Ke Alaula, Volume VII, Number 2, 1 May 1872 — Page 6
6 KE ALAULA.
a lawe ia mai na palapala hoapono mai kona mau kumu mai. Mahope o ka loaa ana i ka mua, aole i hala kekahi Poakolu me ka lawe ole mai, me ka hoike ana ia'u, me he la e makemake ana ia'u e ike i kona hooikaika e hana pono ma kahi a ke Akua i hoonoho iaia.
Ma na ahiahi loihi o ka hooilo, ua lilo oia i na hora kaawale i ka okioki ana i na apana laau i loaa iaia mawaena o na oka; a ua hana i moku, hale kukui hoomalamalama moku, luakini, a me kela ano keia ano holoholona. No kona miki ma keia hana, ua hiki iaia ke hoohalike i na kii me na mea ana i ike ai; a ua ane like loa i ka nana'ku.
Hana oia i poho ahi koe ma ke ano o kahi mea ana i ike ai ma ka hale o kekahi hoalauna, a ua haawi mai i makana Karisimaka, a me ka i ana, aia a nui ae, alaila e hana ana i kia hoomanao no ka ilina o kona makuwahine aloha.
Lealea mau o Pele i ka hai ana mai no kona mau makua. Nui na mea ana i hoomanao ai no ko lakou noho ana ma Farani, a i hai mai, aka no ko lakou noho kuewa ana ma Amerika me ka pilikia oia noho ana, aole i makemake e noonoo a kamailio no ia mau mea. O kona imi, e hoopoina i na mea awahia a e hoomanae i na mea maikai o kona ola ana. Ua kukulu ia ka naau o ua kamalii wiwo ole nei ma ke k hua o ka manaolana.
HE HAAWINA HUI NO KA HOIKE MALAMA O NA KULA SABATI, NO MEI. NO NA MAUNA O KA BAIBALA.
Mele—"Mele anei ma ka lani." Hae Hoonani.
Heluhelu pualu—Habakuka 3:2—10.
Pule.
Mele—"O, O, O, he bele no." Hae Hoonani.
Papa keikikane—He4aha ka mauna? Owai na mauna elua i hoikeia mamua ma Aperila? A mahea ka lua? Mahea i ili ai ka halelana? Mahea i hele ai o Aberahama e mohai i kana keiki?
Papa kaikamahine—E hai like i na pauku mele no Ararata a me Moria i paiia ma ke ALAULA o Aperila? Aia mahea o Mauna Hareba? Aia ma ka aina o Midiana.
Mahea o Midiana? Ma ke komohona o Arabia, e pili ana i ke Kai Ula a i ke Kai Make.
Mahea ia mau kai? Owai o Midiana? He keiki na Aberahama laua me Ketura. Kinohi 25:2.
Papa kane—Hai paanaau mai ia Pukaana 3:1. "Hanai iho la o Mose i na holoholona a Ietero kona makuahonowaikane, a ke kahuna ma Midiana: alakai aku ia no ia i na holoholona ma ke kua o ka waonahele, a hiki aku la i ke kuahiwi o ke Akua, i Horeba."
No ke aha i kapaia ai ke kuahiwi o ke Akua? No kona kiekie paha, a no kona lilo ana paha i mauna laa mahope, no ko ke Akua iho ana maluna ona e haawi mai i na kanawai.
Ua like pu anei o Horeba me Sinai? Ae, ua like pu no, hookahi no mauna, Horeba paha ka hapa haahaa; a o Sinai ka hapa kiekie.
Papa wahine—E hai paanaau mai i ka pauku elua o Pukaana, mokuna 3. "Ikea mai la e ia ka anela o Iehova mai loko o ka lapalapa o ke ahi mawaenakonu o ka laalaau; nana aku la ia, aia hoi, e aa ana ka laalaau e ke ahi, aole nae i paa ka laau."
Hai mai hoi I Na lii 19:8. "Ala ae la ia, a ai iho la, a inu no hoi, a ma ka ikaika o ua ai la i hele ae oia i na la he kanaha a me na po he kanaha i Horeba, ka mauna o ke Akua."
Mele— Himeni 9, "Ke Akua mana e ola ai," 2 pauku.
Papa keikikane— Heaha ka mea kupanaha a Mose i ike ai ma Horeba? He anela a he laalaau e aa ana i ke ahi, aole nae i pau. Aa a loihi, lapalapa ke ahi, aole pau iki ka laau, koe okoa no.
Mana, ea, ke Akua? Ae, nani ka mana.
Mahea ke ahi aa mau loa me ka pio ole? Ma Gehena. Mareko 9:43, 44.
Papa kaikamahine—Hai paanaau mai ia mau pauku ma Mareko. A pehea ka poe i kiolaia aku ilaila, pau anei lakou i ke ahi a lilo i mea ole? Aole. Wela mau no lakou i ke ahi mau okoa nae na kino, na uhane. Auwe! Pehea la e pakele ai?
