Ke Alaula, Volume V, Number 4, 1 July 1870 — Page 16
16 KE ALAULA.
KA LEI MAIKAI.
LEO : " A Starless Crown."—Songs of Gladness.
He lei mai-kai ke wai-ho-ia'e Ma-lu-na ma ka la-ni; He lei paa-pu i na ho-ku. A mau loa'e ka na-ni No-wai ia lei? no'u, no'u a- nei? No'u no ke hu -li la au Na ho-a o'u o la-kou no Kuu lei ho-ku ma-lu-na.
Hui
La po-mai-kai! ao na-ni e! Ke hui ka-kou ma-lu-na Me Ie-su pu, a ha-le-lu, A li-lo mau loa no-na.
2. He poe pokii na koa nei,
Kena Iesu ka Luna,
E naue ae, e koa maikai,
No kela lei hoku la.
Iesu ke Lii, ke Alakai,
Mai nei a i ka lani;
E kai pu no na hoa ou,
O nele ia lei nani,
HUI-La pomaikai! ao nani e! & c.
3. E hui mal, na pokii e,
Ma ko makou puali,
E kai a huakai pu ae.
Mai ku a nana wale.
Ma o, ma o he ao mau no,
He ia, me e ka ula;
E hui pu a paio mau
I kau ia lei hoku ia.
HUI- La pomaikai! ao nani e! &c.
KA HOPE O KA HOOPUNIPUNI.
" Heaha na mea i hoohua nui ia mai ma ia aina ?" wahi a ke kumu, i ka Papa Hoikehonua.
"He hekili, he uila, he olai, a me ma ahi-pele" wahi a Robata, ka mea i hana maalea no ka paa ole o ka haawina, a ua helu ia i kana ninau, a ua nana malu ma ka buke e ike ai i na hua mua o ka haina, a ua hewa ka pauku ana i hopu ai.
Ua oki ia kona helu ana o na mea hoohua ia mai, ma ka akaaka ana o na haumana mai o a o o ke keena kula.
Ua kau ia he kanawai no ka akaaka: nolaila, kahea ae la ke kumu; "O ka poe akaaka, e
hele mai imua nei."
Aole hookahi i hele mai. Nana aku la ke kumu me ka huhu, a nana ae la na haumana kekahi i kekahi, a kakali iho la. Malu loa ke keena. Lohe maopopo ia ke kike mau ana o ka waki, aka aole i lohe ia ka paio nui ana, a ke Akua me na anela i ike mai ai—ka paio ana o ka pono me ka hewa iloko o ka naau o kahi pokii o ke kula o Felerika, he elima wale no ona mau makahiki
Ua akaka lea iaia kona akaaka ; a e hoopunipuni ana ia ma kona noho ana. O keia ka hebedoma mua a keia keiki uuku i hele ai i ke kula. O ke aloha wale no kana i ike ai ma kona home, a ua makau i ke ano huhu o ke kumu.
" A no ke aha la e ku ai oe iluna oiai o na keiki a pau i nui ae a naauao no, e noho malie ana no." Pela ka olelo ana o ka leo hewa iloko, aka nae, lanakila ka pono, a ku mai o Felerika, a me ka wiwo ole, hele oia hookahi i ka noho o ke kumu.
" O Felerika wale no ka hoi ke akaaka ana" wahi a ke kumu, me ka nana pono ana i ke kula holookoa.
Haalulu o Felerika i ka lohe ana ia olelo, no kona manao e pili ana iaia ; aka me na waimaka no, nana ae la ia i ke kumu, a hawanawana mai, " Ae, ua akaaka no au.'
"Maikai loa kau i hana ai e Felerika uuku," wahi a ke kumu me ka hauoli, " E huli ae a hoike i ke kula ke keiki wiwo ole; a hilahila lakou i ka ike ana. E kakau ana no au i ka inoa o Robata a me na mea e ae i hui ka hoolohe ole me ka hoopunipuni, me ka hewa o ka akaaka ana, a aia a pau ke kula, e hooponopono au ia lakou; aka o oe e Felerika ka mea i hana me ka pololei, e hookuu no au ia oe."
Olioli maoli o Fleerika, kaumaha na haumana e ae. A pela mau no e na keiki. O na ano hoopunipuni a pau; e ukali koke ana ka hoopai. Aole nae ia ka hopena, ka mea nui, no ka mea, ua i mai ka Makua aloha ma ka lani, ka mea i hoomakaukau i home nani no ka poe aloha iaia, penei; aole hoi e komo aku iloko oia wahi, ka mea hana me ka wahahee.
E na makamaka uuku, e nana oukou ma na pauku kuhikuhi a pane ae i keia mau ninau :
Owai ka mea hiki ole ke hoopunipuni ? Tito 1:2.
Owai ka i hiki ole ke hai i ka oiaio? Ioane 8:14.
Mahea kahi e noho ai o ka poe hoopunipuni? Hoikeana 21:8.
