Ke Alaula, Volume VI, Number 7, 1 October 1871 — Page 27
KE ALAULA. 27
HOIKE KULA SABATI MA WAIMEA, HAWAII, I KA LA 11 O AUGATE.
S. H. Mahuka ke kahu; L. Laiana ka Lunahoomalu.
Elua no kula, ke kula kamalii kaawale ma ke kakahiaka o ka Sabati, a ma ke awakea hoi kekahi hapa. Ekolu kumu kane, elua kumu wahine.
Ke kula hui o na kanaka makua me na keiki ma ka Sabati awakea. Eha kumu kane, ekolu kumu wahine. 60 haumana ma ke kula kamalii kaawale; 50 haumana ma ke kula hui, a oia 50, he 20 wale no kanaka makua. Aole makemake na kanaka makua i ke kula Sabati. Makemake ka nui e hoi a hiamoe. Ala nae na kamalii a hele mau no i ke kula.
He la ua no ka la hoike. Ua akoakoa no nae na kumu me na haumana ma kahi i hoonoho huakaiia'i, a naue like ma na papa palua me na hae keokeo liilii malalo iho o B. W. Kealoha ka lunahooponopono, a hiki i ka luakini. A pau lakou iloko alaila ua hoomakaia na hana. Nui loa na hana, loihi ka programme, e 2 pepa okoa. E hai pokole ana au i na hana no ke Alaula.
Ekolu no kaapuni ana ma ka hoike ana. Ma ke kaapuni mua, ha mau pule, he mau ninau kela papa keia papa, ma na haawina i kulaia'e, a he mau mele. Ma ka pau ana o kela a o keia papa ke mele ana. Mele ka papa wale no i kekahi manawa, a i kekahi manawa mele ke kula a pau.
Ma ka pau ana o ke kaapuni mua, he wahi paina iki ma na mea ono a ka Pake.
Ke kaapuni elua ua like ke ano me ke kaapuni mua, okoa iki nae na haawina me na mele. Na haawina ma keia mau kaapuni elua aia no lakou ma na Euanelio eha, a ma Ezekiela. Okoa ke kaapuni ekolu; he mau pauku, a mau himeni i haipaanaauia mai e na papa kamalii, a he mau ninau baibala paakiki mawaho o na haawina he 50 paha kai haiia mai e kela a e keia papa, a holo loa ka hoike ana i na haina. A he mau mele no hoi i meleia.
Eia na inoa o kekahi mau leo mele: Thanksgiving, Halelu 117; Kahuhipa Maikai; Hosana Kamalii, ma ka Hae Hoonani; Hosana Kamalii, ma ka Lira Kamalii; Ka Iesu Kamaiki au; Aina ma o; Mai paupauaho oe; Tramp, tramp; Ili iki; Mele oli ae April Shower; Come to Jesus; Give, O give; Just before the battle Mother; Mountain Horn; We are marching on, Nauwe ae kakou.
Nani wale ka himeni ana. He hoike maikai loa keia. Ua oi loa mamua o na hoike mamua aku. O ka papa nae i oi oia ka papa keiki liilii a Laiana wahine, ua 20 a oi lakou. Ma na hana a Iesu ka hoike ana, a holo loa na haina. Maikai na mele, na lakou no i alakai ia lakou iho ma ke mele ana. He mau manao paipai no ma ka pau ana, a hookuuia ma ka pule ia S. H. Mahuka, ke kahu.
KE ALAULA,
He Nupepa Hoikeike Kii,
Hoopuka mau ia ma Honolulu, i kela malama keia malama e ka PAPA HAWAII, no na Kamalii Hawaii.
25 keneta ka uku no ka makahiki no ka pepa hookahi; 20 keneta pakahi ka uku no na pepa he iwakalua a oi aku paha ma ke ope hookahi, ME KA HOOKAA MUA IA MAI.
L. LAIANA, Luna Hoopuka.
NA UWINIHEPA ELUA.
Heaha ka uwinihepa? he pohaku ula ia. Ua akaka i ka nui o kamalii. Na kamalii kuaaina loa nae kai ike ole paha. O ka poe e noho ana ma Honolulu a me ka poe i hele ilaila e makaikai ua ike lakou i na hale uwinihepa, oia hoi na hale pohaku ula e ku paapu wale ana malaila. Ehia la papa aniani o kekahi? Ehia hoi pohaku ula maloko o na paia o ka hale hookahi? Makena wale paha.
Ma ke kauwahi ua nele ka ekalesia me na kanaka i ka luakini ole. He kahunapule no aole nae he halepule. Ma ka hale aha la ko lakou hoomana ana? Ua makemake no lakou e loaa ka hale. Ua hui a kuka pinepine lakou no ka hale, he hale aha ? he hale laau anei? he hale pohaku ula paha? O ka hale pohaku ula ka makemake, aka, pehea la e loaa ai? Nui wale na pohaku e paa ai. Uuku hoi kakou, a ilihune hoi. Ina hoomaka e kukulu a paa kekahi hapa a paa ole kekahi, akaaka mai ka poe e maaloana a henehene paha ia kakou--a, nani ka hilahila.
E pau wale ana ka manawa i ka lilo ana ma ka manao kapekepeke, aole oni ae e hana. A i kekahi la e ku ana kahi keiki uuku ma ka puka o ka hale o ke kahunapule e kikeke ana; hele kekahi e wehe i ka puka a ninau iaia, heaha kou makemake? Makemake au e ike i ke kahunapule. Kahaha! he keiki uuku oe, aole paha e ae ke kahunapule e hele mai e ike. Aole, ua pau ko'u manao e ike iaia. Ua paa oia i ka hana, huhu paha oia ke kii aku me ka olelo he wahi keiki uuku e ku ana ma ka puka, e koi ana e ike ia oe. E kii nae; aole au e hoi ana aia a ike i ke kahunapule.
