Ke Alaula, Volume V, Number 4, 1 July 1870 — Page 13

KE ALAULA.

BUKE V. HONOLULU, IULAI, 1870. HELU 4.

 

KO ABESALOMA MAKE ANA.

            O Abesaloma, ke keiki punahele a Davida, ke alii o ka Iseraela. He helehelena maikailoa kona i ka nana aku. O ke kolu ia o na keiki a Davida, a o Maaka ka inoa o kona makuwahine. He keiki hookiekie nae o Abesaloma, a aloha ole No ka mea, i kona wa i kanaka makua ai, kipi oiai i ke Alii ia Davida, a imi oia e pepehi ia Davida, a e lawe i ke Aupuni nona iho. Ua nui no hoi na kanaka i puni ia Abesaloma, a hahai mamuli ona. Hoomakaukau no hoi o Davida i kona poe koa e pale aku i keia haunaele kipi, a o Ioaba kona Alihikaua. Halawai pu na koa a Davida me na koa a Abesaloma maloko o ka ululaau o Eperaima. A lanakila ko Davida poe maluna o ko Abesaloma. O Abesaloma nae kekahi iloko a ia kana ana. A iwaena o ke kaua, holo ino kona hoki malalo o na lala haahaa o kekahi laau palahalaha, hihia ke poo o Abesaloma i na lala, a holo aku la ka hoki mailalo ae ona, a kau lewa iho la o Abesaloma iwaena o na lala. Lohe ae la o Ioaba, o kona holo koke aku la no ia a pepehi ia Abesaloma a make. Pela ka make weliweli ana o ke keiki i hoowahawaha i kona makua. " E poino ke kanaka i hoowahawaha i kona makuakane a me kona makuwahine." Kan. 27:16.

 

HE KEIKI HOOLOHE WAHAHEE OLE.

            "Kale, Kale, e!" E like me ke kani akaka ana mai o ka bele, pela i kani mai ai ua leo la

            "O mama no ia," wahi a kekahi keiki e paani ana iwaena o na keiki e ae ma kula. Lalau koke iho la ia i kona lakeke a me kona papale.

            " Mai hele e!" "Uoki a pau!" "E hoao hou!" "Aia a pau ke kini popo ana." Pela i kahea mai ai na hoa paani.

            E hoi koke no au i keia minute. Ua olelo no au i kuu makuahine, aia a kaheia au, alaila hoi."

            "E paani hou aku oe me he la aole oe i lohe!" wahi a lakou.

            "Ua lohe nae au."

            "Aole no e maopopo iaia."

            "Ua maopopo nae ia'u."

            "E hookuu aku iaia," wahi a kekahi; "Aole hiki ia oukou e mea iki aku iaia. Ua nakiiia oia i kona makuahine."

            "Pela no, wahi a Kale," a he pono noi i kela keiki e nakii paa loa ia i kona makuahine me ka nipuu hemo ole o ke aloha."

            "Ua like oe me he wahi bebe la, e holo ana i ka minute ana i kaheaia ai," wahi a kekahi.

            " Aole no he ano bebe ka malama ana i kuu mea i ae ai," wahi a ke keiki hoolohe. Nani iho la kona mau maka alohilohi. " Ua like ia me he kanaka la; pela ko'u manao. A o ke keiki malama ole i kona hoohiki ana me kona makuahine, aole no e malama ana i kona hoohiki ana ia hai." A hoi koke aku la ia.

            Ua hala ihope na makahiki he kanakolu mai ka pani ana o ua mau keiki la. He waiwai o Kale i keia wa; he kalepa malama pono i kana olelo, me ka luli ole. Ninau aku la makou iaia no ke ano o kona loaa ana i ua ano maikai la.

            Pane mai oia "Aole au i uhaki i kuu hoohiki ana i kuu wa kamalii. Ua malama pono au i kuu olelo, ua paa mai ia ano ia'u a hiki i kuu wa kanaka makua."

            Pela no, e na pokii. Ina e hooikaika oukou ma ka pono i ko oukou wa kamalii, e pili aku no ia pono a hiki i ko oukou wa oolea.

