Ke Alaula, Volume IV, Number 7, 1 October 1869 — Page 27

KE ALAULA. 27

e wehe oe i na pihi o kou lole? Heaha la kou mea e noho wale ai ilaila." E na keiki e heluhelu nei; ua hilahila au; ua makau ia Pele, o akaaka mai oia a henehene paha ia'u ke kukuli iho au ilalo a pule aku i ke Akua. Aka ua makau hoi au i ka hiamoe wale aku me ka pule ole. Eia au iwaena o na malihini, ua kaawale mai na makua mai, o ke Akua no ka makua. Manao iho la au, ina la he keena kaawale ko'u e moe ai, a ina hoi e hiamoe koke aku o Pele, alaila he hiki ia'u e pule. Aka aole i hiamoe iki o ua o Pele, e ala mai no ia.
                Pela paha kela a me keia haipule opio i kona haalele mua ana i ka poli o ka makua, a hele aku iwaena o ka poe pule ole, loaa iaia na manao elua e paio ana maloko; o ka makau i ke kanaka, a o ka makau i ke Akua. A e like me ka hooholo paa ana o ka naau ia manawa pela mau aku no ke ano o ia kanaka ma ia hope iho. Ikaika loa ka paio ana o na manao elua iloko o'u ia manawa.
                I ke kahea hou ana mai o Pele. "E hoi mai, e hiamoe kaua," loaa ia'u ka ikaika e pane aku penei; "E kukuli mua au ilalo a e pule, no ka mea o ko'u maa no ia i na wa a pau." "E pule ka!" wahi a Pele, a huli aku oia i kona maka i ka paia a moe malie loa me ka ekemu hou ole mai ia'u. Kukuli ho'i au ilalo a pule hawanawana leo haahaa loa au. Hilahila au no kuu makau wale ana iaia, no ka mea, i kona ike ana i kuu manao e pule, ua mahalo mai oia, a ua noho malie loa iho me ka hoopilikia ole mai ia'u. Lanakila iho la au ma ka aoao o ka pono, a apono mai ko'u lunaikehala ia'u.
                E hoomanao oukou i keia, e na keiki o na haipule i aoia e na makua e pule i ke kakahiaka, a i ke ahiahi, i ka wa e haalele ai oukou i na home o na makua; mai haalele i na rula o ka haipule i aoia mai ia oukou mai ka wa liilii mai. Mai makau hoi i ka maka o ke kanaka, aka e makau ia Iehova. "O ka makau i ke kanaka, he mea ia e liiliii ai; o ka mea paulele ia Iehowa ua palekana oia." Sol. 29:25.

KA MANU KIKO LAAU.

                He manu ikaika loa keia i ka imi ana i kana ai. O ka mu ai laau kona ai. Imi oia i na laau puha e ku ana; kiko aku oia a ina he ano hakahaka oloko hoomaopopo oia i kahi o ka mu. O kona kiko no ia ma ka laau a poopoo loa iloko o ka laau, o ka loaa koke aku no ia o ka mu e pii ana maloko o ka io o ka laau; o ke komo koke aku no ia o kona elelo loloa a loaa aku i ka mu. Ke ike la kakou ma ke kii i ka nuku loloa; o kona kila no ia, a o kona wili hoi e wili ai i ka laau. Ekolu paha iniha ka loa o kona elelo e puka la mai kona nuku aku. Ma ka paa ana o ka elelo ke ike la kakou i na wahi mea ooi e hoi hope la me he maka la o ka makau lawaia. I ka puka ana o ka laau i ka manu i ke kikoia a loaa aku ia i ka mu, hou aku oia i kona elelo ooi, oolea me he kui la iloko o ka mu a komo koke mai ka mu i kona waha.
                Aole oia wale ka hana a keia manu me kona nuku kalai laau. Kalai no hoi oia he poopoo nui iloko o ka laau i punana nona. Kii aku oia i ka limu pahee i mea e nolunolu maikai ai kana punana. Maloko o keia poopoo o ka laau e hoohaule ai ka manu wahine i kana mau hua a hoomoe a hoohanau keiki.
                Na ke Akua i hoolako i keia manu i keia nuku loihi a me ke elelo ooi, i hiki iaia e imi i kana ai a e hana i punana iloko o ka laau. Kupaianaha no kona hoolako ana i na mea a pau a kona lima i hana ai. He hiki ia kakou e olelo e like me Davida "Nani ka nui o kau mau hana, e Iehowa, ma ke akamai i hana mai ai oe ia mau mea a pau."

KA MEA LANAKILA.

