Ke Alaula, Volume IV, Number 11, 1 February 1870 — Page 44
44 KE ALAULA.
NEE HOU MAI.
Leo: COME AGAIN.--Fresh Laurels.
1. E-ia hou ka la mai-kai; Nee hou mai, nee hou mai; Maa-nei no e ao-ia 'i, E nee, nee hou mai; Maa-nei e hoo-ki-pa ia'i Me na ho-a ma-ka-mae, Na la-kou e ao mai-kai; E nee, nee hou mai. E-ia hou ka la mai-kai; Nee hou mai, nee hou mai; Maa-nei no e ao-ia 'i, E nee, nee hou mai.
2: Ina no he mihi kou,
Nee hou mai, nee hou mai,
Me ke ake e mele pu.
E nee, nee hou mai;
Eia makou ke pii nei
I Kanaana maluna'e,
Hele mai a pii pii ae.
E nee, nee hou mai.
Ina no he mihi kou, &c.
3. Eia no na hua maikai,
Nee hou mai, nee hou mai,
Ka Baibala makamae,
E nee, nee hou mai;
Eha Iesu a luuluu,
Make ma ke kea nou,
Huli oe nona mau,
E nee, nee hou mai,
Eia no na hua mai, &c.
4. Ma na Sabati a pau
Nee hou mai, nee hou mai;
Mai haalele, hele mau,
E nee, nee hou mai;
Hana maikai, awiwi,
Ke pau nei na hora nei,
Huli mai o make e,
E nee, nee hou mai.
Ma na Sabati a pau, &c.
NA ELELO WELEWEKA.
I kuu wa kamalii, hele pu au me kekahi o kuu mau hoa paani maloko o kekahi ululaau, a i ka molehulehu mai ana o ke ahiahi hoaa makou i ka maopopo ole o ke alanui e hoi aku ai i ka home. Puka aku makou ma kahi oneanea, a loaa kekahi kanaka e hele ae ana. Holo aku makou e ninau i kahi e hoi aku ai a loaa ka hale. Pane huhu mai kela ia makou me ka pakike mai, a hai ole mai i ka makou i noi aku ai iaia. Ia manawa hoea koke mai kekahi hoalauna o makou me ka maka oluolu, a pane aku oia i ke kanaka mua, " E Kimo, ua like ke elelo o ke kanaka me ke elelo o ke owao; he kalakala e like me ka pepa okalakala e anai iho ai, a i ole ia, e like paha me ka pahee o ka weleweka, e like me ka manao o ka mea e hoopuka manao ana. Me he la o ka pepa kalakala kau i hoohalike aku ai i kou elelo. E hoao paha oe i ke ano elelo weleweka."
Olelo mai o Solomona, "O ka olelo akahai, oia ke pale ae i ka huhu; o ka olelo huhu hoi oia ke hoala ae i ka inaina. O ke elelo o ka poe akamai, hoike pololei aku ia i ka ike; o ka waha hoi o ka poe lapuwale, hu ae la ia i ka lapuwale."
NINAU BAIBALA NO NA POKII KULA SABATI.--Helu 2.
Ua hoomakaia kela a me keia o na hua Haina me ka L.
1. Owai ka i pili koko i kekahi ohana ma Palesetina, aole nae oia i hele kino aku ilaila?
2. O ka pua hea la o ke kula ka i hooliloia i kumu e ao ia kakou e manaoio?
3. Owai la ka i hoopoino nui ia no kona koho ana i wahi ino e noho ai me kona ohana?
4. Ma ka inoa hea la i kapaia aku ke kerokodile, e Davida, ma ka Halelu?
5. Owai ka i noho he luna auhau mamua o ka looa ana iaia ka oihana luna olelo?
E imi mua na kumu a me na haumana a koho mai i na haina no keia mau ninau, a ma ke ALAULA o ka malama o Malaki e hoike aku makou i na haina o keia mau ninau.
KE KEIKI UUKU I NALOWALE MA KA ULULAAU.
Ma kekahi okana o ka moku aina o Nu Yoka noho kekahi ohana ma kapa o kekahi ululaau nui. He wahi keiki uuku ma ia ohana nona na makahiki ekolu. I kona paani ana haalele mai oia i ka hale, a komo aku iloko o ka ululaau, a nalowale loa aku iloko. A ike na makua ua nalowale ke keiki, hoomaka koke lakou e imi. He nui na holoholona hihiu ma ia ululaau. He mau la wale no i kaa ai i hope, ua hopuia he bea eleele ma ia ululaau no, e kokoke ana no i keia hale. Ua houluulu koke ia he hookahi paha haneri a me kanalima kanaka makua a me na kamalii e huli i ua keiki uuku nei. Napoo koke ka la, a me na lamalama a me na kukui ka lakou huli ana maloko o ka ululaau. Hoonohonoho ka makuakane ia lakou, me ka paipai nui ia lakou e huli ikaika a loaa,—e huli ma na kumu laau a ma na aoao o na pohaku. Kahea leo nui ka makuakane, "E Ake, e Ake e!" Huli wale ia ka ululaau a ao ia po, aole nae i loaa.
