Ke Alaula, Volume V, Number 11, 1 February 1871 — Page 44

44 KE ALAULA.

E NA POKII, E LOLII.
Leo: "LET US FIGHT FOR THE RIGHT."--Songs of Gladness.

1. E na po-kii, e lo-lii, No ka pa-io mai-kai, No ka po-no a no ke A-kua; E kau ae i ka hae, A e na-na pu ae Me ke ka-ni o ka pa-hu ma-mu-a. Pa-io pu, e, no ke Lii, e, No ke Liii mau o ka na-ni; Pa-io pu, e, no ke Lii, e, No ke Lii mau o ka na-ni. Lii mau, o ka na-ni; Pa-io pu, no ke Lii, No ke Lii mau, &c.
2. E na pokii, e lolii
No ka paio maikai,
Na Iesu la e kai imua;
E hoouka a mau,
I naueue ke ao
I ke kani o na pu o ke kaua.
HUI—Paio pu, e, &c.
3. E na pokii, e lolii
No ka paio maikai,
Paio nao me ka olelo mana;
Nee a ulupa no
I ke ao, i ka po,
Me ka eha a haule pu ana.
HUI--Paio pu, e, &c.
4. E na pokii, e lolii
No ka paio maikai,
Me ke kau o ka uku imua.
O ka inoa maikai,
O ke kalaunu aiai,
O ka hoku ao olino maluna.
HUI--Paio pu, e,
WAIKOLOA.

MA RETA, KE KAIKAMAHINE MANAWALEA.

