Ke Alaula, Volume V, Number 2, 1 May 1870 — Page 6

6 KE ALAULA.

 

HANAIIA O ELIA E NA MANU KORAKA.

            Ina oukou e nana i ka moolelo no, Elia ma

Na Lii I., Mokuua 17, pauku 1-6, e ike oukou ua kauohaia oia e Iehova e wanana aku ia Ahaba, kela alii hewa, e hoopai ana o Iehova i kona hewa, a me ka hewa o ka lahui Iseraela, i na makahiki ua ole ekolu maluna o ko lakou aina. A i mea e pakele ai o Elia i ka huhu o Ahaba, kauoha aku la o Iehova iaia e huna iaia iho ma ka nahelehele a hala ia pilikia. Hana iho la o Elia e like me ke kauoha a Iehova, a iaia e noho mehameha ana ma ka waonahele, hoouna mau aku la o Iehova i na manu koraka e hanai iaia i kela la keia la. I ke kakahiaka a i ke ahiahi o kela me keia la, laweia mai ka berena a me ka ia e na manu koraka, a waihoia imua o Elia.

            Ina e malama pono oukou i na kauoha a Iehova, e malama mai no oia ia oukou.

 

KA AHAAINA A KE ALII.

            Hana iho la kekahi alii he ahaaina mare no kana keiki kane, a kono aku la i kekahi poe kanaka e hele i ua ahaaina la. I ka wa i ane makaukau ai, hoouna aku la oia i kana poe kauwa e kahea ia lakou, a e hai aku ua moa na mea ai, a e hele mai lakou i ka ahaaina. Aole nae i hele mai lakou. Nolaila, hoouna hou aku la oia. Aka, oia like no; aole lakou i hele mai. He kanaka hanai holoholona kekahi. I mai la ia, "Ka, aole hiki ia'u ke hele; he pono ia'u e hele aku e nana i ko'u mau hipa, a me ko'u mau pipi wahine." He kanaka kalepa kekahi. I mai la ia, "Aole o'u manawa e hele ai; he pono ia'u e hele e kuai aku i ko'u mau waiwai kalepa." Aole lakou i manao i ka hanohano nui o ka ai pu ana me ke alii ma kona hale alii. Hana ino kekahi poe i na kauwa a ke alii, a pepehi aku la ia lakou. Huhu loa ke alii i kona lohe ana ikeia hana ino a lakou. Nolaila, hoouna aku la oia he puali koa, e pepehi i kela poe pepehikanaka, a e puhi i ko lakou kauhale i ke ahi. A no ka hiki ole mai o ka poe i kono mua ia, i aku la ke alii i kana poe kauwo, " Ua makaukau ka ahaaina mare, aka, o ka poe a'u i kono aku ai, aohe kupono; nolaila e hele aku oukou ma na alanui a ma na kuamoo, a e noi aku i ka poe a pau i loaa ia oukou, e hele mai i ka ahaaina mare."

            Hele aku la hoi lakou ma na alanui, a noi aku i ka poe a pau i loaa ia lakou, e hele mai i ka ahaaina mare. Pehea la ? Kahaha paha na kanaka no keia mea ? Aia hoi kekahi kanaka ilihune, makilo, a na kauwa i olelo aku ai, "Ke kono mai nei ke alii ia oe e ai ma kona hale alii." E i mai paha auanei ua kanaka ilihune nei, " Ke hoohenehene mai nei anei oe ia'u? E komo anei au i ka hale o ke alii? Aole au i kupono. Ua lepo ko'u mau aahu, a weluwelu no hoi." A i hou mai la na kauwa iaia, "He oiaio ka makou e olelo aku nei; he oiaio loa no. Ina i makemake, oe, e hele no, a i kou wa e hiki ai ma ka hale alii, e haawi mai no ke alii ia oe i na mea a pau au e makemake ai i kupono ai kou noho ana ma kona papaaina." Me he la ke lohe nei au i ke kanaka ilihune makilo i kona olelo ana iloko ona iho, " Pela io paha. Ua maopopo no ia'u, ke makemake nei no au i ka ai maikai. Ua pololi au. E hele au e nana ina paha he oiaio keia." Alaila, hele aku la ia me ke ano hopohopo, a i kona hiki ana i na anuunuu nani e pii aku ai a hiki i ka puka komo, ike aku la ia i na koa e ku ana mawaho iho o ka puka, a manao iho la e hoi hou. Na ka pololi nae i koi iaia e hoao i ke komo ana, a i kona hiki ana ma ka ipuka ponoia hai mai la na koa, " He pono ia oe ke komo iloko.". A kuhikuhiia mai la iaia ke keena auau, kahi e hoomaemae ai, a haawiia mai iaia he aahu keokeo, manao iho la ia ua hiki iaia ke noho iho ma ka papaaina. Pela hoi ka poe a pau i hele mai a loaa i keia makaukau mua, komo aku la lakou i ke keena aina a noho iho la ma ka papaaina. Koe wale no kekahi kanaka i lawe ole i ka aahu keokeo. Aole i maopopo ia'u ke kumu o kona lawe ole ana. Me he la, ua manao paha oia ua kupono kona aahu ponoi. Heaha la hoi ke kumu o kona hana ana pela, aka ua komo aku no oia me ka loaa ole i ka aahu keokeo. Ia manawa no, komo mai la ke alii, ike koke aku la ia i keia kanaka, ninau aku la. "No ke aha la oe i komo mai nei me ka aahu mare ole?" Pehea la e ekemu aku ai o ua kanaka nei ? Ua ike no ia he pono iaia ke hookomo i ke kapa mare. Ua ike no ia e loaa wale mai ua aahu nei ma kona noi ana. Aole hiki iaia ke ekemu aku. Alaila, kauoha aku la ke alii i kana poe kauwa, " E lawe i keia kanaka, a e nakinaki i kona mau lima a me kona mou wawae, a e kiola aku iaia iwaho." Hana iho lakou pela, a kiolaia'ku ua kanaka la iwaho i ka pouli. Iaia e waiho paa ana malaila, lohe aka la oia i na mele maikai a ka poe o loko, a ike aku la no hoi i ka malamalama e hulali mai ana ma na puka aniani, a oia nei nae, eia no mawaho. Ua paniia ka puka. Aole hiki iaia ke komo iloko, no ka mea aole ona aahu mare.

