Ke Alaula, Volume V, Number 3, 1 June 1870 — Page 10

10 KE ALAULA.

 

KE KIPAKUIA'NA IWAHO O EDENA.

            O Adamu keia, laua o Eva, i ko laua wa i kipakuia'i mai Edena aku, no ko laua hewa. A aia paha ka anela me ka pahi wakawaka nana i pani aku i ke ala i ole laua e hoi mai. Heaha hoi ko laua hewa ? Ke pane mai nei paha kekahi, "O ko laua ai ana i ka hua o ka laau i papa ia." Ae, o ka hookuli ko laua hewa. Aole laua i hoolohe i ke Kanawai a ke Akua i kau ai maluna o laua.

            Nawai hoi i hoowalewale ia laua? Na Satana. Ina ua hoole loa aku o Eva i na olelo hoowalewale a ka nahesa, ina paha aole i haule laua iloko o ka hewa. Nolaila ea, o ke kumu mua o ko laua pilikia ana, oia no ka pepeiao. Hoolohe aku la o Eva i na olelo a ka nahesa. A o ka lua o na kumu i pilikia ai, oia no ka maka. Nana aku la oia i ka hua he maikai. A o ke kolu o na kumu i hewa ai, oia no na lima.

Hoolohe aku la ka pepeiao, nana aku la na maka, o ka lalau aku no ia o ka lima. Mai pakele no hoi paha laua ia manawa ina ua hoomanao koke o Eva, a kiola koke aku i ua hua nei. Aka, eia ka ha o na kumu i pilikia ai laua, oia hoi ka waha. Na ka lima no i lawe a i ka waha, na ka waha i ai, hewa iho la. O Eva hookahi wale no nae keia. Mai pakele o Adamu, aole no e komo pu iloko o ua hewa nei. Eia nae ka lima o na kumu i pilikia pu ai laua, oia hoi ke alelo. Olelo aku la o Eva ia Adamu, a ai iho lo oia, hewa ae la laua e ua.

            E na pokii, e malama loa oukou i keia mau mea elima, ka pepeiao, ka maka, ka lima, ka waha, ke alelo. O lakou nei na puka komo o ka hale uhane o ke kanaka. Ina e ae ia na mea maikai wale no e komo, pomaikai oukou. Aka, ina e komo ana o Satana ma keia mau puka, e powa ia auanei na uhane o oukou.

 

HE PALAPALA MAI KALEPONIA MAI.,

            E KE ALAULA--Aloha oe:- E oluolu paha oe e lohe hou i kekahi o na mea a'u i ike ai ma keia aina puni ole o Amerika, e kokoke ana ia Hawaii.

 

Ke Kula Sabati o Rev. E. Corwin.

            I nehinei lohe au i ka haiolelo ana o Rev. E. Kowinu, o ka ekalesia ma alanui Omaomao, ma keia kulanakauhale; oia ke kahunapule wawae muumuu i noho loihi me kakou, ma ka oihana kahu no ka ekalesia o Kaukeano ma Honolulu, Ua emi iho ka nui o kona luakini maanei malalo iho o Kaukeano, aole hoi i piha loa i ko'u nana ana i ka halawai nui o kakahiaka. Aka, i ka pau ana o ka haiolelo ana, a hoi aku ka nui o na makua, komo nui mai na keiki i ke kula Sabati, a piha ka hale. Ua 350 paha ka nui o na keiki. O ka'u mea makemake loa keia o ka ike i na kula Sabati, me ke kokua pu hoi ia hana. Nolaila noho aku au i ke kula Sabati, a lilo ia'u ke ao ana i kekahi papa keikikane. Olioli kuu pepeiao i ko lakou himeni ana i na leo kula Sabati a'u i lohe pinepine ai ma na kula Sabati o kakou. Eia kekahi o ia mau leo a lakou i himeni ai: " Nani ke ao ; " " Mai paupauaho oe;" a, "He aina maikai." Ma na ano nui, ua like ka lakou me ka kakou mau kula Sabati. Kaawale na pokii ma ko lakou keena okoa, a o na papa o na keiki i ike i ka heluhelu, ma ke keena nui o ka luakini. Eia ka mea hou a'u i ike ai. I ka wa i hui ai ke kula a pau, i ka hoomaka ana a i ka hookuu ana, ua pualu pu na keiki o ke kula holookoa me ke kahu o ke kula i ka Pule a ka Haku, a pau ia, heluhelu aku ke kahu i kekahi pauku, alaila pualu pu mai na haumana i kekahi pauku hou aku, a heluhelu hou aku ke kahu, a pualu mai na haumana i kekahi pauku; pela e hana kike ai a pau kekahi mau pauku.

 

Kula Sabati no na Pake.

            Eia kekahi hana maikai i hapaiia ma keia kulanakauhale e ka poe haipule—oia ke ao ana i na Pake ma na kula Sabati kaawale. Na kekahi mau ekalesia i hapai i keia hana. Aole i hui keia me ka lakou kula Sabati no ka lakou mau keiki ponoi iho, aka he hora okoa. I kekahi wa kaawale o ka la Sabati ua konoia na Pake e hele mai. Ma ia kula ana, o na Pake wale no na haumana, a o na hoahanau kane me na hoahanau wahine na kumu. Ua hoonoho pakahi ia ka haumana hookahi me ke kumu hookahi. Ua aoia na Pake ma keia mau kula Sabati e heluhelu i ka ke Akua olelo ma ka olelo Beretania, a ua ao ia hoi i ka himeni i na leo mele a kakou, e hoolahaia nei ma ke ALAULA. He 150 Pake ma kekahi kula Sabati, a emi mai hoi ma kekahi.

