Ke Alaula, Volume VI, Number 7, 1 October 1871 — Page 25

KE ALAULA.
BUKE VI. HONOLULU, OKATOBA, 1871. HELU 7.

KOKUA I KA POE PILIKIA.

                I ka hele ana o Rev. Geo. Herbert ma ke alanui o Salisbury, ua halawai me kekahi kanaka ilihune; ua haule kona lio wiwi nawaliwali, no ke koikoi o ka ukana, a ua pilikia nui ua kanaka nei.
                Aloha no o Mr. Herbert iaia i ka ike ana i keia pilikia, a noonoo no kela he hana hoohaahaa paha keia a ke Akua i haawi mai iaia e hana; a me ke kali ole, ua hoopoina i kana oihana, a ma kona aahu kahunapule, e kokua i keia kakanaka i ka wehe ana i ka ukana o kona holoholona.
                Piha ka naau o keia kanaka ilihune i ke aloha no ka lokomaikai mai o Mr. Herbert iaia, a i ka hoike ana i kona manao, ua i aku o Mr. Herbert penei: "O ka mea e aloha ana iaia iho, ua pono e malama i ke ola o kona holoholona."
                Hele aku no keia kahunapule i ka luakini e like me kana hana mau, e hoolohe i ka ogana a me na mele maikai. I ka hiki ana ilaila ua kahaha nui na makamaka himeni ona i kona hiki ana ilaila me na lole ekaeka, a ua ninauia ke kumu.
                I ka hai ana i ka mea ana i hana'i; ua i mai kekahi, "e hoohaahaa wale ana oe ia oe iho ma ia hana lepo."
                "E kuu makamaka," wahi a ke kanaka maemae ma ka naau, "o ka noonoo ana ma ka mea a'u i hana iho nei, e lilo ana i mele maikai no'u i na hora aumoe o ka po; a o ka hana ole ua lilo paha ia i mea hoohalahala no kuu lunaikehala; no ka mea, ina e pule ana au no ka poe loohia i na pilikia, ua kupono loa ia'u e hana e like me ka'u pule ana, a e kokua aku ia poe pilikia ma na mea hiki ia'u.

KA MEA A KA PUA ROSE I AO MAI IA KAKOU.

                Ka pua rose, ka pua rose nani. Owai ka mea makemake i ka rose? Oia ke alii wahine iwaena o na pua a pau. E oi paha kekahi mau pua e ae ma ka nui a ma ka nani o na waihooluu, aka nae, ma ka maikai maoli a me ke ala oia ke pookela o lakou.
                Pono i ke kaikamahine e malama i kumu rose nana; a o ke keikikane e kanu i kumu rose ma kona mala pua. He kumu ao ka pua rose! Kahaha paha oukou me ka manao he ano e keia kumu ao, aka he kumu ao no ia. Ua paa kona mau lau a pau i ke kakauia me na haawina maikai. Ke kau la na haiao ma na wahi oioi o kona mau lala.
                E hoikeike ana na lau i ka poe ui me na helehelena maikai, i ka palupalu, ka nawaliwali o lakou. E ao mai ana ia lakou e hoomakaukau no ka mae ana; nolaila, mai kaena a hookano lakou no ka nani o na kino o lakou. E i mai ana, "no ke aha kou hookano e ke kaikamahine opio no keia nani mae koke ou; e mae ana paha oe, a e pau ana i ka lima menemene ole o ka make."
                E ao mai ana na oioi no na kaumaha i kawili pu ia me na lealea o keia ao. I mai no hoi, "ina e lilo oe i na mea hoohauoli wale no ma keia ola kino, e loaa ana no na eha, na kaumaha, na luuluu i hunaia mawaena; he kaumaha koikoi e ukali ana i kela lealea keia lealea o kanaka."
                Aole he mahaoi wale ka pua rose. Kulou iho kona poo nani, aole hookiekie ae, me he la e kaena ana no kona nani, a huli i o ia nei, me he la e ia ana, e nana mai ia'u, he nani lua ole ko'u, e mahalo mai ia'u. Aole no, he haahaa, he nani, nolaila ua makemakeia, a ua mahalo nui ia.
                E hoohalike oukou e na kamalii me ka pua rose ma kona mau hiohiona maikai.
                He pua lokomaikai. Ola ia no ka pono o hai. Oluolu ka maka ke nana i kona nani, a ua lealea i ka honi ana i kona ala. Hana oia i na mea e pono ai keia honua.
                E na kamalii e lokomaikai oukou, e ola no ka pono o hai. E hoohalike me ka rose ma ka home, ma ke kula, ma na paani, e hoike ana i ke aloha i na hoa.

KA BAIBALA POMAIKAI.

                I ka wa hoomaau nui ma Sekotia, e holoholo ana na koa i io ia nei e kipaku ana i kanaka mai ko lakou home ae, e puhi ana i na hale i ke ahi, a e pepehi ana i na haipule, ua hai kekahi makua haipule i kona ohana i ke kokoke ana mai o na koa, a o ko lakou pono e hele i kekahi kaona e kokoke mai ana, kahi e ku aka he luakini kahiko, he ikaika nae, e lilo ia i papu no lakou i ole poino lakou.
                I aku oia ia Rose e lawe i ka Baibala nui, oia kana ukana, a e malama loa o pulu, a nalowale paha ma ke alanui, no ka mea, aole hiki ia lakou e ola ke lilo ia buke maikai, wahi ana.