            He mea nani ka ike ana i ke keiki wahahee ole i kona wa opiopio. E like me Geoki Wasinetona i kana olelo ana, "Aole hiki ia'u e wahee aku ia oe, e kuu makuakane," a lilo i mea kaulana no kona maikai, a kapaia he "Makua no kona lahui." Pela no e na pokii, e hoohalike oukou me ia. Mai hookuli i na makua. E hoolohe i na makuahine. He pomaikai ko kakou a pau ke malama pono kakou i ko kakou mau makuakane a me ko kakou mau makuahine.

            Pela e lilo ai ko kakou mau home i mau mea nani a maikai. L. L. N.

 

            No ka nui o na hana iloko o ka malama o Iune iho nei nolaila, ua lohi ka puka ana o ke Alaula, a pela hou no i keia malama. Aka, e hooikaika ana ka Luna Hoopuka ma keia hope aku e puka pono ko kakou wahi Nupepa pokii nei iloko o ka hapa mua o ka malama. E aho nui mai oukou, e ka poe lawe Alaula, a pau ae keia mau hemahema o ka hoomaka ana i ka hana

 

PEHEA E HAAWI AI.

            Ma kekahi halawai misionari a na negero ma Inia Komohana, ua hooholoia keia mau rula ekolu.

            1. E haawi no makou a pau i kokua.

            2. E haawi no makou a pau e like me ka ke Akua hoolako ana mai ia makou.

            3. E haawi no makou a pau me ka makemake.

            Aia a pau ka halawai ana, noho iho kekahi o na luna, he negero no, ma ka pakaukau, me ka peni, a me ka inika, e kakau ana i ke kokua a kela me keia i haawi i ka hele ana mai.

            Nui ka poe i hele mai a kokua, he nui ka kekahi, he emi mai ko kekahi. Iwaena o ka poe i hele mai, he negero elemakule, a waiwai, ua ane like kona waiwai me ka huina o ka poe e ae a pau malaila. Hoolei ia i apana kala uuku ma ka pakaukau. I aku la ka mea e houluulu ana i ke kala, e lawe hou oe i kau, ua pololei paha ia e like me ka rula mua, aole nae i ko ka lua. Lawe hou no ka elemakule waiwai, a hoi hou i kona wahi me ka ukiuki ino.

            Hele mai no kela a me keia, a oi ko lakou mau haawina i ka ia la, hilahila loa ia; a hele hou no hoolei i kahi apana kala ma ka papa me ka i ana. Aia kau, lawe ia.

            He apana gula, a nui ka waiwai, aka no ka haawi ana me ke ano huhu, pane hou no ka luna. "Aole no e hiki ia, Ua kupono ko haawi ana i na rula mua elua, aole nae pili i ke kolu."

            Lalau hou i kona gula. Ua huhu ia iaia iho, a i ka poe e ae a pau. Noho ia a loihi, a ane pau na kanaka i ka hoi, hele hou no ia i ka pakaukau me ka maka oluolu, a haawi i puu kala nui i ka puuku. "Maikai ia, wahi a ka luna, pono ia, pili no na rula a pau i keia haawi aha."

 

ANO.

            ANO; he huaolelo pokole no keia, aka he ano nui kona. O ka malama ole ana i keia huaolelo, o ke kumu no ia e loaa ai na ehaeha he nui wale, a e helelei nui ai na kuluwaimaka. Ua manao kekahi poe e noonoo i ke ano o ka noho ana o ko lakou mau uhane, aole nae ono. Ua manao hoi lakou e manaoio aku i ka Haku, ia Iesu Kristo, aole nae ano. Ua manao no lakou e haalele i ko lakou noho hewa ana, aole nae ano. Ua manao no e haawi lilo ia lakou iho i ke Akua, aole nae ano. Nolaila, ua hoopanee lakou a hala ka manawa, loaa e mai ka make ia lakou, a hele aku lakou me ka makaukau ole.

            "Ano ka manawa e maliuia mai ai; aia hoi, ano ka la e ola'i." 2 Korineto, 6:2.

 

            Ua haawiia mai i ke kanaka, elua maka, elua pepeiao, aka hookahi wale no alelo; i kiai nui, i hoolohe pono, i kamailio uuku hoi.