Ke Alaula, Volume V, Number 11, 1 February 1871 — Page 43

KE ALAULA. 43

                O Saulo paha keia. He kanaka Iudaio no ia i ka wa ia Iesu a mahope iho. He kanaka makaukau loa ma ka ike a me ke akamai o ia wa. He kanaka ikaika loa hoi i ke kue i na Karistiano. Imi mau oia e hoopilikia a e pepehi ia lakou. Ua lohe oia aia ma Damaseko kekahi mau Karistiano, a nolaila, hoomakaukau oia me kekahi mau hoa ona e holo aku ilaila, e hoopilikia ai ia lakou. Ia lakou nae ma ke alanui, a ua kupono ka la iluna, i ke awakea; loaa ia lakou kekahi mea kupanaha. Anapa mai ana he malamalama ikaika loa, i oi loa aku mamua o ka ikaika o ka la, a haule iho la o Saulo ilalo i ka honua. Ia manawa, lohe oia i ka leo noluna mai e kahea ana, "Saulo, e Saulo, no ke aha la oe e hoomaau mai nei ia'u?" I aku la oia, "Owai oe, e ka Haku?" Pane hou mai la ka leo. "O Iesu no wau, ka mea au e hoomaau mai nei. O ke keehi ana i na ooi, he mea ia e eha ai nou." O ka hoomaka ana no ia o ko Saulo huli ana mamuli o Iesu, a mahope ua lilo oia i lunaolelo a i misionari ikaika loa.

PALAPALA MAI AMERIKA MAI—Helu 4.

                E KE ALAULA—Aloha oe:—Ma na pule i hala, hele pu au me kuu kaikuaana, o Kauka Kulika, i kekahi kulanakauhale kuaaina i kapaia o Gosena, ma ke kihi komohana akau o Konetekuka nei, e haiolelo.

Kahi i Poniia'i o Binamu a me Tatina.

                Ma keia  kulanakauhale o Gosena kahi i poniia'i o Binamu laua me Tatina, a hoolaaia laua he mau misionari e holo aku i Hawaii he 51 mau makahiki aku nei i hala. Loaa ia maua kekahi o ka poe elemakule i hoomanao i ua la la; aka o ka nui o ia hanauna, ua pau i ka hala aku i ka make.

O Mr. Aiwa.

                Mai Gosena, holo aku maua i ke komohana, a loaa ma Konawalu (Cornwall), Konetekuka, o Mr. Aiwa me kana wahine, a me ka laua mau keiki. O Mr. Aiwa (Rev. M. Ives) kekahi o na kumu misionari i noho mua ma Hana, Maui Hikina, a mahope ma Kealakeakua, Hawaii. No ka mai o Mr. Aiwa i hoi mai ai laua me na keiki eha i keia aina. Ke hooikaika nei lakou no na pono kino a me na pono uhane no na keiki a me na moopuna a laua. He hanai holoholona me ka uwi waiu ka hana nui a lakou. Ke pumehana nei no ke aloha i ka lahui Hawaii iloko o laua, a hookipa oluolu mai laua ia maua.

Ka He-kupapau o H. Opukahaia.

                Kau aku au maluna o ke kaa, a lawe o Mr. Aiwa ia'u e ike i ka he a ke keiki Hawaii i aloha loa ia ma keia aina, e waiho nei ma ka pa ilina ma Konawala, Konetekuka. Ua kakauia maluna o ka pohaku mabala ka inoa o Heneri Opukahaia, me kekahi moolelo pokole o kona imi ana i ka pono, a me kona aloha lahui, me ka iini o kona nanu e lilo i misionari e hai i ka olelo o ke Ola i kona lahui.    Make oia ma Konawala i ka la 17 o Feberuari, 1818, a i ka makahiki 26 o kona ola ana.    Na keia keiki Hawaii i auwana mai i Amerika nei, i hoala i ke aloha o na ekalesia o Amerika nei i ka lahui pouli o Hawaii. Hoomakaukau o Opukahaia e hoi aku i kona lahui a ao aku ia lakou; aka loaa e ka make iaia. Aole nae make wale kana hana. Ua hoaaia, e ia, ke aloha iloko o na naau o kekahi poe haipule, a ua lilo o Binamu ma i mau hooilina no ka hana ana i hoomaka ai, a mamuli o ke aloha uhane ua hoomau na ekalesia o Amerika nei ia hana, a pau na makahiki he kanalima.

He Hale Kula Mi sionari ma Konawala.

