Ke Alaula, Volume V, Number 8, 1 November 1870 — Page 29

KE ALAULA.
BUKE V. HONOLULU, NOVEMABA, 1870. HELU 8.

O BALAAMA E HAHAU ANA I KONA HOKI.

                Mahope o ka make ana o Mose, alakai aku la o Iosua i na mamo a Iseraela e kaua aku i ka lahui o na aina o Kanaana, i lilo mai ka aina ia lakou, e like me ke kauoha a Iehova. Kaua aku lakou i ko Amora poe, a lanakila; kaua hou aku i ko Basana, a lanakila hou. A hiki aku lakou i Moaba, o Balaka ke alii o ua lahui nei. Ua lohe mua oia i ka lanakila o ka Iseraela ma ke kaua, a nolaila ua makau loa oia ia lakou. Iini iho la ia i mea e lanakila ai oia maluna o ka Iseraela. A e like me ka mea mau o na lahui naaupo, manao iho la oia, ina e loaa iaia kekahi kahuna mana nana e hooiloilo aku i ka Iseraela, oia ka mea e lanakila ai. Aia hoi ma ka aina o Mesopotamia, ma ke kulanakauhale o Petora, ma kapa o ka muliwai o Euperate, e noho ana kekahi kanaka i kaulana no kona mana ma ia mau hana. O Balaama kona inoa, a o Beora ka inoa o kona makuakane.
                Hoouna aku la o Balaka ke alii e kii ia Balaama e hele mai a hooiloilo i ka Iseraela. Lawe pu aku la no hoi na kauwa a ke alii i na makana maikai i mea e ae mai ai o Balaama. Papa aku la nae o Iehova ia Balaama, mai ae aku oe, a hoi nele aku lakou. Hoouna hou aku la o Balaka, a koi ikaika loa aku la ia Balaama me ka haawi aku i ka hanohano nui a me ka waiwai ina e ae mai oia. Ua makemake loa o Balaama i keia mau mea, a o kona manao maoli no, e ae aku. Aka, ua makau oia no ka papa ana o Iehova. Nolaila, i aku la oia i na kauwa a ke alii, "Ina no e haawi mai o Balaka i ka piha hale o ke kala a me ke gula, aole no e hiki ia'u ke kue aku i ka olelo a Iehova kuu Akua." Mai ka waha aku keia olelo, aka, ua ike no o Iehova he okoa loa ka manao iloko o kona naau. A i aku la o Balaama i na kauwa, "E noho oukou maanei i keia po, a e ninia hou wau ia Iehova." A no ka paakiki o ka manao o Balaama, i aku la o Iehova iaia ia po, "E hele pu oe me lakou." Olioli iho la o Balaama. I manao iho ia paha oia ua pau ka pilikia, ke ae nei hoi o Iehova iaia e hele.
                Ia kakahiaka ae, hoomakaukau ae la oia i kona hoki, a hele aku la. A i kona hele ana ma ke alanui, ku mai la ka anela a Iehova ma ke alanui me ka pahikaua wakawaka ma kona lima. Aole no i ike o Balaama i ua anela nei. Ike nae ka hoki. Ia ike ana o ka hoki, puiwa iho la oia, a holo aku mawaho o ke alanui. Hahau aku la o Balaama iaia, a hele hou aku ma ke alanui a hiki i kahi i komo aku ai ke ala mawaena o kekahi mau malawaina, a ua pa ia ke alanui malaila i ka pa, ma kela aoao a ma keia aoao. Ilaila, ike hou ka hoki i ka anela e ku ana ma ke alanui me kona pahikaua, kapae ae la, a hooke aku la i ka pa a eha loa ka wawae o Balaama. Huhu iho la o Balaama, a hahau hou aku la i ka hoki. O ka hele hou aku no ia a hiki i kahi haiki loa o ke ala, aole hiki ke kapae ae ma kela aoao a ma keia aoao. Ilaila, halawai hou mai la ka anela me laua, a moe okoa ka hoki i ka honua. Huhu loa o Balaama, a hahau ino aku la i kahi hoki. No ka mea aole i ike o Balaama i ka anela. O ka hoki wale no ka i ike, a ke kuhihewa nei o Balaama he apiki wale no keia a ka hoki e hana mai nei iaia. Ia hahau ana nae a Balaama, hamama mai ana ka waha o ka hoki, a kamailio la mai oia ma ka olelo kanaka, "Heaha ka'u i hana aku ai ia oe i hahau mai ai oe ia'u, o ke kolu keia o ka hahau ana?" Pane aku la o Balaama, "No kou hoomaewaewa mai hoi paha ia'u. Ina he pahikaua iloko o kuu lima i keia manawa, make oe ia'u." I aku la ka hoki, "Aole anei owau kou hoki au i hooholo mau ai a hiki i keia la? Ua ike anei oe ia'u e hana ana pela mamua aku nei?" Pane aku la o Balaama "Aole." Ia manawa, ua weheia na maka o Balaama, a ike oia i ka anela e ku ana ma ke alanui me ka pahikaua wakawaka. Akahi no oia a ike i ke kumu o ka puiwa ana o kona hoki. E na pokii e, ua nui no kanaka i like me Balaama. Ua hoopouli ia na maka o ka naau i ka hewa, a e hahai ana lakou mamuli o na hana hewa me he la aohe mea nana e keakea mai i ko lakou alanui. Ke hookauwa nei i ko lakou mau kino i ka luhi o ka hewa, me he mau hoki hooholo la, a no ka makapo i ka hewa, aole i ike ka naau o ke kanaka i ka anela o ka make e ku ana ma ke alanui. Ike e nae ke kino. No ka mea ua hookauwa aku ia poe i ko lakou mau kino e hana hewa, a haule okoa ke kino i ka mai ino. Alaila paha, akahi no a noonoo pono lakou, a mihi i ko lakou hewa. Eia wale no ka pono; o ka hoole e mamua, aole e hele ma ke alanui o ka poe kue i ke Akua.

"KE KEENA POULI."

                Ina e komo oe iloko o kekahi keena, a papani aku i na puka a pau i ole e komo mai ka malamalama o ka la, e ike anei oe i na mea oloko o ua keena nei? Aole no. No ke aha? No ka mea, ua pouli. Malia paha, ua paapu ke keena i ka lepo a i na punawelewele, aole nae oe e ike aku no ka pouli. Malia paha ua hunaia kekahi powa iloko o ke keena, aole nae oe e ike oiai e pouli ana. Aka, e wehe iki ae oe i ka puka, a komo mai kahi kukuna malamalama hookahi wale no, alaila e ike ana oe i na mea a pau oloko; a ina e wehe loa ae oe i ka puka, alaila akaka loa na hunahuna lepo a pau, a me na punawelewele a pau, a me na mea ino e ae.
                Pela hoi ka naau o ke kanaka. He keena ia i hoopouliia. Ua paniia na puka a pau e ka hewa, a ua keakeaia ka malamalama i ole ia e komo mai. No ka ike ole, ke kuhihewa nei oe, ua maikai oloko. Aia nae a komo na kukuna malamalama mai ka lani mai, e ike pono ia auanei ka nui o ka ino e waiho ana. Ua piha i ka haumia. Paapu wale na mea ino. Aia no na powa iloko, e huna ana ia lakou iho, a o ka make koe o kou uhane. E wehe koke oe i ka puka i komo ka malamalama o ka ke Akua olelo, a e kahea aku oe ia Iesu e hoouna mai i kona Uhane Hemolele e kokua ia oe, i hoomaemaeia kou naau, a i kipakuia na powa.