Ke Alaula, Volume VII, Number 3, 1 June 1872 — Page 12

12 KE ALAULA.

KE ALAKAI.

Leo; "JUST STARTING OUT." - The Charm;

Akahi makou i hoomaka’u,

E nauwe mai nei oe,

  Ma ke ala pohihihi e,

O wai ke alakai?

Iesu, Iesu, Iesu, Iesu.

Ke Hoa maikai nei.

Iesu, Iesu, Iesu, Iesu, Iesu ke Alakai.

 

2 I ole makou e lalau,

A hele hewa ae,

E pili aku ia Iesu.

A iaia e hahai.

HUI - Iesu &c.

 

3 A ku a nauwe ae makou,

E nauwe pololei

Ma ke ala o ka naauao,

Ke ala oli nei.

HUI - Iesu, Iesu, &c.

 

4 Aue e lilo ai makou

I mau pokii maikai,

I mau haumana na Iesu,

Ke kumu maikai nei

HUI - Iesu, Iesu, &c.

 

5 A onou mai ko keia ao,

A kue ko ka po,

Iesu ka Pale oia mau,

A lanakila no.

HUI - Iesu, Iesu, &c.

 

KA NUNU LAWE-LEKA.

Nani keia elele liilii, eheu mama ! Nani ke kupaianaha o ko ke Akua hoolilo ana i na mea a pau i kauwa na kanaka. Aole kahaha kakou i ka hoohanaia ana o na lio me na bipi, a he mau holoholona laka e ae, no ka ike mau ana ia lakou mai ka wa kamalii mai. Aka ma kahi mamao, ma o ae o ka wa nui, ma na aina e, ua halihali no ka elepani, kamelo a me ka oseterika i na kanaka a me na ukana ma na koa o lakou, a o keia manu liilii hoi, ua aoia e lawe i na mamala olelo o ke aloha, a me na olelo waiwai nui no hoi mai kekahi wahi a i kahi e aku.

Ma ka ainapuniole hikina kahi i noho ai keia manu, a ma ia mau aina ka hoolilo ana iaia i manu elele. O kona aahu he hulu ahinahina, a i ole ia he keokeo aiai, me ke apo hulu ano e e poai ana i kona a-i; he ulaula na wawae, a ua paapu i na hulu makalii.

Aia a nui a ikaika kona eheu, ua hooia ma ka ie i paiia a paa, a ma ka eke paha, a haliia he hapa lua mile mai ka hale aku a hookuuia.

He nui kona aloha no kahi hanau, a hoi hou no ilaila ke hookuuia. I ka wa hookuuia, lele no ia ma ka poai e nui ana ke anapuni i kona pii ana, a hiki iluna ma kahi hiki iaia ke hoomaopopo i kona ala e hoi pololei ai i kona home. I ka hele hou ana ua laweia ma kahi e, loihi ke kaawale i ka hele mua ana, a pela ka hooloihi ana a hiki iaia ke hele hou i kona home mai kahi i makemakeia.

Ua kukulu ka Suletana o Konetekaniko i puu kaua mawaena o kona hale alii a me na mahele o kona aupuni, i pokole kahi e lele ai ka manu hookahi a loaa ke kokua. Ua hoonohoia he luna ma kela papu keia papu nana e lawe i na leka a ka manu i lawe mai a haawi i ka mea hou e hali aku i ka papu ma o aku; a pela ka hana a hiki ma kahi i makemakeia. Ua kakauia na olelo ma ke kilika maikai, a ma ka "pepa manu" (he pepa mama) paha, a owiliia, a nakiiia ma ka a-i, a ma ka wawae paha. I keia wa ua maa i ka hoopaa ana ma ka hulu waena o ka huelo, no ka mea ua mau ia hulu ma kahi hookahi, aole luli i o a i o i ka wa e lele ana ka manu.

He ukana mama wale no ka i hiki iaia ke hali, nolaila ua pokole na palapala i hoounaia, aka i keia wa no ka loaa ana i ke ano hoopokole o ke kakau ana, a hiki ke kakau a makena wale na hua ma kahi uuku loa, a na ke aniani hoonui e kokua i ka mea nona ka leka ma ka heluhelu ana. Ua hiki ke hooloihiia ka leka, a nui na manao e hookomoia.

I ka wa i poai puni ia ko Farani poe ma Parisa e na enemi o Perusia, ua malamaia na manu elele ma Tours, he kulanakauhale 150 mile mai ia wahi aku, a na lakou i lawe i na nuhou ilaila. Ma na baluna ka lawe ana ia lakou ma kahi kiekie, alaila i ka hookuu ana, lele poai no lakou ilalo, a maopopo ke ala kupono e lele pololei a hiki i Tours, a hoike i kanaka i ke ano o ke kahua o ke kaua.

