Ke Alaula, Volume VI, Number 5, 1 August 1871 — Page 20

20 KE ALAULA.

HELE IO IESU LA ANO.
Leo: "COME TO JESUS JUST NOW."--Songs of Gladness.

He-a Ie-su he-a Ie-su he-a Ie-su a-no, A-no he-a Ie-su, he-a he-su a-no.
2 E hoolohe, e hoolohe, e hoolohe ano,
Ano e hoolohe, e hoolohe ano.
3 Mihi pono, mihi pono, mihi pono ano,
Ano mihi pono, mihi pono ano.
4 Huli mai la, huli mai la, huli maila ano,
Ano huli mai la, huli mai la ano.
5 Maikai Iesu, maikai Iesu, maikai Iesu ano
Ano maikai Iesu, maikai Iesu ano.
6 Pili iaia, pili iaia, pili iaia, pili iaia ano,
Ano pili iaia, pili iaia ano.
7 Maemae iaia, maemae iaia, maemae iaia ano.
Ano maemae iaia, maemae iaia ano.
8 Ola iaia, ola iaia, ola iaia ano,
Ano ola iaia, ola iaia ano.
9 Oli iaia, oli iaia, oli iaia ano,
Ano oli iaia, oli iaia ano.
10 Haleluia, haleluia, haleluia amen,
Amen haleluia, haleluia amen.

NA NONANONA ME NA APIDE.

                Auwe! weliweli ka nui o na nonanona! aia ke pii la ke iho la ma ka laau! nana e ke kumu, e aha ana lakou? wahi a Mele. E uwi ana i ko lakou mau bipi. Kahaha, he mau bibi ka maluna o ka laau? auhea? Ke nana aku nei au iwaena o na lala, aole ikea he bipi. He ano bipi no nae e Mele, e nana oe i na nonanona e pii aku ana, he waiwai ea;—e nana hoi i ka poe e iho mai ana, piha a nani ea. No ke aha? no ka uwi ana i na bipi maluna, a piha i ka waiu.
                Pohihi nae ia Mele, a wehewehe ke kumu i ke anu penei. Aole he mau bipi maoli keia, aka he mau mea liilii loa e pipili ana i na lau, a e ai ana hoi i na lau, a piha lakou i ka wai o na lau. A pii na naonao, na nonanona a uwi, oia hoi ke omo ana i ua mau mea liilii la, a piha i ka waiu i omoia. Aole he keokeo keia waiu, he melemele ia me ka meli o na nalo meli.
                Pehea ke ano o ka uwi ana? ua hoopaaia anei na poo a me na wawae i ke kula e like me na bipi waiu? wahi a Mele; a noho na nonanona a hoopa na lima a uwi mai iloko o na bakeke?
                Aole pela; penei, paipai na nonanona ma na aoao o ua mau mea liilii nei me ko lakou mau nuku, me he mau o la, a hu mai kekahi mau kulu ono, a oia kai moniia. Me ke aha i omo, a moniia ai? me na ohe elua me he mau pepeiaohao tini la e kau ana ma ke kua.
                Kupanaha maoli! wahi a Mele. A pau ka waiu i ke omoia, alaila lele paha na nonanona maluna o ko lakou mau bipi a pepehi iho?
                Aole paha, hoopunaheleia lakou, a holoholo pu a malama pono, a kipaku aku i na enemi, a lawe a hoolei aku i ko lakou aahu ili i helelei i maemae lakou. Hakaka a aumeume, na nonanona kekahi me kekahi, i loaa ia mau mea liilii, a lawepioia kekahi a hoopaaia iloko o ko lakou mau lua i mea e pono ai lakou mahope.
                Nani ua mau bipi waiu nei; wahi a Mele, owai la ko lakou mau inoa?
                Api, a apide ka inoa. Ina hookahi, o api ka inoa, ina elua, ekolu, a lehulehu, o apide ka inoa; he inoa e paha ma ka olelo Hawaii, o uku lau paha, o puliki paha.
                Aole paha i ike au ia mau mea wahi a Mele. Kahaha ua ike no oe, makau a puiwa oe mamua aku nei, i ka ohi ana i mau pua rose i lei nou, a hoea mai na lau, na lala i paapu wale ia mau mea me he mau uku makalii omaomao loa la, a hoolei oe i na rose a holo hooho wale aku.
                He mau apide ka ia? Ae, oia no, a pili paapu lakou i na laau kope, na laau alani, i na laau he nui loa.
                Auwe, ke makau nei au, e holo aku au mai keia laau aku o helelei mai lakou maluna o kuu poo, wahi a Mele.
                Aole make makau a holo aku, aole lakou e helelei wale ua pipili loa i na lau, e omo ana i ka waiu i maona, a piha loa na opu, aole lakou e haalele, e o ana na nuku iloko o na lau a omo i ka waiu a lu wale aku no a loaa i na nonanona a pau i ke omoia e lakou.
                Nawai i imi a loaa neia mau mea liilii? wahi a Luiki, e haka pono ana kona mau maka iluna i ike i na apide me ka ike ole nae.
                Na kekahi kanaka makapo, Hubesa kona inoa. Loaa ka i ka mea makapo a ike ole kakou ka poe mea maka ike?
                Ae, he mea hoohilahila paka keia ia kakou. Nui wale na apide, he eleele kekahi, he omaomao kekahi, e pipili ana i na lau o na wilou, na piku, na pipi a pela aku. Kanaiwa apide liilii loa na ka api hookahi; umikumamakahi hanau ana i ke kau hookahi, a miliona, a miliona hou aku no lakou.
                Nohea ko lakou inoa, api, apide?, No ko lakou api ana no, no ke omo ana a pau ka wai o na lau.
                Hana ino ka lakou, a oi aku i ke ino o na uhini, wahi a Kopa.
                Oiaio no ia ina aole o lakou enemi. Aka, he mau enemi ko lakou, he mau buga, mea lele me na eheu omaomao, me na maka gula, na lakou no e ai a hooemi iho i na apide. Nolaila mai pepehi wale i keia mau buga.
                He wahi manao hoopili.
                He mau bipi waiu ano e ka oukou e na keiki, a he poe uwi waiu oukou. O ke ko kekahi bipi, ua paapu ia i ka waiu ono, he mau niho ka oukou, a me ia i nau ai i ke ko, a omoia a moniia na wai ono a piha a maona oukou. Mai hana ino i ke ko, mai aihue, a lawe wale, a haawi wale aku. Mai nau, a mama, a kui, a uwi a waiho iloko o ka pahu, a umeke paha, a hu a awaawa a lilo i rama. A inu a ona, a hana ino oukou i ke Akua nana i hooulu i ke ko a hoopihaia i ka wai ono i mea inu maikai aole i mea e ona ai.

