Ke Alaula, Volume VI, Number 1, 1 April 1871 — Page 1

KE ALAULA.
BUKE VI. HONOLULU, APERILA 1871. HELU 1.

HOAUAU HIPA.

                He hana nui keia a ka poe hanai hipa. Mamua iho o ka wa e akoia'i ka hulu o na hipa, holoiia lakou a maemae ka hulu. Ho-a ia na hipa a i kahi o ka wai, na kekahi poe e hookikina ia lakou e lele iloko o ka wai, a na kekahi poe e hopu iloko o ka wai a holoi iho a hookuu aku ma kela kapa. Nolaila ua kaawale na hipa maemae a me na hipa ekaeka. Ina he mau haneri a he mau tausani hipa paha, e pau ana iloko o na la elua a ekolu paha. Malamaia lakou ma kahi lepo ole a pau loa i ka hoomaemaeia, alaila hoomakaia ke ako ana. Aole i poho keia luhi o ka poe hanai hipa, no ka mea, ua oi ke kumukuai o ka hulu hipa maemae mamua o ka hulu ekaeka.
                Mahea la kahi i oleloia'i maloko o ka Baibala no ka hulu hipa?
                Mahea hoi i oleloia ai no ke ako ana i na hipa?
                Owai hoi ka i hoohalikeia me ka hipa imua o ka poe e ako ana?
                Owai hoi ka mea i pakele kona ola i ka hipa?
                Owai hoi ka i kapaia ma ka inoa "keiki-hipa?"
                No ke aha la i hoopiliia'i ua inoa la iaia?

KA PAPA POPOPO.

                Ua lohe paha oukou no ka mokuahi nui loa, i kapiliia ma Ladana mamua iho nei, a i kapaia "Ka Hikina Nui." O ka moku nui hookahi keia i oi aku i na moku e ae a pau o ka honua nei. Ua kapiliia keia moku me ka manao e hiki ke ee aku na ohua he eha tausani maluna ona i ka manawa hookahi. Ua kapiliia me ke akamai loa. Ua imiia na paahana oi o ke akamai, a ua waeia na papa a me na kua a me na hao i oi aku ka maikai a me ka ikaika. Hookahi nae mea popopo i hookomoia iloko o ua moku nei. Oia hoi ka hana ana ma ka La Sabati.
                Kapiliia ke kino o ka moku iuka a paa, alaila hoaoia ka hana e hoolana aku i kai. Ia hoao ana nae, aole hiki. Hooikaika loa lakou me na enekini mahu nui, a me na wili, a me ka lehulehu o na kanaka. Kauoia o mua, kooia o hope, paiia o lalo, aole no i hiki. Haihai na enekini mahu, paina na kaulahao, hai na koo, a make loa kekahi mau kanaka. Paa loa nae ka moku. Hala he mau hebedoma okoa o keia hana. Elima a lakou hoao ana e hoolana, a elima no hoi hoka ana. No ka nui launa ole o keia moku, ua hoohemahemaia ka ike a me ka ikaika o na kanaka a pau loa. Aole nae lakou i noonoo, o ko lakou hemahema nui oia no ko lakou hana ana ma ka La Sabati. No ka mea ua hana lakou i na la a pau, me ka hoomaha ole.
                Hoolanaia ka moku a ma ia mau la iho, make aku la ke poo akamai, kaulana, nana i kapili. Wahi a lakou, o kona hooikaika loa ana ma ka hana, oia ke kumu o kona make ana. Pela io paha, no ka mea ua malama ole i ka La Sabati.
                Hoomakaukauia ka moku a hoomaka aku oia e holoholo a e hoao i kana hana. Mahalo nui ia keia moku nui, maikai, a ikaika hoi. Aka, i kona holo mua ana, pahu kekahi enekini mahu, a pakele mahunehune na kanaka oluna o ka moku. Haohao kanaka i keia mea, no ka mea, ua kuuia ke akamai a pau e imi i na mea oi aku o ka paa no keia moku, eia ka, e pahu koke ana kekahi. Eia nae, hookahi mea paa ole i hookomoia ma keia moku, oia hoi, ka hana ana ma ka La Sabati.
                Hoihoiia ka moku i ke awa. Ilaila, kauoha ke kapena i na kanaka e holoi a hoomaemae i ua moku nui nei i ka La Sabati no. Noi aku lakou e hoomaha i kela la, a e waiho ka hana a i ka la noa. Huhu iho la ke kapena, a hoopaiia lakou no kela noi a lakou. He mau malama wale no mahope iho, a make kela kapena. I paholo iloko o ka wai ke kumu o kona make ana.
                Mai ia manawa mai a hiki i keia, aole i holo pono ka hana a ua Hikina Nui nei. Poho loa na dala o ka poe na lakou i kapili, a ua waiho wale ua moku nei no ka hapanui o ka manawa. Ua maopopo no he Akua mana ma ka lani e kiai ana i ka hana a kanaka, a e hoopai ana i ka poe malama ole i kona mau kanawai. A o ua Akua nei, oia ka Haku o ka La Sabati.

AOHE PUA ROSE I NELE I NA OOI.

                Iwaena aku nei au o kuu mala pua e pa'ipa'i i na kumu rose. Ike aku la hoi au i kekahi huihui rose nani maluna o kekahi kumu. I lalau aku ka hana e oki, eha ana kuu lima i na kui ooi o ua kumu rose la. Noonoo iho la wau. Pela no hoi na nani a me na pomaikai a pau o keia ao. Aohe pomaikai e loaa ia'na i nele i kona luhi a me kona luuluu. Ke imi nei na kanaka a pau i na mea a lakou i anoi ai, me ka hoomanawanui nae i ka eha a me ka luhi i mea e loaa aku ai. Okalakala no ka noho na o keia ao, aka, he mea hiki nae ia kakou ke hooikaika aku me ka hoomanawanui, i loaa ia kakou ka pomaikai, a me ka nani mau loa ma kela ao.