            Ina o oe, a owau, e ka pokii aloha, e imi ana e komo i ka lani me ka loaa ole i keia aahu mare, alaila, o kaua pu auanei-kekahi ke lawe ia'ku a kiolaia iwaho i ka pouli weliweli o ka po, kahi a na uhane ino e noho ai. Ke makemake nei anei oe e noho aku ma ka ahaaina mare o ke Keikihipa ? Alaila he pono ia oe e noi aku i ka Uhane Hemolele e holoi i kou uhane a maemae i ke koko makamae o Iesu, a e hoaahu mai ia oe i ka aahu keokeo o kona hemolele.

 

NA ANUUNUU EKOLU.

            I keia malama i hala iho nei ua kamailio kakou no ka waiwai o ko ke Akua aloha. I keia manawa e kamailio kakou no ka anuunuu mua, oia hoi,

 

KA MIHI IO.

            I ko Petero kamailio ana me na Iudaio, na mea i pepehi ia Iesu, ua walania ko lakou mau naau no ka nui o ko lakou hewa, a ninau lakou penei, "Heaha ka makou e hana'i ? " Alaila pane aku la o Petero ia lakou, "E mihi, a e bapetizoia oukou a pou iloko o ka inoa o Iesu Kristo, i kalaia mai na hala, a e loaa ia oukou ka haawina o ka Uhane Hemolele." O ka mihi ka mea mua i haiia ia lakou e hana. Pela no i keia wa e na hoa, o ka mihi ka mea mua e pono ai.

            Ke ninau mai nei nae o Geoki, "Heaha ka mihi oiaio?" Eia no: o ka mea mihi, ua ike oia i ka hewa o kana mau hana a pau ; ua kaumaha ia, no ka mea, ua hewa ia imua o ke Akua.

Penei paha e maopopo ai. Ina kolohe o Bila, a kue i kona makuakane, oiai aole i mihi, ua piha kona naau i ka huhu i kona makuakane ke paipai mai oia iaia no kona hewa. Aole ona aloha i kona makua. Aka ina ike o Bila i kona hewa a hele ia i kona makua me ka olelo, "E kuu makua, ua hewa au, ua kolohe; aka ke mihi nei au imua ou, a kme makemake nei au ia oe e kala mai i kuu hewa." A kala aku ka makua iaia me ke aloha, hoi aku ke keiki me ka olioli, a pau ke kue ana. He mihi oiaio ia.

            Pela no kakou ke ike kakou i ko kakou ano hewa imua o ke Akua, he pono ia kakou e hai aku i ko kakou hewa imua ona, me ke no aku iaia e kala mai i ko kakoa hewa ma o Iesu la, ka mea i make no kakou.

            Ina hoi he oiaio ka mihi ana, e haalele kakou i ka hana hewa ana. Na ke Akua no e kokua ia kakou, ina e noi aku kakou iaia me ka manaoio, e haalele i na hewa a pau, a e hoolohe aku iaia, me ka malama pono i kona makemake. I keia malama aku e hoomaopopo aku au ia oukou i ke ano o ka manaoio.

UA ALEIA NA BIPI OKOA HE UMIKUMAMALIMA E KE KANAKA HOOKAHI.

            Hai mai la kekahi ia'u "Ua ike iho nei au i kekahi kanaka nana i ale i na bipi okoa he umikumamalima." Ninau aku la au, "Pehea la ia?" Pane mai la oia, "Penei. I kuu wa i ike mua ai iaia, he kanaka kuonoono oia. He wahi home maikai kona, a me na bipi he umikumamalima. A mahope mai, hoomaka iho la ia e inu i na wai ona. Aole i liuliu, lilo kekahi bipi i ke kuaiia no kona aie. He manawa iki no, lilo ka lua o na bipi. A pela aku ke kolu, ka ha, a pau loa na bipi he umikumamalima i ke kuaiia i mea e loaa ai ke dala e kuai ai i na wai ona. Aole oia wale no. Lilo pu me kahi hale, a i keia manawa, ke noho kuewa wale nei oia me ka ilihune." Hoomanao ae la au i ka olelo a Solomona, "He mea henehene ka waina."

ANO KA MANAWA!

            Aohe manawa e ae e like me keia la. O ka la i nehinei, ua hala ia. O ka la apopo, aia i ke Akua ia, aole ia oe. Nolaila, o kau e hana'i, e hana ano, i keia la no. Mai hoopahee, o nele loa. Pehea hoi kou uhane ?