Ke Alaula, Volume VI, Number 5, 1 August 1871 — Page 19

KE ALAULA. 19

KA LAAU PUA ROSE A MERE.
LESENA 1.

                "E mama, e nana mai oe i kuu wahi rose ea, ua kupu, ua ulu ae, ua lau, ua lala, ua opuu, ua pua maikai, a nani na lau, popohe, onaona, a aala."
                "Ae, aka, e Mere, aole anei oe i hoomanao i ka wa mamua au i kanu ai ia, ane paupauaho oe no ka ulu koke ole ae."
                "Pela io no, ua kanu au ia, ua kipulu, ua ninini iho i ka wai, ua waele i ka mauu i hoohihi mai, ua nana au a loihi, a nana pinepine i ike au i ke kupu a ulu ana'e. Aole nae i loaa koke na aa. Mahope nae ua aa, ua puka, ua pii, a pii, a pii hou ae, a muo, a mohala, a nani kuu olioli i ka ike ana'e i na pua maikai."
                "E Mere, he mea olioli no i ka ike ana i na pua o kela ano keia ano, e hoopiha ana i ka ea, a i ka hale i ka aala maikai, a akoiia a kuiia me ke kaula makalii a lilo i lei e nani ai ke poo a me ka ai."
                "He mea haohao no nae," wahi a Mere, "nana oe, e mama, i na lau ke huli la ka, a kupono i ka la? no ke aha la? lokoino ea, aole nana iki mai ia'u ka mea nana i kanu a malama pono."
                "E Mere, io wai la kou huli a nana mau ana? i o'u la paha, ka makua nona mai kou mau pono, kou lole ulaula, kou lole mehana, kau ai e ulu ai. Pela hoi na lau, na pua, huli a nana lakou i ka la, nona mai na kukuna, ka malamalama, ka mehana, ka mea e ulu ai a e nani ai. Ke ao nei no hoi na lau, na pua ia oe, e Mere. Ua akaka anei ia oe ka lesena (haawina) a lakou e ao mai nei ia oe? Noho no o Mere, e milimili ana i kana kii keiki Pake, a noonoo a hoole mai aole akaka.
                "Aole anei oe, e Mere, i pule i keia kakahiaka?" "Ae, ua pule au, 'E ko makou Makua iloko o ka lani,' a pela aku, aole akaka ka mea i aoia mai ia'u ma ka nana ana o na lau i ka la."
                "Noonoo ole oe, e Mere, aole anei o Iesu ko kakou la, a pono ke huli a nana aku kakou Iaia, nona mai ka malamalama e ike ai, e hele ai, e hua mai ai na hua pono he nui wale? Ina aole kakou e nana aku ia Iesu a huli ae a nana i ke ao nei wale no, pouli wale ke ala, pouli ka naau, mae wale na pua uhane, a maloo a helelei na lau o ka pono."
                "Ke huli a nana aku nei anei oe e Mere ia Iesu? Ke komo nei anei ka malamalama o ke aloha iloko o kou naau?"
                "Pela no paha, aole paha, manao au ia Iesu i kekahi manawa, a kuhi au la he aloha ko'u Iaia, a he aloha hoi kona ia'u, a noho oluolu a olioli, a pomaikai wale au, aole nuku, a huhu, a olelo ino, a pakike, a hookuli, a uwe wale."
                Alia, ua lawa keia no keia lesena, mahope kekahi.

                O ke keiki akamai, hoohauoli oia i kona makuakane.
                O ke keiki lapuwale, hoouluhua mai oia i kona makuahine.
                Owai ka mea i loaa iaia ka wahine noho pono?
                He waiwai oia i oi aku i ko na momi.
                He hoopunipuni ke alohaia mai,
                He mea ole ka maka maikai
                O ka wahine i makau ia Iehova, oia ke hiilaniia. SOLOMONA.

KA HAIPULE KINO IKAIKA.

