Ke Alaula, Volume VI, Number 12, 1 March 1872 — Page 48
48 KE ALAULA.
HE LEO MAI MAKEKONIA.
Leo: "A voice from Macedonia."—Golden Censer.
He ka-he-a no na ai-na e ko-ku-a, Ho-mai i ke ao mai-kai, ho-mai! I lo-hea ka le-o o-li no ke o-la, Ho-mai ka wai e o-la'i. Hoo-i-kai-ka na e-le-le o ke ke-a, Hoo-ko i ka le-o ao, hoo-ko Ku a he-le i na ai-na e ao a-ku, E ao ma na ai-na a pau. D. C. He ka-he-a no na ai-na e ko-ku-a, Ho-mai i ke ao mai-kai, ho-mai! I lo-hea ka le-o o-li no ke o-la, Ho-mai ka wai e o-la'i. A-ia hoi ke ko-mo nei, Mai ke ao Hi-ki-na mai, Mai ke Ko-mo-ha-na no. Mai ka He-ma a A-kau, I ke au-pu-ni o Ie-su, Me ka mi-li-la-ni pu.
2 Nani e na wawae hele ma na mauna
E kai i ka malu hou, e kai
I na aina pouli wale, e hai aku,
E hai i ke ola mau,
Hooikaika na elele o ke kea,
Koa'e no ke 'Lii Iesu, koa'e!
E hookani i na leo o ke ola,
Iehova ke kokua mau,
HUI--Oli ae na aina e
No Iesu ke 'Lii maikai,
Nana e hoola mai
Ko na aina, ko na kai;
Hele a hai mai o a o,
I ka olelo a Iesu,
He kahea no na aina e kokua, ae.
3 Ku a hui me na koa kaua pono,
Kupaa, a e kaua mau, kupaa!
Paapua no na kini e kaua kue maila,
Hoouka ikaika no;
Me ka lepa o ke kea e kau ana
E kai, a e kaua no; ala'e!
Nauwe, kaua a lanakila ma ke aloha;
Iehova ke koua mau.
HUI--Ku a nauwe ae oukou
I ke ao laelae ma o,
Kahi no e ku pu ai
Me ko laila poe maikai
Aia hiki ae i o,
E hooho oli pu,
He kahea no na aina e kokua, ae.
HE MOOLELO KUPANAHA.
I ka makahiki 1640, e noho ana ma ke kaona o Housetona no Sekotia kekahi wahine o Magi Make Pesona, kona inoa.
I kekahi kakahiaka ua hookuu i kona pua bipi, a e hoi ana i ka hale. Puiwa oia i ka ike ana i kekahi ilio hae e ku ana iwaena konu o ke alanui. Lolo oia i ka makau, aole hiki ke oni ae, aka ku oia a nana pono i kela mea weliweli, a kali oia no ka lele mai o ka iliohae maluna ona; manao oia aole e pakele ana i ka make,
Ku oia a liuliu a e nana ana iluna me ka pule. Kahaha keia wahine i ka hana ano e a ka iliohae, aole wikiwiki oia i ka lele mai. Nana hou ka wahine i ka iliohae a ike oia, ano e kona helehelena, aole ano hihiu, aka e nana mai ana iaia me ka uwe liilii ana, e like me ka mea e noi ana e kokua mai.
I ka ike ana i keia hana a ka iliohae nee aku oia a kokoke i hiki ke nana pono, a ike oia e hele oopa mai ana e kaikai ana i kekahi wawae mua iluna me he la ua eha ia wawae. Lalau oia i ua wawae nei a ike ua komo kekahi laau ooi ma ka poho wawae, unuhi oia i ka mea ooi alaila upa me kona lima a hemo ka palahehe, a oluolu iho la ka wawae.
Hookuu ka wahine i ka iliohae a hele oia me ka uwe uuku me he la e aloha ana oia i ka wahine no kona lokomaikai. Hoi koke ka wahine i ka hale e hoomaikai aku i ke Akua no kona pakele ana i ka poino.
I ke kakahiaka ae, lohe ka wahine i ka walaau nui ma kela aoao keia aoao o kona hale. O ka uwo ana o na bipi, me ka alala ana o na hipa me na kao, me na nene; a i kekahi manawa lohe oia i ka aoaoa ana o ka iliohae. Ala ae la oia ma kona moe a nana iwaho i maopopo iaia ke kumu o keia walaau kupanaha. Aia hoi, ua pau mai na bipi, hipa, moa, nene, o na wahi e kokoke ana, a e ku ana mawaho o kona puka, a e kiai ana ka iliohae ia lakou i hele ole aku lakou. Ua maopopo i ka wahine oia ka iliohae i unuhi ia'i ka laau ooi, no kona hele oopa ana.