Owai ko lakou makua ? Ioane 8:44.
Owai ko lakou hoapili ? Hoikeana 22:13.
Aia a heluhelu ia a maopopo na pane o keia mau ninau, e makaukau paha e olelo. "O na lehelehe oiaio, e mau ana no ia; O ka olelo wahahee e pau koke no ia." Solomona 12:19.
DAVIDA E HOOKANI ANA I KA LIRA IMUA O SAULA.
O Saula ke Alii mua o ka Iseraela. Aole nae i pono kana hana imua o ke Akua. He kanaka huhu no hoi o Saula. A i kona manawa e inoino ai ka manao, hookahi wale no mea ana i oluolu ai, oia hoi ka hoolohe ana i na mele me na mea kani. Nolaila ua kenaia kana mau kauwa e imi aku i ke kanaka akamai loa ma ia mea, i noho mai oia o hooluolu i ke Alii e like me kona makemake. A no ke akamai o Davida, ua kohoia oia ma ia wahi, a lilo oia i punahele na ke Alii. Lealea loa o Saula i ka hoolohe ana i na leo mele maikai a Davida, i hookani ai ma ka Lira. Mahope nae, ua lili ka manao o ke Lii ia Davida, a imi ikaika ia e pepehi iaia, aole nae i loaa, no ka mea, o Iehova pu me Davida. E nana oukou i ka moolelo ma Samuela 1, Mokuna 16, 17, 18, 19, 20.
AKAHELE.
Ma na aina anu, ke hiki i ka wa hooilo, paa na muliwai a me na loko i ka hau maluna o ka ili o ka wai. Me he aniani la ka paa o ka hau a me kona aiai, a oi loa aku kona pahee. Aia a manoanoa pono ua hau nei maluna o ka wai, e hiki i na kanaka, me na lio, a me na kaa-holua, ke holoholo maluna o ka ili o ka wai me he honua paa la. He mea lealea loa hoi i kamalii ka paani ana maluna o ka hau. I kekahi manawa nae, aole i manoanoa like na wahi a pau. Lahilahi loa ka hau ma ke kauwahi, a ina e holo naaupo na keiki malaila, e piholo pu auanei ilalo, a komo aku malalo o ka hau manoanoa, a o ka make aku no ia iloko o ka wai. Aoia no na keiki, a papaia e malama loa, mai hele maluna o kahi lahilahi. .Aka, i kekahi manawa, no ka lealea loa i ka paani, aa aku ka manao o ke keiki e hoike, i kona akamai, a me ke koa ma ka holo ana a kokoke loa i ua make nei, alaila huli koke ae a hoi mai me ka lanakila. I ka hoao mua ana hoi, ua maka-u iki paha, a nolaila aole hookokoke loa aku, a i ka hoao hou ana, ua hoowalewaleia ka manao e nee hou iki aku, a pela auanei e nee aku ai a hala ka palena o kahi paa, o ka piholo koke no ia no kona hele ana maluna o ka hau lahilahi. E na pokii e, mai ae aku oukou i na manao hoowalewale, o hehi oukou ma kahi lahilahi a piholo ilalo i ka make mau loa.
Aia a ike au i ke keiki hele ana me ke kika, a me ka ipu baka paha ma kona waha, e i ana au iloko iho o'u, E, akahele oe! Lahilahi kela wahi.
Aia a ike au i ke keiki e hele pu ana me ka poe kolohe, hoomanao iho la au, lahilahi kela hele ana.
Aia a ike aku au i ke keiki e pepa ana, a i ole ia, e pana mabala ana me ka pili waiwai, hoomaopopo iho la au, ua lahilahi kela wahi.
Aia a ike au i ke keiki e haalele ana i ke Kula Sabati, a i ka halawai, a e hele auwana wale ana ma ia la hoano, kani mai la ka leo, Akahele! Ke hele nei oe ma kahi lahilahi loa! Malama i na wahi lahilahi, e na pokii.
Kamailio pu ana kekahi mau kaikamahine elua. Wahi a kekahi, " Aole o'u makuakane; ua make. Pane mai la kona hoa, "Elua o'u makuakane: maanei kekahi, a o ko'u Makua ma ka Lani ka lua."
O Hoolewaiona ka makua, o Ikaika kino Hauoli, a me Loihi o na la, na keiki. O Inuwaiona ka makua, a o Aie, Ilihune, Mai, a me Make, na keiki. '.
KE ALAULA. He Nupepa Hoikeike Kii,
Hoopau mau ia ma Honolulu, i kela malama keia malama e ka PAPA HAWAII, no na Kamalii Hawaii.
25 keneta ka uku no ka makahiki no ka pepa hookahi; 20 keneta pakahi ka uku no na pepa ke iwakalua a oi aku paha ma ka ope hookahi, ME KA HOOKAA MUA IA MAI. A. O. POLEPE, Luna Hoopuka.