopakele ia ke ola o kana keiki, a ua hoihoiia mai no ma kona poli e noho ai a nana e hanai a nui ae. A nui iki ae ua keiki nei, ua ao aku paha oia iaia no ke Akua lokomaikai, ka mea e hoolohe mai i kona poe kanaka i ko lakou wa e kahea aku ai iaia.
                Kapa aku ke kaikamahine alii i kana keiki o Mose, no ka mea, wahi ana, "ua lawe mai au iaia mailoko mai o ka wai."
                A nui kupono ke keiki hoihoi aku oia iaia me ia e noho ai ma ka hale alii, a ao nui ia oia ma na ike a pau o ko Aigupita. Aka i kona manao ana ua koho aku oia i ka ike i ke Akua, ka ike i oi mamua o na ike e ae a pau loa.
                Ina e heluhelu oukou ma na mokuna mua o Pukaana, e ike oukou ua koho o Mose i ka ke Akua hana mamua o ka waiwai a pau o ko Aigupita, "He mea maikai ia'u ke kanawai o kou waha mamua o na tausani gula, a me ke kala," wahi a Davida.

                Aia hoi! nani ka maikai o me ka oluolu o ka noho lokahi pu ana o na hoahanau. Ua like ia me ka poni maikai ma ke poo, ka mea i kahe ilalo ma ka umiumi, ma ka umiumi hoi o Aarona, ua hiki hoi ilalo o ke kihi o kona mea kano. Ua like ia me ka hau o Heremona, ka mea i haule mai maluna o na mauna o Ziona; no ka mea, malaila no i kauoha mai ai Iehova i ka hoomaikai ia, i ke ola hoi, a hiki i ka manawa pau ole.