Ke Alaula, Volume VI, Number 6, 1 September 1871 — Page 22
22 KE ALAULA.
na himeni a me na pauku i haawiia e hoopaa, e ao a mele ma na kula Sabati i na mele, na leo mele i pai malamaia. E imi a noi aku paha i na makua i na hapaha o ke Alaula, i ole oia e pololi a make. Hoolakoia kela me keia keiki ike i ke Alaula pakahi, i ole e aumeume a hakaka no ka nele o kekahi.
2. Na Makua. E ala, e kokua i na keiki i ka hoolako ana ia lakou pakahi i ke Alaula. Mai minamina i ka hapaha; a e heluhelu pu me na keiki i akaka ka waiwai oloko, i waiwai pu me lakou. E paipai a kokua i na keiki i ka malama pono i ke Alaula; e hana i wahi e waiho ai i maemae, i ekaeka ole, i ole e haehae ia, i ole e nalowale.
3. Na Kahu Ekalesia. O na keiki kekahi hapa o ko oukou ohana hipa, lakou na hipa keiki, ia oukou ka hanai a kokua ana ia lakou. Ia oukou ka hooponopono ana i na kula Sabati a e nana i pau na keiki oloko, a e koho i na kahu kupono a e paipai pu no ka hoolako ana i na kula Sabati i ke Alaula me ka imi pu i ke dala e kaa ai. Pehea, ua lako anei ko oukou mau kula Sabati a pau i ke Alaula? O ka poe i nele e hai koke mai ia'u a e kauoha mai ia'u e hooili aku, i ehia no kela, no keia kula i nele? Me ke dala pu hoi.
4. Na Kahu Kula Sabati. He hana nui ka oukou ka hoonaauao a hoohuli i na keiki ma ka pono, ma ka baibala ka nui o ke ao ana, aka o ke Alaula kekahi mea kokua. E paiia ana na ninau baibala iloko, me na haina hoi, me na pauku baibala, a me na himeni. E hooikaika loa oukou i lako na haumana i ke Alaula i heluhelu hoi, a hoopaa a malama. E koho i na kumu kupono e kokua pu ma keia hana maikai.
5. Na Kumu Kula Sabati. O oukou kekahi poe e pono ai e lako ai ka oukou mau papa haumana i ke Alaula. E hoolako ia oukou iho, e nana, e heluhelu, e huli i maopopo ko loko, e heluhelu pu me na haumana, e niele aku a e hoomakaukau ia lakou ke ninaninauia aku. E kokua hoi ia lakou i ka malama pono ana.
Ina e ala keia mau papa elima a hana i na mea i kauohaia aku nei, a ina hoi e kokua pu mai ka uhane o ke Akua, alaila e holo pono ana ka hana a ke Alaula ma keia hope aku.
Owau no, L. LAIANA.
Lunahooponopono.
Waimea, Hawaii, Iulai 28. 1871.
KA HELUNA O NA KANAKA O KA HONUA NEI.
Ka nui ma Amerika....................86,996,871
Ka nui ma Europa.................... 293,513,035
Ka nui ma Asia.................... 805,419,908
Ka nui ma Aferika.................... 190,950,000
Ka nui ma Auseteralia a me Polenesia....................4,000,000
Huina pau....................1,380,880,423
KA HELUNA O NA HOOMANA.
Ka nui o na Ka tolika....................195,470,200
Ka nui o na ekalesia Helene....................81,478,000
Ka nui o na Protestane, oia hoi ka Hoole Pope....................107,335,000
Ka nui o na Mahomeda....................160,000,000
Ka nui o na Pegana, oia hoi ka poe Hoomanakii.................... 600,000,000
Ka nui o na Iudaio.................... 6,000,000
Iwaena o keia lehulehu na 3,00 olelo e, a ua 1,000 ano homana.
NA HAUMANA KULA ME KA EKE HUA.
I kekahi la e hoi ana o Holo, Anaru a me Ienekina i ke kula mahope o ka lakou hele ana i ka nahelehele, no ka mea he hapa la hoomaha ia no lakou; hiki lakou ma kahi malumalu o ke alanui Omaomao, halawai pu lakou me kekahi kanaka e holo ana maluna o kekahi kaa mama, e like me ka mea e wikiwiki loa ana, no ka mea ua holo kuku ka lio.
E na keikikane, (wahi a ke kanaka), no kela hale kula i hala iki ihope paha oukou? Ae, nolaila makou.
Ea, ua haule kekahi eke hua mai loko aku o kuu kaa, ua loaa ia ia'u ma ke kuai ana me kekahi luwahine ma ke alanui, i ko'u hele ana mai. Aole hiki ia'u ke hoi aku, aole paha e hele hou mai ana wau ma keia ala; ina loaa ia oukou kela eke hua, e mahele no oukou me ko oukou mau hoakula.