                Ma Konawala ike maka au i ka hale kula kahi i aoia o Opukahaia, a me Hopu, a me Kanui, na keiki Hawaii, a me na hoa kula e ae ona. Ua houluuluia maanei na keiki mai na aina he nui iloko o na makahiki mai 1815 a hiki i 1825. No Bolabola kekahi keiki, no Nuuhiwa kekahi, no Inia kekahi, no Kina kekahi, a no na ohana Ilikini kekahi. Ma keia kula i aoia lakou i ka pono iloko o  Kristo, a o Opukahaia kekahi o lakou i apo mai a hoopaa i ka pono. Ike au ma Konawala ia Mr. Stone, ke keiki a ke kahunapule nana i ao ia Opukahaia. Hai mai kela ia'u i na olelo aloha a Opukahaia. Me he la o kahi keia i hookumuia'i ka hana a ke Akua ma Hawaii, no ka mea o keia keiki Hawaii i aoia maanei ka mea nana i hoala i ke aloha iwaena o na Ekalesia o Amerika no kona lahui haahaa.
                Aloha loa kuu naau i ka ike ana i kahi i aoia ke keiki haipule mua o ko'u lahui, ka mea nana hoi i hapai mua i ka manao e halihali i ka olelo a ke Akua i Hawaii.  Ka hua mua keia o Hawaii, a o ka mea hoi nana i hookumu i ka hana o ke Akua ma Hawaii, oiai aole oia i hoi kino aku i kona aina hanau, aka na hai i hooko i ka mea ana i makemake ai.
                Ke mau nei no ke aloha o ka Ekalesia o Amerika nei i ko lakou hanau mua, oia ka Ekalesia o Hawaii.
                Nani hoi ke aloha o ke Akua i ko'u lahui iloko o na makahiki he kanalima i hala ae nei.
                Me ke aloha i na keiki o ko'u lahui e hahai ana ma na kapuai o Heneri Opukahaia,
Na'u, na O. H. KULIKA.
Portland, Kenetekuka, Nov. 8, 1870.

KA WA TI HOOPUIWA.

                Aia maloko o kuu rumi moe he wati hoopuiwa. I kela a me keia kakahiaka, ma ka hora elima, e hoopuiwa mau ana kela ia'u me ka nakeke nui. I mai paha kekahi, "pomaikai oe i kou wati hoopuiwa, aole oe moe loa a hala ka wa kupono e ala ai." Pela no ke hoolohe mau wau i kona leo hoala. Aka, ina paha e manaka wau i kekahi kakahiaka, mahope o ka hoala ana o kuu wahi wati ia'u, a hiamoe hou aku, a pela paha i ka lua o na kakahiaka, a pela aku; alaila, aole liuliu, o ka lilo no ia o kuu wahi wati hoopuiwa i mea ole. Pau kona mana hoala. E kani wale oia i ka hora i makemakeia, aka, aole au e ala ana; no ka mea, ua hoopaakiki a hookuli au iaia.
                Ua like kela wahi wati hoopuiwa me ka Lunaikehala. Aia iloko o ka naau o kela mea keia mea i lohe i ka pono o ke Akua he wahi wati hoopuiwa. A i ka wa e hana hewa ai ia, o ka hoopuiwa koke no ia o kahi wati (lunaikehala), e i ana "he hewa ia; mai hana oe ia; ke ike nei ke Akua ia oe."
                He mea maikai loa ka lunaikehala e hai mau mai ana i ka hewa, i ka wa a kakou e hana hewa ai. Ina kakou e hoolohe mau iaia, e olelo mau mai no ia. Aka, ina kakou e hookuli, mamuli pau kona hoopuiwa ana mai, e like me ka wati i hoikeia maluna.
                Auwe ke keiki a me ka makua i lohe ole i ka leo o kona lunaikehala. Ke hana hewa la ia, aohe nae he mea nana e hoopuiwa, a e hoi mai "ua hewa." Poino loa ke kanaka i hoomoe i kona lunaikehala. Pomaikai ka mea i ike i ka hewa a haalele me ka mihi.

MAHELE HAPALUA.

                Haawi aku la kekahi keonimana i kekahi keiki liilii, he dala gula. I aku la oia, "E malama pono oe i keia dala nou iho."
                Pane mai la kahi keiki, "Ka! e mahele hapalua ana wau, a o ko'u hapalua, oia ka'u e malama ai no'u iho."
                "I mea aha hoi kou mahele hapalua ana? Kainoa hoi nau ia dala a pau. Na wai aku ka hapalua au e mahele ai?"
                Pane hou aku la kahi keiki, "Aole, aole na'u keia dala a pau. Na ke Akua ka hapalua. He mahele hapalua ka ke Akua iloko o ko'u mau loaa a pau. Na'u kekahi hapa, a Nana kekahi hapa."
                "Ka! aole paha i nele ke Akua. Aole oia i makemake i kou wahi hapalua; no ka mea, nana no ke ao nei a pau. O ke kala a me ke gula, a me na bipi maluna o na tausani kuahiwi, nana wale no a pau. Heaha kana e nana mai ai i kou wahi hapalua hookahi?"
                Pilikia iho la ka manao o kahi keiki. Noonoo iki oia, alaila pane hou aku la, "Ua mahele hapalua mai ke Akua i kona waiwai ia kakou, aole anei he pono e hoihoi aku kakou i kona hapalua?"