Ke Alaula, Volume VI, Number 11, 1 February 1872 — Page 41

KE ALAULA.
BUKE VI. HONOLULU, FEBERUARI, 1872. HELU 11

SUKI HAO.
HELU 3.
E KOKUA ANA O SUKI I KA ELEMAKULE.

                A hala o Suki i ke kula, hui na kanaka a lalau a hapai ae i ka elemakule, ia Paulo, a ae oia e lawe ia i kona home. A kii aku lakou i ke kahuna lapaau, a hele mai oia a nana a ike, ua eha loa o Paulo ma kekahi wawae, aole e ola koke ana, e paa ana i mau pule paha iloko o kona hale. Aole nae i ae oia e noho pu kekahi me ia, i ka manawa wale no e wahi ana lakou i kona eha, a pau ia, hoi lakou, a koe ka elemakule wale no.
                Ia Suki e kala ana, kau pinepine kona manao ma ua elemakule nei. A po ae hoi oia i kona home a hai aku i kona makuwahine i ka pilikia i loohia ai o Paulo Olomana, a noi aku iaia e ae e hele oia e nana a ike i ke ano o kona noho ana.
                "Kahaha! he elemakule maka ino oia, makau paha oe ke hele oe hookahi wale no; i kokoolua nou," wahi a ka makua. Hoole o Suki, "aole o'u makau, aole hoi makemake i kokoolua, owau wale no ke hele." Ka ae no ia o ka makua, a hoopiha o Suki i kana hinai i na mea ono he nui a hele aku. I ka hookokoke ana aku i ka puka o ka hale, ane maule kona naau i ka makau, aka hele wiwo ole aku no oia i ka puka, a kikeke—aohe leo pane mai— kikeke hou aku no, aole he pane mai. Alaila hapai oia i ka laka a wehe ae i ka puka.
                "Hele pela, heaha kau maanei," wahi a ka elemakule, me ka leo nunulu, e ala huhu ae ana mai kona wahi moe, a e kikoo ana ka lima i loaa kona kookoo, I ka ike ana nae o Suki i keia, moe hou oia ilalo.
                "O Suki Hao au," wahi a ke kaikamahine opio, me ka olelo kapekepeke, me ke kolo malie ana a hala ka paepae wawae; a ua hele mai au ma keia po e nana a ike ia oe i kou pilikia i ka hiki ia'u ke kokua,"
                Kaupono ka maka o Paulo ma ke kaikamahine no ka manawa pokole me ka pane ole aku. A mahope iho pane nunulu mai oia "Heaha ia ia oe? No ke aha kou hele ana mai?"
                "No ka mea ua kaumaha au no ka hana kolohe ana a na keiki ia oe, i keia kakahiaka, a no kou eha ana nohoi," wahi a Suki me ka haloiloi ana o na maka i na waimaka; "a no ka mea aole ou mea nana oe e aloha a malama, a hoopomaikai mai."
                "He oiaio no ia;" wahi a ka elemakule me ka olelo awahia.
                "Aka, e hiki no ia'u ke malama ia oe," wahi a Suki me ka leo aloha. "Nui kuu manao ana ia, oe, a me ko'u pule ana nou, a—a o Iesu kekahi, he manao nui kona ia oe, ae, akaka loa ia'u kona manao malama ia oe."
                Noho hakanu ka elemakule a loihi, a mabope pane malie iki mai oia, "O hoi oe, aole o'u makemake e noho hou mai oe maanei."
                Lawe o Suki i kona hinai a waiho imua o kona alo, a olelo, "ua lawe mai au i kekahi mau mea ai nau, no ka mea, he mea eha paha ia ia oe ke ala iluna." Alaila, huli ae oia e hoi aku, a ninau aku nae, "e hiki anei ia'u ke hele hou mai?" "He mea aha ia ia'u? aia ia oe ia," wahi a Paulo Olomana.
                Ka hoomaka keia o ko Suki hele ana i ka hale pepepe e ike ia Paulo ka elemakule, maka ino a oolea. He makau ole ke aloha.

HELU 4.

                Ma ke aloha a me ke ahonui i waele ai o Suki i ke alanui e hiki aku ai i ka naau paakiki o Paulo Olomana. Ua wehe oia i ka puka o kona hale, a hookipa olioli ia o Suki iloko o kona hale inoino, pouliuli, a nele i na mea e oluolu ai ke kino. Ua ilihune a pololi, a kapa mahana ole, ua lohe ole i na hua maikai o ka Baibala.
                Mehameha loa kona hale, oia hookahi wale no ka iloko, aole ona kokoolua. Aloha ole oia i na kanaka, aloha ole hoi kanaka iaia, makau loa kamalii iaia a holo ke ike a hailuku ka poe kolohe iaia me ka pohaku. O Suki Hao ke kaikamahine i aloha nui iaia.
                Mahope, o koha ae ana e hele o Suki i kona hale, hele pinepine oia ilaila, me ka lawe pu i na mea ono, i ka supa, i ke ki, i ka raiki; a noho a loihi e heluhelu i ka Baibala, i na olelo maikai a Iesu. I kekahi manawa heluhelu oia ma Mataio 11:28, "E hele mai oukou a pau loa io'u nei e ka poe luhi, a me ka poe kaumaha, a na'u oukou e hoomaha aku." A helelei na waimaka o Paulo i ka lohe ana i keia mau olelo hooluolu. A i kekahi manawa heluhelu oia ma I Timoteo 1:15, "Eia hoi ka olelo oiaio, e pono e malama nui ia. Ua hele mai o Iesu Kristo i ke ao nei, e hoola i ka poe hewa; owau no ko lakou mea oi." A i ka lohe ana o Paulo i keia, ninau koke oia, "E Suki, e hiki anei ia Iesu ke hoola mai ia'u i ke kanaka oi loa ma ka hana