Mahope iho o ko lakou aloha ana i keia kanaka, holo aku o Holo, Anaru a me Ienekina me ka mama loa e huli i ka eke hua; me ka ike ole, aia ka lakou kumu ma kela aoao o ka pa laau, a ua lohe oia i na huaolelo i oleloia a pau loa e lakou.
Aole liuliu a loaa ia lakou ua eke hua la i piha i na hua maikai e hinuhinu ana. Olelo koke o Holo, e, na kakou e mahele na kokou. Ae koke o Anaru i keia olelo; aka hoole o Ienekina me ka olelo, aole pono ia kakou ke hana pela, no ka mea, o na hua na kakou ia me ko kakou mau hoa kula.
Ku lakou a kamailio liuliu, alaila noho o Holo me Anaru me ka eke hua mawaena, ua weheia, aia hoi, ua hoea mai ka lakou kumu.
Auwe! makena ko oukou mau hua, wahi a ke kumu. I kuu manao ana aole hiki ia oukou ke ohi i ka hapalua o kela ahua hua i keia wa pokole.
Ninau ke kumu ia Holo, mahea kou ohi hua ana, ma na alanui paha, ma ka ululaau paha? Ane olelo o Holo ma ka "ululaau," aka, manao oia mamuli paha e ninauia, nohea mai ka eke, nolaila olelo oia penei: "Ua loaa keia eke hua ia makou ma ke ala, a e mahele like ana no makou." He oiaio keia, aka, aole he oiaio a pau loa.
Alia, aole pomaikai na mea a pau e like me keia ma ka loaa ana i eke hua, no ka mea ua hele au ma ke alanui i na hora i hala aku la, aole au i ike i kekahi mea e like me keia; heaha kou manao e Anaru? E pono paha ke huli i ka mea nana keia eke?
No ka makemake o Anaru e hoike maopopo lea no lakou ponoi na hua, olelo oia penei i ke kumu: Ua halawai pu makou me kekahi kanaka maluna o ke kaa mama, a olelo oia ia makou, ina loaa ia oukou kekahi eke hua i haule, e mahele like me na keikane o ke kula o oukou, aka, mahope mai, ku malie oia ma kona kaa, a olelo me ka leo nui, makehewa ka mahele iwaena o oukou a pau loa, aka e mahele no oukou wale no.
O keia he oiaio ka hapa mua aka ua hoopiliia kekahi mau huaolelo hou, aole i olelo ia e kela kanaka.
Ano e, olelo mua oia me ka lokomaikai i ke kula a pau, alaila loli ka manao e like me ka mea aloha ole. He wahi kuhihewa paha ma keia mea.
E Ienekina, e hai pololei mai oe i ka oiaio o ka olelo a kela kanaka, me ka huna ole i kekahi huaolelo, a me ka hui ole i kekahi huaolelo me kana.
Alaila hai aku la o Ienekina i ke kumu penei: "A maopopo i kela kanaka no ke kula makou, hai mai oia, ua haule kekahi eke hua na kekahi luwahine i kuai, me ia, a no ka lawa ole o ka manawa, aole hiki ke kii aku, a, a aole paha au e hele hou ana ma keia ala, a ina loaa ia oukou, e mahele me ko oukou mau hoakula."
O kana ka oiaio, ka oiaio a pau loa, a o ka oiaio wale no.
Ae maikai, wahi a ke kumu, no ka mea, aia wau ma kela aoao o ka pa laau, i ka manawa e kamailio ana ke kanaka ma ke kaa, me oukou, a ua lohe au i na huaolelo a pau loa, a ua maopopo ia'u, he olelo oiaio a pololei ka Ienekina.
E mahele like ia na hua iwaena o na haumana, aka, o oe e Ienekina e lawe oe i na mahele o Holo a me Aneru a hui pu me kau.
E hoomanao i keia, ina e hai i kekahi hapa o ka oiaio, a ina hoopili i kekahi olelo hou me ka oiaio, ua like ia me ka wahahee.
O ka eke hua ua maheleia no na haumana a olioli lakou, koe nae o Holo me Anaru.
Ua ike no o Ienekina ke keiki oiaio ia, aka, o Holo me Anaru makemake paha laua e huna i ko laua maka no ka hilahila.
O ka oiaio he pohaku maikai ia, a e pono i na keiki a pau e lawe a aahu i keia ma ko lakou poli.
O na lehelehe wahahee he mea hoowahawaha ia i ke Akua, aka o ka mea hana oiaio oia ka mea e olioli ai ke Akua.
"O ka nani o ke kanaka, oia kona lokomaikai. Maikai hoi ke kanaka ilihune mamua o ka mea wahahee." F. M.
KE ALAULA,
He Nupepa Hoikeike Kii,
Hoopuka mau ia ma Honolulu, i kela malama keia malama e ka PAPA HAWAII, no na Kamalii Hawaii.
25 keneta ka uku no ka makahiki no ka pepa hookahi; 20 keneta pakahi ka uku no na pepa he iwakalua a oi aku ma ke ope hookahi, ME KA HOOKAA MUA IA MAI.
L. LAIANA, Luna Hoopuka.