Ke Alaula, Volume V, Number 7, 1 October 1870 — Page 25

KE ALAULA.
BUKE V. HONOLULU, OKATOBA, 1870. HELU 7.

SAMESONA KA IKAIKA

                Ua hanauia o Samesona ma ke kulanakauhale o Zara, no ka ohana o Dana, ma ka aina o Palesetina. Aneane 1,143 makahiki mamua o ka hiki ana mai o Karisto, kona hanauia ana. O Manoa ka inoa o kona makuakane. Aole i haiia mai ka inoa o kona makuwahine. Ua hookapuia o Samesona e ke Akua mai kona wa i hanau ai. Aole e inu i ka waina, a i kekahi wai ikaka, aole e ai i kekahi mea i papaia ma na kanawai o Mose, aole hoi e amuia ke poo. Pela no ia i noho ai a hiki i kona wa ai. Aia hoi kekahi kulanakauhale o ka ohana a Dana, e pili ana i ka aina o Pilisetia, o Timenata ka inoa o ua kulanakauhale la, ua aneane iwakalua mile ma ke komohana aku mai Ierusalema aku. Aole no hoi i manmao loa aku mai ke kulanakauhale o Zara. Hele aku la o Samesona ilaila i kekahi wa, a ike aku la i kekahi kaikamahine maikai. Makemake aku la oia i ua kaikamahine la i wahine mare nana. He kaikamahine Pilisetia no nae ia. Hana naauao iho la o Samesona. Hoi mua oia ai kona mau makua, hai aku la i kona manao, a noi aku la ia laua e ae mai. Oia kekahi ano maikai a kakou e hoomaopopo ai no Samesona, he keiki noho maikai malalo o kona mau makua, me ka hoolohe ia laua. Kanalua mai la hoi na makua i keia noi a ka laua keiki. I aku la laua, "Aole ka hoi he wahine iwaena o na kaikamahine o kou lahui ponoi, i imi aku ai oe i wahine nau noloko o ka lahui Pilisetia ?" No ka mea, he lahui hoomanakii ka lahui Pilisetia, a ua papaia ko Iseraela poe e ke Akua, aole e mare aku lakou me na lahui hoomanakii. Paa loa nae ka manao o Samesona, a pane aku la oia i na makua, " Ua kupono loa ua wahine la i kuu manao; e kii aku olua iaia i wahine na'u," O ko laua hele pu aku la no ia me Samesona i Timenata, e imi i na makua o ua wahine la, Ia lakou ma ke alanui, ua hala aku paha na makua mamua, a e hele hookahi ana o Samesona, lele mai la he liona ikaika e pepehi iaia. He holoholona nui, ikaika, a weliweli hoi ka liona. Kohu popoki kona kino a me kona helehelena, aka ua like ka nui o kona kino me ko ka bipi ohi. He mea ole iaia ka pepehi ana i ka bipi nui a me ka lio, e like me ke poi ana o ka popoki i ka iole. Ia lele ana mai o ka liona, kuhihewa paha oia e make koke ana o Samesona iaia, no ka mea, ke hele wale nei o Samesona, aohe mea ma kona lima. Ia manawa nae, lalau aku la o Samesona i ka liona me kona mau lima, a pepehi aku la iaia a make loa, me he kao keiki wale no la imua ona. Aole nae ia i hai aku i keia mea i kona mau makua. O ka hele aku no ia e lakou a hiki i Timenata. Launa pu na makua a holo ka manao no ua kaikamahine la, hoopalau ia laua me Samesona. Hoi aku la hoi o Samesona me na makua ona, a i ko lakou wahi. A hiki i ka wa e mare ai, hele aku la lakou i Timenata no ka mare ana. A hiki lakou kahi ana i pepehi ai i ka liona, kupu ae la ka manao loko o Samesona e huli i ke kino o ua liona la, e ike. O kona huli aku la no ia a loaa, eia ka, ua komo na nalo meli iloko, a ua nui ka meli ono a lakou i hana ai malaila. A ua hala aku nae na makua imua, e like me ia hele mau ana. Lawe ae la oia i ka meli, a piha kona mau lima, hele aku la ma ke alanui, e ai ana i ua meli nei. A loaa aku la i na makua, haawi aku la na laua kekahi. Aole nae i hai aku ia laua i kahi i loaa ai.