I ka ike ana o ka iliohae i ka wahine hoomaka oia e uwe me ka leo uuku, me he la e olelo ana "Owau ka mea i lawe mai i keia mau mea i makana aloha ia oe no kou kokua ana mai ia'u." Alaila hoi aku la ka iliohae e like me ka mea i olioli loa.
E na kamalii mai makau oukou e kokua i ka poe pilikia no ko lakou ano hihiu a kolohe, ke hoopii mai lakou ia oukou. Malama o ke kokua aloha ana ka mea e pau ai ko lakou ano hihiu a kolohe, a huli mai lakou a lilo i poe aloha a malama nui ia oukou. A e lilo hoi lakou i poe aloha ia Karisto.
NA NINAU BAIBALA.
1—Owai ka mauna ma Lunakanawai 4:12?
2—Owai na mea elua i kuka pu no ke kaua ma ia mauna? Lunakanawai 4:14.
3—Owai ka alihikaua ma ka aoao o ka enemi?
4—Ehia ona mau kaa kaua?
5—Owai ka wahine i aa e hele pu me Baraka i ke kaua?
6—Ehia kanaka koa o Barak?
7—Owai ka i lanakila?
8—Ma owai la i lanakila ai?
9—Heaha ka hana kupanaha i hanaia ma Mauna Tabosa ma hope loa mai? Mataio 17:1, 5.
10—Owai na mauna i olioli ma Halelu 89:12?
12—No ke aha ko laua olioli ana?
13—Aia mahea o Tabasa?
HE MAU RULA NO KA HELUHELU ANA I KA BAIBALA.
1. E hoi pu i ka pule me ka heluhelu ana.
2. E manao io i kau mea i heluhelu ai.
3. E ake nui e ike i ka oiaio, me ka mana, me ka hoomaemae ana o ka olelo a ke Akua.
4. E heluhelu pinepine i mau pauku me ka noonoo pono i ke ano.
5. E apo i ka Baibala holookoa, a e hooiaio o ke ao ana ia a ke Akua i mea e ola'i kou uhane.
6. E nana i ka hoike ana a ka Baibala holookoa no Iesu Karisto.
7. E manaoio i ka Haku ia Iesu Karisto, a e ola oe.
KO IE SU HAWANAWANA ANA.
He mea pohihihi paha ka lunaikehala i kekahi poe haumana. Hoao kekahi kumu kula Sabati i kona kula, ninau aku la, "E a'u poe pokii heaha ka lunaikehala?" Pane okoa mai kekahi me kekahi me ka loaa ole no. A mahope loa pane mai kekahi keiki uuku me ka hopohopo nae, "Oia ka hawanawana ana o Iesu iloko o ko kakou naau."
He oiaio no ia. Aia a hana maikai oe ua oluolu mai Iesu, a hawanawana mai, ua pono kau hana. A hana hewa oe, huhu mai Iesu, a hawanawana mai, ua hewa kau hana. A hana maikai oe, hoohauoli mai Iesu i kou naau. A hana hewa oe hookaumaha Iesu i kou naau.
E hoomaikai aku oe ia Iesu no kona haawi ana mai i ka lunaikehala. E hoolohe mau i kona hawanawana ana iloko ou, e huli mau i kana olelo, e pule iaia e kokua ia oe i ka malama i kona makemake a e hoomakaukau ia oe no ka home maikai ma ka lani.
MA KA HALE O KE AKUA.
1. E hele mau oe.
2. E hele i ka wa pono, mai kali a komo hope, pela i ke kula Sabati.
3. Mai noho mawaho, ma na puka e kiei ai, e komo aku iloko.
4. E hele malie, aole me na kamaa uwi, aole hoi me he lio la e hehi ana i ka papa.
5. E noho malie a e hoolohe i ka olelo.
KE ALAULA,
He Nupepa Hoikeike Kii,
Hoopuka mau ia ma Honolulu, i kela malama keia malama e ka PAPA HAWAII, no na Kamalii Hawaii.
25 keneta ka uku no ka makahiki no ka pepa hookahi; 20 keneta pakahi ka uku no na pepa he iwakalua a oi aku paha ma ke ope hookahi, ME KA HOOKAA MUA IA MAI.
L. LAIANA, Luna Hoopuka.