Ke Alaula, Volume VI, Number 12, 1 March 1872 — Page 46
46 KE ALAULA.
pahu poepoe e like me ka pahu barela kamano. Ua hoonaloia nae keia pahu poepoe maloko o kekahi mea huinaha like me he hale liilii la i uhiia maluna. Aia a hiki i ka pa ilina alaila weheia a ikeia ka pahu barela. Mahope mai o ke kupapau, hahai mai na pilikoko o ka mea i make, ua aahu ia lakou a me ka poe kanikau i na kapa kanikau. He lole keokeo wale no; oia koonei lole kanikau. Mahope mai o keia poe hahai mai ka lehulehu o na makamaka. Hele palua wale no keia poe a pau ma ka huakai.
Mamua o ka hiki ana aku o ka huakai i ka pa ilina, ua hoa e ia kekahi mau laau kuni mea ala e aa ana i ko makou hiki ana aku a honi makou i ke ala o ka uwahi. Ua waihoia ka pahu kupapau maluna o kekahi papa mawaena, a ku poai mai ka lehulehu. Hookani pinepine kekahi kahunapule i kekahi bele keleawe liilii e paa ana ma kona umauma; a o kekahi kahunapule heluhelu mai oia i ka pule me ka leo i hoohepaia, me he mele la. A pau ka pule ana o kekahi kahunapule hoi aku oia, a pule iho ka lua o na kahunapule me ka hahau pinepine me ka laau liilii maluna o kahi bele. Hele pakahi mai na pilikoko a kulou imua o ua kupapau nei, a hoopili i na lima elua a namunamu he wahi huaolelo pokole loa, he pule paha. Pela lakou a pau i hoomana ai. A pau ia hoomana ana hoi aku ka lua o na kahunapule, a hoi aku ka lehulehu, koe wale no na pilikoko. Alaila ua halihali ia keia pahu barela kupapau i kekahi pa liilii kahi i puhiia ke ahi. Waihoia ua pahu nei maluna o ka pohaku, kukuluia mai he mau pauku wahie a me ka mauu maloo, a mawaho mai ma hai a puni ua hoopaaia mai he mau moena i hoomauia i ka wai. Ua like ke nana aku me he imu kalo la, ua uhiia ke kauwewe a ua koe iki maluna. Aia a makaukau na kekahi o na pilikoko i kuni mai i ke ahi malalo mai a punohu mai ka uwahi maluna. Ia manawa hoi aku ka lehulehu, koe wale no elua kanaka paahana nana e kiai i ke ahi. Kali aku wau a lohe i ke pahu ana o na apo hao o ka barela i uhiia iloko o ka imu, a honi ia ka hohono o ka uwahi o ke ahi e ai ana i ka io kanaka. Aole nae i ikeia ka pahu, a me kau wahi lihi o ke kino kanaka, no ka mea ua uhi pinepineia na moena mawaho mai e hoopaa ana i ke ahi maloko. Hai mai na kiai ahi, e malama laua i ke ahi mai ia hora eha o ka auina la a hiki i ke aumoe, alaila pau ko laua hana, pau ke kino i ka puhiia, koe ka lehu ahi wale no. I ke kakahiaka e kii mai na pilikoko i kauwahi o ka lehu ahi o ka wahie a me ke kupapau i puhiia, a e kanuia ua wahi lehu la ma ka pa ilina, a e kukuluia he pohaku laa hoomanao, me ka inoa o ka mea i make i kalaiia iloko o ka pohaku, e like me ko na aina naauao. Na'u na
O. H. KULIKA.
KOBE, IAPANA, Nov. 17, 1871.
Ioela, e hoopaa oe i keia pauku:
Ala, ala, e nana,
E pau ana no na la;
He makahiki hou no nei,
Aole emo, a pau ae,
Ala a hoomakaukau
No ke ola ma ke ao.
HE HAAWINA HUI NO KA HOIKE MALAMA O NA KULA SABATI.
Kumu Hoike—Ka ke Akua hana, a malama ana ia kakou.
Mele—"Ke Kahuhipa Maikai," Hae Hoonani.
Heluhelu—Halelu XXIII.
Pule—
Himeni Kike—Na kekahi keiki liilii e ninau, a na kekahi keiki nui e pane mai:
Rahela—Lohe anei o Iehova
I ka pule liilii a'u?
Mere—Lohe no ke pule oe,
Pule pono mai makau.
Rahela—Ike anei o Iehova
I ka hana hewa a'u?
Mere—Ike no ke hewa oe
Ma ke ao a ma ka po.
Rahela—Lohe anei o Iehova
I ka'u hua wahahee?