HE MAU NINAU BAIBALA.

                1—Mahea i kakauia ai ka moolelo no kekahi kaula hookuli? a no kekahi kaula hoopunipuni?
                2--Ua kakauia anei kekahi mea no ke kaula ulaula? aia mahea i a no ke aha?
                3--He kauoha anei ma ka baibala, no ka ai ana, a no ka inu ana? mahea? heaha?
                4--Ua akaka anei ia oukou kekahi mea i kakauia no Iesu i kona wa kamalii? mahea?
                E imi i keia mau ninau, a loaa ole e nana i ke Alaula o kela malama.

                                He hewa ke hookuli,
                                Hewa ke wahahee;
                                Hoolohe, a haipule,
                                Olelo pololei.
                E Aui, e hoopaa oe i keia himeni.
                E Ioane, e hai paanau mai oe i ka pule kaena a kekahi Parisaio. Kuka 1:11-12.
                E Mere liilii, e hai mai oe i ka pule haahaa a kekahi lunaauhau. Luka 18:13.
                Kawai pule i hooponoia e Iesu?

                "No ke aha ko kaili ole i kekahi o kela mau pepa, wahi a kekahi keiki i kekahi, "aole mea malaila e ike i kau hana."
                "He mea no ilaila, malaila no au e ike ia'u, aole loa au e ae e ike ia'u e hana ia mau mea."
                Nana au i ke keiki i hoopuka i keia olelo kamahao,--he lole inoino, aka he maka ku i ka mahaloia. A manao iho la au, elua mea e ike ana i kou mau hewa, o oe a me kou Akua. Hoahewa kekahi, hoopai kekahi.
                Pehea la e pakele mai ka hoopai o ko kakou mau hewa? He makamaka no ko kakou oia o Iesu Karisto. I mai la ia, e hele mai i o'u nei, haalele i na hewa ma na wawae o'u. Ua make au i ola oe. Paulele ia'u, a na'u e uwo nou, a lilo i makamaka nou.
                Aole anei e aloha i ka hoaaloha oia ano, ka mea hookahi iwaena o na mea a pau?

NA NINAU BAIBALA HOU.

                1. He uhi anei no ka waa kome kahi i hookomoia ai o Mose? Ua uhiia paha, aole paha?
                2. Owai kai hoopakeleia i kona mau enemi ma ka hookuuia ana maloko o ka hinai mawaho o ka pa?
                3. Owai ke keiki i loohia i ka eha ma ke poo oiai e noho ana ma ke kula?
                4. Ma ka hora ehia ia?
                5. E ola ana anei ka makuakane a me ka makuahine?
                6. Ua hoihoiia anei ke keiki i ka hale?
                7. Ua make anei oia?
                8. Nawai ia i hoola?
                9. Pehea ka hoola ana?
                E huli oukou i na haina no keia mau ninau, a hoike mai ma ke kula Sabati. Mai molowa i ka imi ana.

                E Iulia e hoopaa oe i keia pauku mele:
                                He pokii au, ua hewa nae;
                                E Iesu e aloha mai,
                                A nau kuu hewa e hoopau
                                A lilo au i keiki nau.