I ke kakahiaka hoomaka hou ia aku ka huli ana. Ia la elua paha haneri kanaka i hui e huli i kahi keiki auwana. Ma ka huli ana ua loaa na meheu hou o ka bea, a ma ia wahi kokoke no ua ikeia na meheu wawae o kahi keiki. Manao kekahi ua pau kahi keiki i ka aiia e ka bea. A hiki i ka aina awakea, olelo kekahi poe ua makehewa ke huli hou aku, aole no e loaa ana ke keiki. Olelo nae kekahi poe, aole loa lakou e haalele i ka huli ana a loaa ke keiki.
E noho ana ka makuahine me ke kumakena a me ka hiamoe ole—e uwe ana, a e pule ana i ke Akua e hoihoi mai i kana mea i aloha ai. I ka hora eha o ka auina la ua hele kekahi kanaka a ekolu mile mai ka hale aku maloko o keia ululaau lipolipo, a ma ka wawae o kekahi pali nui lohe oia i ka leo himeni o kekahi mea. Hahai aku oia i kahi i pae mai ai ka leo, a loaa iaia kahi keiki nalowale e auwana hele aku ana iwaena o ka ululaau. Ua haule na kamaa, ua nahaehae loa na kakini, koe oluna wale no e pili
ana i ka puupuu wawae. Ua eha kona mau wahi wawae a pehu ae, ua moku ka ili o kona mau lima a me luna o na wawae i na laau oioi o ka nahele, a ua kahe ke koko.
E like me na wahi keiki kuaaina o kakou la, pela kela wahi keiki--he makau wale i ka malihini. I ka ike mai i ke kanaka holo kahi keiki, me ka uwe. Loaa koke aku nae i ke kanaka, a hoomalielie koke ia no me ka olelo aku o ke kanaka, ina ole e uwe, e hoihoi aku oia iaia i kona home a i kona papa.
Kahea leo nui ua kanaka nei. "Ua loaa ua loaa!" A lohe aku na hoa imi, kahea ae kekahi ua loaa, a pela ae kekahi o ka poe i hoonoho papa ia iloko o ka ululaau, a hiki aku ka lohe i ka makuakane. Manao oia e hooho hauoli ae, aka ua paa kona leo, a kulu wale kona waimaka.
A lohe ka makuahine ua loaa kana keiki, olelo kela, "E hoomaikaiia ke Akua." He nui ka poe o ia lehulehu i uwe waimaka i ko lakou lohe ana ia hua olelo, "Ua loaa." E nana ma Luka 15:4.
He hipa auwana wau,
Aloha ole ae
I kuu makua, haalele no
I kona pa maikai,
He kamalii lalau,
Hookuli, a kue,
Ka leo o ke kahu o'u,
A hele i o ia nei.
Huli ke kahu ia'u,
Me kona aloha mau,
Ma na awawa, ma na puu,
Na waoakua no,
Loaa iaia la wau,
Pololi, makewai,
Ua nele, eha, maule no,
A ane make ae
Iesu kuu kahu mau,
Aloha io mai,
Hoomaemae kona koko ia'u,
Hoola a maikai,
Na ia la i kii mai,
Ka hipa auwana nei,
E hoi i kona kihapai,
O-i-a-la kuu kiai.
HE MAU PULE POKOLE.
E ka Makua, ua hana hewa aku wau i ka lani a ia oe.—Luka 15:21.
E ke Akua, e aloha mai oe ia'u, i ka mea i hewa.--Luka 18:13.
E ka Haku, e hoola mai ia makou, o make makou.—Mat. 8:25.
E ka Haku, heaha kou makemake e hana aku ai au?—Oih. 9:6.
Mai noho a haalele mai ia'u, e Iehova,
E kuu Akua, mai noho a mamao aku ia'u.
E wiki mai i ke kokua ia'u,
E kuu Moi kuu mea e ola'i.--Hal. 38:21, 22.
KE ALAULA,
He Nupepa Hoikeike Kii,
Hoopuka mau ia ma Honolulu, i kela malama keia malama e ka PAPA HAWAII, no na Kamalii Hawaii.
25 keneta ka uku no ka makahiki no ka pepa hookahi; 20 keneta pakahi ka uku no na pepa he iwakalua a oi aku paha ma ke ope hookahi, ME KA HOOKAA MUA IA MAI.
O. H. KULIKA, Luna Hoopuka.