                A hiki aku lakou i Timenata, hoomakaukau ae la o Samesona i ka ahaaina mare nona a me ona mau hoa keikikane, ma kona hale iho, a hoomakaukau ae la ka wahine i ahaaina mare nona a me kona mau hoa ma kona hale iho, e like me ka hana o ia aina. Ehiku la e ahaaina ai, alaila pau ka mare ana. Ua kanakolu na hoa o Samesona ma kona hale. Aole i haiia mai ka nui o na hoa o ka wahine, aka, ina e noonoo kakou, o kona one hanau no ia, alaila e maopopo paha ua nui no kona mau hoa.
                Ma na ahaaina o ia ano hoi, o kekahi huna lealea loa o lakou, oia no ka imi ana i na nanehai. Hoopuka aku la o Samesona i kona nanehai, me ka olelo aku i kona mau hoa, "E nanenane aku au ia oukou, a e koho mai oukou i ke ano; a ina e loaa ponoia oukou iloko o keia mau la ehiku o ka ahaaina, alaila e haawi aku au ia oukou i kanakolu mau kihei a me na paa aahu he kanakolu. A i loaa ole ia oukou, alaila na oukou e haawi mai ia'u." Ae mai la lakou, "E nane mai oe, i lohe makou." O kahi hewa paha ia o Samesona, o kona lilo ana i ka piliwaiwai, e like me ia poe hoomaloka.
                A eia ka nanehai ana i hoopuka aku ai, "Noloko mai o ka mea nana e ai, puka mai la ka ai; a noloko mai o ka mea ikaika, puka mai la ka mea ono."
                Oi huli wale aku lakou a pau, a hala na la ekolu, aole i loaa ma ka noonoo maoli. Nolaila, imi kikou ma ka maalea. Hele aku la lakou i ka wahine a Samesona, a noi aku la iaia e kokua mai ia lakou. Hooweliweli aku no hoi lakou iaia, e i ana, "Ina e hoole mai oe, e puhi makou ia oe a me ka hale o kou makuakane i ke ahi.''
                Nolaila, koi aku la ka wahine ia Samesona e hai mai i ka nane iaia. Hoole aku la o Samesona, Hoomau aku nae ka wahine i kana hana, me ka uwe a me ka hoonaukiuki aku i kana kane i kona aloha ole i ka wahine no kona huna ana i keia mea. Pela no i hoouluhua aku ai ia Samesona a hiki i ka la hope loa o ka ahaaina, oia ka la ehiku. Ia la, hooikaika loa aku ua wahine la, a hai mai la o Samesona iaia no kona pepehi ana i ka liona, a me kona loaa ana i ka meli iloko o ke kino o ua liona la. O ka hai koke aku la no ia o ua wahine la i na hoa o Samesona. Aole hoi i napoo ka la, hoopuka aku la lakou i ka haina ia Samesona, me he mea la na lakou iho no i imi a loaa ma ka noonoo maoli. Eia ka haina a lakou i hoopuka ai, " Heaha ka mea i oi aku ka ono mamua o ka meli, a owai hoi ka mea i ai aku ka ikaika mamua o ka liona? " Ike koke iho la o Samesona ua puni oia i kana wahine, i aku la oia, "I loaa iho nei oukou i ko oukou hoounauna ana i kuu bipi ohi." Huhu ae la oia, aole nae i hoole aku i ka mea i hoohikiia. Eia nae, hele aku la oia i kekahi kulanakauhale o Pilisetia, o Asekelona ka inoa, he iwakalua mile ma ke komohana aku o Timenata, a malaila, pepehi aku la i na kanaka Pilisetia he kanakolu, lawe ae la i ko lakou mau aahu, hoi mai, a haawi aku la i ua mau hoa nei ona.
                Weliweli noi hoi keia hana a Samesona. O ka piliwaiwai kona hewa mua, a o ka pepehikanaka aku ka, ka hope.

UKU POHO.

                Lohe aku la kekahi kanaka i ke keikikane e hoopuka ana i na olelo kuamuama, ninau aku la oia i ua keiki nei, " Heaha kau uku o ia nana?" Pane mai la ke keiki, "Aohe uku." I aku la ke kanaka, "Poho loa paha oe e hana nei me ka uku ole. Ke hoehaeha nei oe i na makamaka a me ka poe makee pono, ke hoino nei oe i kou Lunaikehala, ke hoopilikia nei oe i kou uhane, a eia ka, ke hooikaika nei oe i keia mau hana nui a pau a Satana me ka uku ole ia mai. Makehewa kau hana. Poho loa oe."