Ehia la me na po i hele ai kela kanaka i Horeba me ka ai ole? Owai ia kanaka? Owai la kona lua?
Ekolu kanaka i hele me ka ai ole ha kanaha la. Owai? Owai? Owai? Pukaana 34:28; I Na Lii 19:8; Mataio 4:2.
Mele—"Lei Rose maikai," ALAULA.
Papa kane—Hai paanaau mai Pukaana 17:6. "Aia hoi, e ku no au ilaila imua ou maluna o ka pohaku ma Horeba; a e hahau ae i ka pohaku, a e puka mai no ka wai mai loko mai oia mea i inu ai kanaka. Hana iho la no o Mose pela imua o na lunakahiko a pau o ka Iseraela."
Heaha ke kauoha ma Pukaana 33:6? "E wehe na mamo a Iseraela i ko lakou kahiko ana ma ka mauna o Horeba."
No ke aha? I hoohaahaa lakou ia lakou iho a hoolohe i ko ke Akua manao.
Papa wahine—E hai paanaau mai Kan. 1:6. "Olelo mai la o Iehova ko kakou Akua ia kakou ma Horeba, i mai la, ua loihi ko oukou noho ana ma keia mauna."
E hai paanaau mai Kan. 4:15. "E malama nui ia oukou iho; no ka mea, aole oukou i ike i kekahi ano kii i ka la a Iehova i olelo mai ai ia oukou ma Horeba mai loko mai o ke ahi."
Papa keiki liilii—Nawai i hahau i ka pohaku ma Horeba? Na Mose.
Me ke aha? Me kona kookoo.
A ua aha mai la? Ua puka mai ka wai.
No Mose anei keia mana? Nohea ka wai e ola ai?
No ka pohaku o Iesu Kristo. 1 Kor. 10:4.
Pehea e loaa ai ia wai ia oukou?
Heaha ka oukou himeni no Horeba? Eia:
Mauna Horeba,
Mauna ihi, laa,
Kahi o Mose
I ku la e nana
I ka lapalapa,
Ahi kamahao,
A na laalau iki,
Aole nae i pau.
Kahi hoi o Mose
I ku a hahau mai
I ka pohaku,
A puka mai ka wai. Mauna Horeba,
Kahi i kalaiia'i.
Ke keiki bipi gula
I akua e hoomana'i.
Pehea, he akua io anei ia keiki bipi gula? He mana anei kona?
Papa keiki nui—Heaha ka oukou himeni no Horeba? Eia, ua paanaau no:
Ma ka mauna o Horeba,
Ma ke kua ma o ae,
Noho Mose e hanai ana
I na hipa, a nana'e;
Aia hoi, he kupanaha,
He ahi lapalapa e?
Aa i na lala iki,
Aa mau, pau ole nae.
Ku no oia ma ia mauna,
Me ke kookoo i paa mai;
Hahau mai i ka pohaku,
Puka mai ka wai maikai.
Hana ino na Iudaio,
Hoohehee malaila no,
I keiki bipi gula,
I akua no lakou.
Mele—Honi maikai," ALAULA.
Papa kanaka makua a na kane—E heluhelu like mai ma Pukaana 32:2, 3, 4; Halelu 106:19.
Na wahine—Heluhelu like ma Kanawailua 9:8; Malaki 4:4: I Na Lii 8:9.
Na kamalii liilii— Heaha maloko o ka pahu berita? Na papa pohaku kanawai elua.
Nawai i hahao? Mahea? Ehia?
Manao paipai—I ke kahu.
Mele—"Mele hana," ALAULA.
Pule hookuu.
KA HEWA O KA HOOMALOKA.
Ua kapaia ka hoomaloka ka makuwahine o ka hewa; no ka mea, oia ke kumu o na hewa e ae; nana e kokua a hoola i na hewa e ae. He mea e paakiki ai ka naau, II Na Lii 17:14. He mea e malu ole ai, Isaia 17:9. Ua hoole ia i na elele a ke Akua, Mataio 21:32. He mea e nele ai ka olelo a ke Akua i hoopomaikai, Hebera 4:2. He hoowahawaha i na hana mana, Ioane 7:27, O ka poe hoomaloka, aole lakou he poe keiki na Kristo, Ioane 10:26. Aia lakou malalo o Satana, II Korineto 4:4. O ka hoomaloka ka mea i nui ole ai na hana mana lokomaikai a Kristo, Mataio 13:58.
"Nani keia Sabati,
Kani kona bele nei,
Me na kumu a kakou,
Halawai hoomana hou,
Hele pu na kamalii
I ke kula Sabati;
Imi i ke ola mau,
Mele like ia Iesu."