 

He Huikau na Lahui maanei.

            O ke gula i hu ae ma Kaleponia nei, oia ka mageneta i ume mai i kekahi no kela a me keia lahui o ka honua, a eia lakou ma na alanui o Kapalakiko nei. Maanei e loaa aku ai ia oe he kanaka kupa o ka aina hanauna alii ole o Amerika Huipuia ; ka Beretania mai ka aina i noho alii ia e ka Moiwahine o Victoria ; o ka Farani no ka aina namu e ; o ke Geremania no ka aina olelo e; o ke Suedena no ka aina anu o Europa; o ka Italia no ka aina o ke kulanakauhale kaulana o Roma, kahi e noho nei ke poo o kela aoa hoomana ia Maria; o ka Mekiko, kahi aina kaua mau, kaua kuloko, no Sepania mai kona olelo; o ko Aferika, o Hama kona kupunakane, ua kupa nae i keia manawa ma Amerika nei; o ka Ilikini, ke keiki kupa nona ponoi keia aina; o ka Pake hoi no ka aina o Sinima,oia o Kina, me kona lauoho loloa a me na kamaa manoanoa o lalo. Eia hoi mawaena o keia lehulehu kekahi poe kanaka Hawaii, no ka aina mauna kiekie a me na pali hauliuli. I kekahi la, loaa ia'u ma ka hale paina, elima kanaka Hawaii. I kuu lohe ana i ka lakou kamailio ana ma ka olelo' o kuu aina hanau, ua hoopili koke aku au ia lakou, a paina pu makou. O Hawaii imi loa keia. No Honolulu elua, no Lahaina hookahi, no Kona, Hawaii, hookahi, a no Kauhi hookahi. Ua hoohihi loa lakou i ka makuahine hanai opio o lakou, oia o Kaleponia.

            Ma keia kulanakauhale ke hui nei na mamo a Sema, Hama a me Iapeta, a ke ao like nei lakou i ka olelo Beretania. Me ke aloha,

O. H. KULIKA.

  Kapalakiko. Kaleponia, Aperila 25, 1870.

 

ALAILA—AHA?

            Halawai pu kekahi kahunapule kaulana me kekahi kanaka opio ma ke alanui. Ua kamaaina hoi laua kekahi i kekahi. Lulu lima no hoi laua me ke aloha, a pau ia, hoomaka iho la kahi opio, me ka maka hoihoi, e hai aku i kona nu hou i ua kahunapule nei. "E ka makua aloha e, e hauoli pu mai oe me a'u i keia la, no ka mea, akahi no a loaa ia'u ka pomaikai nui a'u i imi ai me ka hoomanawanui iloko o na makahiki i kaahope ae nei! Ua puka pono mai wau noloko mai o ke kulanui, a ua ae mai ko'u mau makua e hele au i ke kula loio. O ka iini no ia o kuu naau. E hooikaika loa ana wau ma ke kula loio, i loaa mai na ike a me na makaukau a pau loa o ia oihana."

            Pela aku a nui wa!e kana kamailio ana. Hoolohe aku la no hoi ke kahunapule, a pau. Alaila,

ninau aku la oia i ua wahi opio nei, "A pau keia mau mea i ka loaa, a puka aku oe mai ke kula loio aku, alaila—aha ? "

            " Kainoa hoi, alaila e loaa mai i ka palapala hookohu loio, a e ku ana wau e loio aku imua o na aha hookolokolo."

            "Ae," wahi a ke kahunapule, "alaila-aha ? "

            "Alaila," wahi a ka opio, "e kiiia mai paha au i loio ma kekahi mau hoopii koikoi, paakiki, a e ike na kanaka i ko'u akamai ma na manao hohonu, a ma ka wehewehe kanawai, a ma ke kalai-olelo, a e kaulana auanei ko'u inoa."

            "Alaila—aha ? " wahi a ke kahunapule.

            "Alaila hoi paha, e nui mai ke kala, a e lilo au i kanaka waiwai, a e loaa ia'u kekahi oihana aupuni i mahaloia."

            "Alaila hoi—aha?" wahi a ke kahunapule.

            "Aha la hoi," wahi a ka opio " Kainoa hoi,

e lako a e hanohano ka noho ana, a e mahaloia mai e na kanaka a pau a hiki i ka elemakule maikai ana o na la."

            "Alaila—aha ?" wahi a ke kahunapule. "A—lai—la,ka,a—lai-la,o ka make wale no paha koe."

            "ALAILA—-AHA ?" wahi a ke kahunapule.

            Ia ninau hope loa ana, paa ka waha o kahi opio. Aohe hua i pane mai. Kulou iho kona poo, a hele aku la ia me ka noonoo. Pipili loa nae kela ninau iaia, "Alaila-aha ?" He ola paha, he make paha? He pomaikai paha, he poino paha? Mahope, ua lilo ua wahi kanaka opio nei i haipule, haalele aku la i kona manao loio, a lilo i kahunapule maikai.

            E noonoo kakou a pau i keia ninau nui.