Ua ao ko Perusia i na io e hopu i na nunu, ua pakele nae lakou no ka lele mama ana.

Ua maopopo anei ia oukou ka nunu elele mua o kakou i lohe ai ? Ua hoounaia e Noa i ka wa o ke kaiakahinalii, a ua hoi mai me na lau oliva o ka maluhia.

Ina hiki mai ka Uhane Hemolele iloko o na naau o na lahui kanaka, aole paha mau ke kaua ana, haalele paha lakou i na mea kaua weliweli a noho kuikahi mau. Maikai ea, ina pela kanaka a pau o ka honua nei. W.

KA MAKANA O IESE LIILII.

Ma kekahi kula Sabati ma ke kao o Nu Ioka ua haawiia he Baibala i makana no kekahi kaikamahine uuku, ewalu ona mau makahiki, no ka hoopaanaau ana i ka Ui mai mua a hope. He mea maikai i ka nana'ku ka haawi ana o keia makana, e ao mai ana no hoi i ka haawina maikai kai no na kula Sabati a pau ina ua hui lakou e ike.

I mai paha o Kete, aole ia he mea hou, aole he mea hiki ole, ua pau no ia i ka hapa nui o ko makou papa kula.

Ua makena wale paha na mea a oukou i hoopaanaau ai, aka nae, aole i like ka oukou hana me ka ia nei. Ua hiki i ko oukou maka eleele e ike i ka heluhelu a me ke kakau, aka o Iese liilii ua makapo loa. Mamua ua ike no ia i ke ano o ke ao uli, me ka malamalama o ka la, a paipai i kona mau lima i ka wa bebe, no ka lealea i ka nana ana i na mea nani. Aka ke noho nei o Iese ma ka pouli; lohe oia i ke kani ana o na mele o ka poe puhi pila, aole nae hiki iaia ke holo a nana i ka huakai nui e kai huakai ana ma na alanui; lohe no i na kamalii e holoholo, e hooho e paani ana, aole nae hiki iaia ke hui me lakou. Honi no oia i ke aala o ke kula a me ka mala pua, aole nae ikeia ka opuu, ka pua, a o ka laau paha.

Aole hiki ke holo e aloha i kona makuakane i ka hoi ana mai, mai ka hana mai; aole ae ia keia mau mea hoohauoli iaia. Ua hooko no keia kaikamahine pilikia i na hana a na keiki, e oi ana ma na makahiki, i manao ai he haawina kaumaha.

O kona makuahine e hana mau ana me kona ikaika; ua noho pu me Iese i ke ahiahi i ka pau ana o na hana o ka la, e hai pinepine ana i na ninau me na haina o ka Ui i kona kaikamahine makapo hoomanawanui, a paa ka Ui iaia; alaila ua alakai aku iaia i ke kula Sabati e hahai aku i kona kumu.

Aole like ka Baibala i haawiia iaia me na mea haawi mau ia, he mea ole ia ia Iese ; nolaila elua Euanelio i paiia me na hua kiekie hiki ke hahaia e ka makapo, i haawiia iaia.

I ka hiki ana i ka Sabati i oleloia, ua hui ke kula nui e ike i ka haawi ana i ka makana. Ua alakaiia o Iese liilii i ka papa kakou e na hoa elua ona, a mahope o ka hoike ana i na buke i ke kula, ua hoihoiia i ko Iese home, no ke kaumaha, aole hiki iaia ke paa a hali i kona wahi.

Aole anei he mea hoohilahila i kamalii maka ike, me na makua nui la manawa kaawale hiki ke kokua ia lakou ma na haawina, e hoomaopopo i ka hana a keia keiki maka ole a ilihune no hoi i hana?

E huli ka poe heluhelu ALAULA i ka ka Haku i makemake ai ia oukou e hana me na talena, na haawina ana i hoolako mai. E nana ma Mat. 25: 14-31.

Aole paha e loihi ana ke ola o Iese ma keia ao he pilikia, he ilihune, he pouli, aka i ka pau ana me he moeuhane pokole ia, e hauoli kona manao i ka lohe ana i keia olelo: Pono, e ke kauwa maikai, malama pono; he pono kou malama ana i na mea uuku, e hoonoho no au ia oe maluna o na mea he nui loa. E komo ae oe iloko o ka olioli o kou haku."

E ka mamo a Davida,

Nana, a aloha mai

Pela Batamia i pule,

Hoopa Iesu, ike ae. W.