                I kekahi la Sabati, i ka pau ana o ka halawai ahiahi, ma kekahi wahi halepule ma Enelani, e hoi malu ana na kanaka, koe nae o Bela ka moopuna oopa o ka mea nana i malama ka halepule.
                E like me ke ano mau o na halepule o Enelani o ia wa maloko no i kanu ia na kupapau o na mea hanohano i make ma ia kulanakauhale. Ma kekahi kihi e ku ana ke kii o kekahi kanaka koa, ka mea i hele i Ierusalema e kaua aku i ka poe Sarecena. Aia ma kona aahuapoo he kea ulaula, a malalo ae ua kakau ia i na hua olelo e. Ma ka unuhi ana penei ke ano, "E ao o lanakila ka hewa maluna ou, aka, e hoolanakila i ka pono maluna o ka hewa."
                He wahi kaikamahine ano e o Bela, a i kona mahalo wale ana i ua kii la, ua nanea oia i ka nana ana i ka papalina o ua koa mabala nei, me ka noonoo nui i kana mau hana i kaulana ai, a i ke kumu o ke kau ana o ua olelo e la ma ke aahuapoo.
                I keia ahiahi eia ka poo olelo o ke kahunapule, "O ka mea lanakila, e haawi aku au i ka mane i huna ia, a e haawi no hoi au iaia i ka pohaku keokeo, a maluna iho o ua pohaku la, ua palapalaia ka inoa hou, aole mea ike ia inoa, o ka mea wale no iaia ka pohaku." Ua manao nui o ia o Bela la i ua ololo nani la, a i kana hilinai ana ma ka lima o ua kii koa la, noonoo iho la ia me ka ninau, ina ua loaa ua inoa la i kona makuahine, ka mea i hala aku i ka lani. A mahope mai kukuli iho la ia a noi aku ia Iesu e haawi mai iaia i naau hou, e kokua hoi iaia i ka hana pono ana, a e haawi mai hoi iaia ua inoa hou la. Ala mai oia me ka manao lana, me ka ninau nae," ina hoi ua maopopo ia'u kuu mea pono e hana ai." Ia sekona no lele mai kekahi kukuna malamalama e hoomaopopo lea mai ana i ke kii koa, a me na hua olelo i kau ma ka aahuapoo, a me he mea la oia no ka leo pani iaia, "E ao o lanakila ka hewa maluna ou, aka e hoolanikila ka pono maluna o ka hewa."
                A pau ka hana, kii mai kona kupunakane iaia a hoi pu laua i ka wa napoo o ke ahiahi. I ko laua hoi ana i ko laua wahi home, ninau mai la kona kupunakane iaia. "Ua lohe paha oe i ka pilikia ana o Jane Lee i ka wai?" "Aole no au i lohe," wahi a Bela.
                Huli koke ae ko Bela noonoo ana, no ka mea o ua Jane nei ka mea i hana ino iaia. Nana no i hooke iaia a haule ino ma ke alapii o ka hale, a nolaila mai kona oopa ana. No ia mea ua nui ko Bela inaina ia Jane.
                I keia po i ko Bela lohe ana i ko Jane pilikia ana pii mua mai ka manao olioli; aka i kona noono hou ana aku i ko Jane noho ilihune ana, aole hoi ona mau makua, pii mai ke aloha ma kona naau. Ninau iho la oia iaia iho "E hele paha au e ike iaia?" Pii mai nae ka inaina no kona eha, no kona noho oopa ana. Aka pae mai la ka leo liilii iloko o kona naau. E ao o lanakila ka hewa maluna ou, aka e hoolanakila i ka pono maluna o ka hewa."

                He nui no ka hakaka ana o ka hewa me ka pono iloko o kona naau. He mea paakiki loa no ko hoopau i ka manao huhu, a hele me ke aloha e ike ia Jane, ka mea i hooeha iaia. Aka ua kokua Iesu iaia, a ua hooholo no ia e hele e ike ia Jane ma ka la apopo.

                I kakahiaka ae hele aku la ia ike i ka mea mai. Ua kahaha no o Jane i ka ike ana iaia, a mahope noi aku ia Bela e heluhelu ma ka Baibala. Pau ka heluhelu ana, pane mai la o Jane, "Ke manaoio nei au i ka oiaio o ka Baibala ina e hiki iaia ke hoohuli i ka manao kue a lilo i aloha, oiai ua hana ino aku au ia oe."
                I ko Bela hoi ana, ae mai la ia e hele pinepine mai e ike iaia. A pela no kona hana mau ana i kela la keia la a maha ae ko Jane mai. Aole hoi oia wale no, aka ua hoohuli ia ko Jane naau mamuli o ka pono a Iesu Kristo, a ua piha kona naau i ke aloha iaia, ka mea i kokua nui iaia.
                Mahope mai lilo ae o Jane i wahine makua, a i misionari nohoi i ka poe pegana. Ka hua ia o ka lanakila ana o ka pono maluna o ka hewa.
                E na pokii, owai la o kakou e loaa ana i na pohaku keokeo la, me ka inoa hou i kakau ia maluna?

HE UMI-KUMAMALIMA BIPI I ALEIA.

                "Kahaha!" wahi a kekahi, "nani ka wahahee o ua olelo la." Alia iki, a e hoike aku au i ke ano o ka hana. He wahi kahu bipi e noho ana ma Amerika, ua lako i ka aina, ka hale, a me na bipi waiu he umi-kumamalima. Ma ke kuai ana i ka waiu o ua mau bipi la i ola ai ua wahi kahu bipi nei. Ua ono nae ia i ka rama, a me ka barani, a me ke gini. A no ka lilo loa mamuli o ua hana uhauha la, aole liuliu ua pau na bipi i ke kuaiia, i loaa ka wai ona e inu ai. Aia no ia ma ka hale o ka poe ilihune loa (alms-house); ua nele loa. Ka hope no ia o ka ona rama. Nolaila, e waiho aku i ka rama a me na mea ona apau.
                Me ke aloha no, e na pokii heluhelu ALAULA. Na ko oukou makamaka, L. L. N.

HE MAU OLELO HOONAAUAO.

                O ke kauwa maikai, e lilo auanei ia i haku maikai.
                O ka lawelawe hana, oia ka mea e mau ai ke kino.
                Ina o ka lealea ke kumupaa, o ka mai ehaeha auanei ka uku hoopanee.
                O ka hana, oia ka hua o ka laau; o ka olelo waha, he lau wale no ia.
                O ka aie, o ke keu loa ia o ka ilihune.
                Kali ole ke au o ka manawa no ke kanaka.
                O ka ike e ka mana no ia.