                He wahi ohana ilihune ma Farani mamua aku nei. Na lala o keia ohana, na makua elua, he mau keikikane, a he mau kaikamahine. Mareta ka inoa o kekahi kaikamahine, he umi ona mau makahiki. He mau haumana no ke kula na keiki a pau. Ua loohia ka makuakane i ka mai, a nui wale na makahiki i moe wale ai oia ma kona wahi moe; aole hiki ke ala a hele i ka hana. He kanaka mahiai oia. He aina hoolimalima kona. Ua aie oia i ka haku aina i hookahi haneri dala. No ka hiki ole iaia ke hana, aole lawa kona dala e hookaa aku ai i ua aie nei. Nolaila, e pai koke ia'na ia ohana, a e noho home ole ana ke loaa ole ia haneri dala.
                Ia la i loheia'i e paiia'na lakou, ua hala e na keiki i ke kula, koe o Mareta. Haawi mai la ka makuwahine i wahi apana berena me ona mea ono nana ponoi, a me na mea ono na na keiki i hala e i ke kula. Aole i ai o Mareta, aka, hookomo oia i kana mau mea ono me na mea ono o na keiki iloko o ka hinai, a holo kiki i ke kula, me ka manao e ai pu me na hoa.
                Aole nae oia i hiki aku i ka hale kula, halawai e oia ma ke alanui me kekahi mau koa pio Beretania, e kai pio ia'na e na koa Farani i ka hale paahao. Ike o Mareta i kekahi mau pio, ua nawaliwali, ua nanakea, a wiwi a ane make no ka pololi. Wehe oia i kana hinai, a haawi aku i kona hapa o ka ai a pau ia lakou—koe ka ai a na hoa. Manao oia aole paha pono ke haawi aku i ka hai; aka, no ka nui o ke noi ana o ia poe ane make, ua haawi aku no ia a pau loa, aohe mea i koe. Pohala mai lakou a aloha nui i ua kaikamahine nei, no kona kokua ana. Ua nele nae o Mareta, a ua nele hoi na hoa. Aole o Mareta i ai iki ia kakahiaka. A ike kekahi kapena Farani ia Mareta e haawi ana i kana ai a pau i ka poe pio, olelo oia, kupanaha oe, e ke kaikamahine; he poe enemi keia poe pio ia Farani, kou aina; kokua ka oe i kou mau enemi? Pane o Mareta, aole au i ike he poe enemi, he poe makamaka lakou, he mea ole ia i kuu manao; aka, ua ike au he poe pilikia loa lakou, a ane make no ka pololi. Ninau ke kapena, ua ai anei oe i keia kakahiaka? Hoole oia, aole. Pololi loa paha oe? wahi a ke kapena. Hoole oia, aole; ua maa au i ka hele me ka ai ole. Ua haawi anei kou makuwahine i ai nou? Ae, haawi mau mai no, a ina haawi wale aku au i ka poe pololi, a pololi au, no'u ia hewa, aole no ka makua.
                Hoi o Mareta i ka hale me ka makau loa o huhu a hoahewa mai na makua no ka haawi wale i ka berena me na mea ono. Puka oia i ka hale a komo iloko, aia hoi na makua e noho ana me ke kaumaha, me ka uwe ana, e helu ana i kahi dala. Heaha keia? wahi a Mareta. Pane ka makuwahine, ua pilikia loa kakou, e hookuke ia'na iwaho o ka hale a me ka aina, no ka lawa ole o kahi dala e hookaa aku ai i ka aie i koe, oia hoi ka hookahi haneri dala. Pane koke aku o Mareta, mai kaumaha oe, e kuu mama, hiki ia'u ke hana a loaa ka mea e ola'i.
                E haalulu ana o Mareta, nanakea ka maka. Nana ka makuakane, a olelo, ua pololi paha oia. Pane ka makuwahine, aole paha; ua haawi aku au i ai, i mau mea ono nana, a na na keiki ma ke kula. Olelo ka makuakane, ua pau paha ia i ka haawi wale aku ia hai, me kana hana mau, a pololi oia.
                Makau loa o Mareta, a olelo me ka waimaka, Papa, mama, mai huhu mai olua ia'u. Loaa ia'u he poe pio e make ana i ka pololi, aloha wau, a haawi aku i ka berena, i na mea ono a pau, me ka ke Akua i kauoha mai ai, e hanai i ka poe pololi.
                Hewa oe, wahi a ka makuahine. Pehea la oe i aa ai e hana pela, a hoonele i na kaikaina, na kaikunane?
                Hanai ke Akua i na manu liilii, a hiki iaia ke hanai ia kakou, wahi a Mareta, me ka leo oluolu a akahai, e hoopau ana i ka huhu o ka makua.
                He wahi kupa i hanaia e ka makuahine e koe ana ma ka papa-aina, a haawi aku ia Mareta e ai. Ai oia, a paipai i ka makua e ai no hoi. Hoole kela, aole hiki ia'u ke ai, no ka nui o ke kaumaha.
                Pau ka aina, noi aku o Mareta i na makua e ae i kona hele ana i mau hora elua. Ae no laua, a honi ka makuakane iaia, a olelo, e hele ana paha oe i kau hana i maa ai, ke kokua ana i ka poe pololi; na ke Akua oe e hoomaikai mai, e kuu kaikamahine aloha.
                Hele o Mareta a hiki i ka hale o ka wahine i hanai i na kaikamahine a ka haku aina nona ka aina o ka ohana o Mareta. Aloha aku oia i ka wahine, a aloha mai ka wahine iaia, a koi iaia e komo iloko o ka hale e hoomaha ai. Ninau oia, e hele ana oe ihea? I ka hale o ka haku aina, wahi a Mareta. Heaha kau iaia? Ane hiki ole paha ia oe, ke kaikamahine ilihune, ke ike a hoopuka i kekahi manao iaia, ka haku nui a hanohano. He hana nui anei kau e ike ai iaia? Ae, he hana nui, wahi a Mareta; ikaika loa ko'u makemake e ike iaia. A hoea mai na kaikamahine elua a ua haku aina nei. O Maraia ka inoa o kekahi. Hai aku ua wahine hanai nei ia laua, ea, eia keia kaikamahine i makemake nui e ike i ko olua makuakane. Ae laua, ae pono ia, hiki no; aole oia e pale iaia; eia no ia ke hele mai nei. A kahea o Maraia me ka leo nui, e papa, e papa, e wikiwiki mai. A puka mai, olelo oia, eia keia kaikamahine i makemake e ike ia oe.
                Ua hoomakaukau e o Mareta i wahi olelo e hoopuka aku i ka haku aini ke ike iaia, oia hoi keia, "E aloha mai oe ia makou." Aka, i ke ku anu imua o kona alo, haalulu loa oia, aole hiki ke ekemu. Olelo mai ka haku aina, ahe! o oe no ke kaikamahine a'u i ike ai i keia kakahiaka e haawi aku ana i kau mau mea ono a pau i na pio pololi, a hele wale oe me ka ai ole. Makemake anei oe i kekahi mau mea ono?
                Hoole oia, aole, he mea okoa loa.
                Heaha ia? E hai mai; aole au e hoole i kau noi ke hiki ia'u ke hooko, wahi a ka haku aina.
                A lohe o Mareta ia mau huaolelo oluolu, pai i na lima ona, a moe ilalo imua ona, a hooho, E kuu makuakane, kuu makuwahine, e ola ana olua. E kuu haku e, ua aie kuu makuakane ia oe hookahi haneri dala; aole hiki ke hookaa, no ka nui o ka ua, o ka hua hekili, a-------
                U'oki oe, wahi a kekahi elemakule; he wahahee kau, i mea e pakele ai i ka hookaa i ka aie.
                Hoole nae ka haku aina, aole, he oiaio no kana; he kaikamahine maikai nei, ua malama pono ia e na makua; he kaikamahine manawalea, aloha, haawi wale i ka poe pololi. E ku oe iluna, e kuu kaikamahine; hoi aku i na makua, a olelo, apopo puka au ilaila. A eia keia eke dala, e lawe pu me oe, i mea e pono ai oukou.
                No'u anei keia eke dala a pau?
                Ae, nou no ia a pau loa wahi a ka wahine hanai.
                Ku oia a holo kiki, a puka i ka hale ua paupauaho a hina ilalo, a ane maule; a pohala mai, olelo, eia ka eke dala e kaa ai ka aie, a apopo puka mai ka haku aina.
                Ua ola lakou. Nani ka hana a ke kaikamahine, o Mareta. E hoohalike. L. L.