Ke Alaula, Volume IV, Number 11, 1 February 1870 — Page 41

KE ALAULA.
BUKE IV. HONOLULU, FEBERUARI, 1870. HELU 11.

KA OWILI ANA I KA POKAA LOPI.

                Ua haule mau mai ka ua i kekahi mau la, a ua hoopaaia o Paulo maloko o ka hale. Hiki ole iaia ke holo aku iwaho e paani ai, aole hoi he paani nui maloko o ka hale.
                I ke hoala ana o kona kupunawahine iaia i kekahi kakahiaka, ike oia ua malie loa, ua pau na ao ua; a ua puka mai ka la me kona mau kukuna mehana. Manao iho la kahi Paulo e nui ana kona olioli i keia la i ka paani me na keiki. Aka he wahi keiki hoomanao keia i ka Makua nona mai na pono a pau. Kukuli iho oia a pule aku i ke Akua e malama mai iaia, e hoolilo iaia i keiki nona, a e kokua hoi iaia e hoolohe pono i kona kupunawahine, ka mea i malama aloha mai i keia wahi keiki makua ole.
                Pau ka aina kakahiaka holo aku ia i ke kula, a hooikaika i ka hoopaanaau i na haawina, me ka huli i na ninau paakiki o kona mau haawina. Aka, nana pinepine aku kela ma ka puka me ka iini e hiki mai ka manawa hoomaha o ke awakea e hiki ai ke paani me na hoa.
                A hoomahaia ke kula, holo aku oia i kona home me na keiki liilii elua, e kii ana ia Kalo, kahi ilio a lakou. Lohe ke kupunawahine i kona komo ana mai, a ka hea mai, "E Paulo, e Paulo."
                Hele aku o Paulo io na la, a eia ka he owili lopi nui kana i kau mai maluna a na lima o ua o Paulo e hoopaa, a owiliwili ae kela i popo lopi.
                Aloha ino o Paulo! Pehea kahi paani ana? Ke ike la oukou iaia ma ke kii maluna ae nei e paa ana i ka lopi, a e kiai mai ana kahi ilio. Aia na keiki elua e pee ana mawaho mai o ka ipuka. Hawanawana leo nui mai laua ia Paulo, e noi aku oe i kahi luahine e hookuu mai ia oe e hele e paani.
                Ua paio ikaika na manao elua iloko o Paulo, aka, pane ae kela, o ka hana a kuu kupunawahine mua, a pau ia, alaila e paani. Hoomanawanui oia a pau pono kahi hana i haawiia mai. Hoomanao oia i na hana aloha mai o kona kupunawahine maikai.
                Ua piha kona naau i ke aloha a me ka hoolohe i kona makuahine, ua like ia me ke ala o ka pua rose e hoopiha ana i kona naau, nolaila ua oluolu a pomaikai kona noho pu ana me ke kupunawahine.

KEKAHI MAU ANO KOKUA.

                He wahi keikikane liilii, makena wale kana mau keneta, a waiho i kekahi maloko o ka pahu dala kokua no ka aina e, a e akaaka wale ana no oia ia manawa. Aole ona manao e pili ana ia Iesu, i na pegana, a me na misionari, maloko o kona naau. O kana he keneta tini, no ka mea ua mama loa e like me ka apana tini.
                O kekahi keikikane ua hookomo oia i kana keneta. Ia manawa nana oia mao a maanei me ke ano hookano, me he mea la ua haawi oia i kekahi mea nui loa. O kana he keneta keleawe. Aole keia he makana no loko o ka "naau haahaa," aka no loko o ka naau hookano.
                A o ke kolu o na keikikane haawi oia i kana keneta me ka olelo iaia iho, "E haawi paha wau, no ka mea ke haawi nei ka poe e ae a pau." O kana he keneta hao, no ka mea he makana ia no loko o ka naau paakiki a aloha ole.
                I ka hookomo ana o ka ha o na keikikane i kana keneta ua haule kekahi waimaka, a olelo kona naau, "Aloha ino na pegana ilihune, ua menemene au ia lakou, no ka mea ua ilihune loa, a naaupo, a poino." O kana he keneta dala, no ka mea o keia he makana no loko o ka naau piha i ka menemene.
                Aka, ilaila kekahi haumana ua haawi i kana keneta me ka naau palupalu, a e olelo ana maloko, "No kou pono, e Iesu aloha, ke haawi nei au i keia keneta, me ka pule ana e lilo na pegana i poe kanaka no ke Akua, a i poe haumana nau." O keia he keneta gula, no ka mea he makana aloha.
                Ehia o ka poe heluhelu i keia nupepa i haawi i na keneta gula?
                Mai hooohalike oukou, na kane, na wahine, na keikikane, me na keiki haawi i na keneta tini, keleawe, hao, a me ke keneta dala, aka e haawi oukou i na keneta gula, i loaa ia oukou kela aina pomaikai ma kela kapa o Ioredane. F. M.