                Mamua ae nei, ua kohoia he keonimana i kahu no kekahi kula hanai o Nu Ioka. Komo kela ma kekahi o na makeke o ke kaona e huli ana i bipi no ka ohana; oki aku ia i ka uha i ka makeke, "e hoouna anei au i keia i kou hale?" Hoole kela me ka i ana "na'u no e hali aku ilaila."
                Kahaha ke kanaka o ka makeke, a ninau hou. "Nau no e hali i keia uha bipi?"
                "Ae, oia no kuu manao," wahi a ke keonimana.
                Nana hou no ke kanaka o ka makeke, me ka manao paha e koikoi loa ana, a he hapa ka ikaika o ua keonimana nei. I mai kela, "inu hiki ia oe ke lawe i keia uha bipi i kou home me ke kokua ole ohai, e haawi wale aku no au me ka uku ole."
                "He oiaio anei kau i mea mai nei?"
                "He oiaio loa." wahi ana.
                "E kokua mai oe i ke kau ana ma ko'u kua a e ike kaua i ka hiki ana ia'u e hali."
                Kau pono ia ma kona kua, a me ke kali ole ma ke alanui e hoomaha ua lawe ia i kona home; e hele pu ana no hoi ke kanaka o ka makeke, e kahaha nui ana i ka ikaika aole o kana mai o keia keonimana.
                I kahi la, ua hele keia haipule kino ikaika nei e kuai he iwakaluakumamalima paakamaa, a ninau mai ka mea o ka halekuai, "Ia oe no ka, ka hoihoi ana o keia mau kamaa..?"
                "Ae, a ina aole mea kokua, ua hiki no ke lawe he iwakaluakumamalima paakamaa hou aku i ka hale."
                Noonoo ka mea nona ka halekuai; huli ae i kona kokua malaila me ka i ana, "Keoki, e hoomakaukau he iwakaluakumamalima paakamaa hou aku no Mr. T. Eia hou, Keoki, mai lawe oe i dala no keia mau kamaa."
                O ke keonimana i lawe i ka uha bipi aole loa, e makau a hilahila paha e kau i na paakamaa he kanalima ma kona poohiwi ahoi aku.
                O keia kanaka ikaika, ikaika ma ka manaoio a me na hana, oia o Rev. R. G. Toles, ke kahu o ka "Home no na auwana liilii" o Bosetona.

                "Aloha kahi i kekahi."

                Ua kipa kekahi kanaka ma ka hotele ma ka moku aina o Penesilivenia, i ka la hoomalolo, a i kakahiaka ae, ua ninauia ina e hele ana ia la, pane ae la ia "aole." "A no keaha?" "No ka mea," wahi ana, "he loihi ke alanui a'u i manao ai e hele, a e wikiwiki ana au i hiki koke io. Ua maa au i ka holo lio, a ua hoomaopopo au i ka waiwai o ke kali ana e hoomaha i ka la Sabati; e oi ana na mile i hala i ka hebedoma ina e hoomaha i ko ka mea malama ole ia la."
                Aole e pomaikai ana ke kanaka i hehi wale i ka la Sabati. Manao paha ia he waiwai kona, aole anei lawe na waiwai, na pono o keia ao i na eheu a lele ae me he aeto la, a nalowale?
                Nolaila, e na kamalii, e hoomanao kakou i keia wahi moolelo no ka malama ana i ka la Sabti. "E hoomanao i ka la Sabti e hoano ia la." wahi a Iehova.

UA IKE KE AKUA MA NA WAHI A PAU.

                I aku kekahi makuakane i kana keikikane, "O hele, e lawe i keia puolo ma kahi o ko'u kaikuahine."
                "Ka, he la Sabati keia," wahi a ke keiki.
                "E hookomo i ka puolo ma kou pakeke."
                "Ua nana mai, a ua ike no ke Akua iloko o kuu pakeke," wahi a ke keiki.

HE PALAPALA MA KA ILI-KAMAA.

                Ua haawiia he wahi palapala liilii, he kumumanao pokole, i kekahi kanaka hana kamaa, a me ka heluhelu oleia, ua hooia ma ke kowa mawaena o ka ili oloko a me ka ili owaho o kahi kamaa e hanaia ana.
                Ua makehewa paha ka hana o ka mea haawi ia palapala? Aole no pela.
                A hala he mau malama ua noho kekahi kanaka hana kamaa e, i kakahiaka o ka la Sabati e hana i mau ili hou no lalo o ua kamaa nei. I ke oki ana i ka ili kahiko ike oia i ka apana pepa, o ka lalau no ia a heluhelu i ke kumumanao, oia hoi keia, "E hoomanao i ka la Sabati, a hoano ia la."
                Me he pua la i ku iaia mai ke kakaka o ke Akua. Waiho aku la ia i kana hana, a hele i ka luakini e lohe i ka ke Akua olelo. Kaumaha kona manao, a ma o Iesu la wale no kona hoomamaia ana.
                "Pela auanei ka'u olelo, ka mea puka aku mai ko'u waha aku, aole ia e hoi nele mai ia'u; aka e hana no ia i ka mea a'u i makemake ai, a e hooko io ia i ka mea a'u i hoouna aku ai iaia," wahi a Iehova ma Isaia 53:11.

                Owai o oukou e na kamalii i hiki ke hai mai i ka haina o keia olelo nane.
                He makuakane me na keiki eono, paluaia. Pa-kanakoluia na kaikamahine ia lakou na keikane he umikumamalua; ma kekahi papalina he eleele, a ma kahi he keokeo; aole ike lakou, kekahi i ka maka o kekahi, he iwakaluakumamaha hora wale no ke ola ana o kekahi.
                Owai ka makuakane, na keikikane, a me na kaikamahine maka ano e?

                O ke kanaka, e kokua an mamuli o ka hewa, e keakea ana no ia i ka pono.

                O ka pahu piha ole, ka mea keu ka walaau.