Mere—Lohe no a huhu mai la;
E olelo pololei.
Rahela—Pono anei i na keiki
Ke aloha ia Iesu?
Mere—Pono no a hana pono,
A mamuli noho pu.
Pule Pualu na Keiki uuku—"E ko makou Makua iloko o ka lani," a pela aku.
Himeni—"Ka Iesu kamaiki au," Hae Hoonani.
Ke Kahu—E hoike penei: "Ke haawi mai nei ke Akua i na mea a pau e pono ai kakou."
Ia Tema— Hanai pono no ke Akua.
I na manu makalii;
Pela kona hanai ana
I na pokii liilii nei.
Ia Kaanaana—Hai mai ia Mataio VI 26, "E nana aku i na manu o ka lewa; aole lakou i lulu hua, aole hoi i oki ai, aole no hoi i hoahu ai iloko o na hale papaa: a ua hanai ko oukou Makua o ka lani ia lakou. Aole anei e oi aku ko oukou maikai i ko lakou?"
Ia Kane— Hai mai ia Luka XII 24.
Ia Kalaihoa—Ma Halelu CXLVII 9, e hoopaa ai.
Ka Papa Liilii—E hai pualu mai i ka Halelu XXIII i elua pauku. "O Iehova no ko'u Kahuhipa, aole o'u mea e nele ai. Nana no au i hoomoe iho ma na aina uliuli. Ua alakai oia ia'u ma kapa wai lana malie."
Ka Papa kanaka makua—E hai paanaau mai Halelu XXIII 3-5.
Iuliana—E hai mai ia Luka XII 6. Aole anei i kuaiia na manu liilii elima no na asario elua? Aole noi kekahi o lakou i hoopoinaia e ke Akua."
Hariata—E hai mai ia Luka XII 7. "Ua pau no hoi i ka heluia na lauoho o ko oukou mau poo, mai makau oukou; ua oi loa aku ko oukou maikai i ko na manu liilii."
Mele—"Mai paupauaho oe," Hae Hoonani.
Ka Papa Liilii—E pualu mai ia Luka XII 27. "E hoomanao i na lilia, i ko lakou ulu ana; aole lakou i hana, aole hoi i milo; ke olelo aku nei hoi au ia oukou, o Solomona i kona nani a pau, aole ia i kahiko likeia me kekahi o keia mau mea."
I ka hoike ana i keia pauku e lawe mai kela me keia keiki i mau pua liilii, a rose paha, a kau ma ka papa o ke kahu.
Ia Ane—Owai ka Rose o Sarona? Iesu. "Owau no ka Rose o Sarona a me ka Lilia o na awawa."
Pualu mai ka papa liilii i keia pauku:—
E pule na kamaiki
I ke Akua e,
A nana e hoolohe,
A hanai pono mai.
Daniela—Hai mai ia Kinohi I 1, "I kinohi hana ke Akua i ka lani a me ka honua."
Kopa—Hai mai ia Kinohi I 16, "Hana iho la ke Akua i na malamalama nui elua, o ka malamalama nui e alii ai maluna o ke ao, a o ka malamalama uuku iho, e alii ai maluna o ka po, a me na hoku."
Ka Papa Liilii— Nawai i hana ka la, mahina, me na hoku? Na ke Akua.
Owai ka malamalama nui? Ka la.
Owai ka malamalama uuku iho? Ka mahina.
Owai ka lama no ke ao? Ka la.
Owai ka lama no ka po? Ka mahina me na hoku.
Nawai i hoopaa ia lakou ma ka lani i ole e haule mai? Na ke Akua.
Hai pualu mai na keiki liilii a pau:—
Na ke Akua i hana
Na mea mai o a o,
Na aina, wai, moana,
Ka mauu, ai, laau,
Ka la olinolino,
I lama no ke ao,
Mahina, hoku imo,
I lama no ka po.
Na ia la hoi i hana
Na ia o ke kai,
Na manu o ka lewa,
Na mea kolo nei.
Na pipi, lio, hipa,
Na kamahao a pau;
Kanaka ke pookela,
Ke 'lii o keia ao.
Mele—"E hahai ia Iesu." Hae Hoonani.
Na kanaka makua, papa akahi—Hai pualu mai ia Kinohi I, mai ka pauku 1 a i ka pauku 5. Papa elua, mai ka 6 a ka 10. Papa ekolu, mai ka 11 a ka 15. Papa eha, mai ka 16 a i ka 21.
Na manao paipai.
Mele—Himani 258 mai ka Buke Hawaii, "Nani no ke kula nei," a pela aku.
Pule Hookuu.