Ua kiiia ke kahuna a ua hele mai a aloha i ke keiki, a ninau heaha kou makemake, e ke keiki liilii? Ua pololi anei oe, a lole ole, a makemake i wahi ai, i wahi lole? Aole, ua lawe mai au maluna o kuu wahi kaa uuka, (huila bala) elua pohaku ula i mea kokua i ka luakini hou. Hele no ke kahuna e nana, aia hoi he oiaio no, e kau ana na pohaku ula elua ma kona huila bala. Hoi ke keiki me ka olioli, ua ike au i ke kahuna a ua haawi aku i ko'u kokua no ka luakini hou, a ua oluolu oia ia'u.
Hele koke aku ke kahunapule ma na alanui a hai aku i kela a i keia kanaka i halawai pu ai me ia, ea, e paa ana ka luakini, ua loaa ke kaa pohaku mua aia no ia ma ke kahua.
Ke ala no ia o na hoahanau, o na kanaka a pau, e hana i ka luakini a paa a maikai loa, a hoolaaia ka no Iehova. O na pohaku elua o ua keiki lilii nei ke kumu paipai e paa ai.
E na keiki liilii mai Hawaii a Niihau, aole anei he hiki ia oukou ke hoohalike me keia keiki uuku, e kokua i elua pohaku, keneta, lepeta, dime, hapawalu, hapaumi pakahi no ke aupuni o ke Akua?
Ehia oukou? Elima paha tausani. Elima tausani dime i paluaia ehia dala? He mau dala uuku anei ia?
Nolaila o na haumana a me ka kumu kula Sabati e hoomanao i keia wahi moolelo no na uwinihepa elua i paa ai ka luakini okoa, a e lilo hoi keia i kumu paipai no kakou. Mai pi, a molowa i keia hana maikai ke kokua ana i na keiki pegana. Na keiki i ike ole i ka Haku.
KA PAPA POHAKU KE KUMU.
O wai ke kumu? he papa pohaku ka! Pehea la e hiki ai i ka papa pohaku ke lilo i kumu? he nuhou paha ia! He olelo hoopunipuni paha kau e ke kahu kula e; a i ole, e hai mai oe i ke ano.
Ae, e hai aku no au, aka, aole paha pono i ka papa kula oonei e koho a e hoonoho i ka papa pohaku i kumu iloko o ka hale kula ma Hawaii nei. E kii paha na haumana, a wawahi paha, a hoolei okoa paha iwaho o ka hale; a i ole ia e lilo ia i kumu alakai hewa.
Kahaha, e hai koke mai oe i ke ano o keia kumu papa pohaku.
Alia mai paupauaho oe e Luiki. Penei nae: he kumu wahine maloko o kekahi kula aupuni; a i kekahi ahiahi ua pilikia oia, ua kiiia e hele i kauwahi e ike i kekahi makamaka. A lawe oia i ka papa pohaku a kakau iho i na inoa o na haumana a pau. A kauia ma kona noho. A olelo oia, e a'u mau haumana nei, e hele ana au i keia ahiahi; a eia kuu pani keia papa pohaku. E hoopaa oukou i na haawina, e noho malie, mai walaau, mai kolohe. O na keiki hoolohe a noho pono, e kakau kela me keia i kaha 1, kupono i kona inoa ma ka papa. A o na keiki hoolohe ole, a walaau, e kakau kela me keia i pea X e pili ana i kona inoa. A waiho i ka papa ma ko'u noho. A apopo hele au maanei a nana i ka papa, a ike i na kaha kahi a me na kaha pea, ailaila e hookolokolo au i ka poe i kaha pea ia.
Ae na haumana, ae, maikai kau, he kumu ano e keia, e hoolohe nae makou, a hana e like me kau e kauoha mai nei.
A hala ka po a ao ae, a hoi ke kumu wahine i ka hale kula, nana aku la oia i ka papa pohaku e ku ana ma kona noho; oia hoi ike oia i kekahi kaikamahine ana i aloha a mahalo nui ai mamua ua kaha pea ia ka oia, e pili ana ke kaha pea i kona inoa. Kahaha loa oia, me ka minamina oloko, kahea aku, e Mele, hele mai oe, ea, ua hewa ka oe? e hai pololei mai oe. Ae, ua hewa au. Ua nana aku au i ke kumu au i hoonoho ai ma kou noho i pani nou, he papa pohaku eleele, a akaaka au, a akaaka hou, a akaaka loa aole hiki ke uumi.
Mahaloia keia kaikamahine no ke kiko ana iaia iho, no ka mea na kona lima no i kakau i ka pea ma kona inoa; a ae koke hoi oia i kona hewa aole i hoole. Mau ke aloha o ke kumu iaia; a kala koke hoi i kona akaaka hiki ole ke uumi.
Ae, maikai wale ua kaikamahine la, o ua Mele la, he anela paha, no Amerika paha, aole no onei, haunaele makou ke hele ka makou kumu a lilo ka papa pohaku eleele i pani nona. Aka, e hoao oukou e na keiki Hawaii e hoohalike me keia kaikamahine. E noho malie no. A ina ua hewa e ae koke, mai hoole. E mihi nae, a hoao hou e noho pono.
E Rebeka e, e hoopaa oe i keia pauku himeni e hai mai.
"Iesu, e ke kahuhipa,
Kahuhipa maikai e,
Nau e alakai malie
Ia makou na pokii nei,
E aloha, e aloha
E hiipoi a hanai mai."