Ke Alaula, Volume VII, Number 6, 1 September 1872 — Page 22
22 KE ALAULA.
hine haipule ia'u e huli, e mihi, e hoolaulea ia Iesu, hookuli nae ko'u pepeiao i kana mau olelo hoohuli a pau.
Aka i ka hele pinepine ana mai o ka'u kaikamahine liilii a puliki i kona lima liilii aloha ma ko'u ai me ka olelo mai, E kuu makua i aloha nui ia, aole anei o oe kekahi e hele pu i ka lani? E ka makua, aole paha oe i ike i ka nui o ko Iesu aloha me kona lokomaikai. E ka makua, ua make Iesu nou a no'u, no kaua pu, aole anei e hiki ia oe ke aloha aku iaia? Ua pau ko'u mana e hoole hou aku. Ua pau ko'u hoole a hookuli ana. Ua ae au, ua huli, a ua mihi au. Eia no au ke hele mai nei e ku imua o ke anaina e hoohiki e lilo i ohua no Iesu. E hoomaikaiia ke Akua o kuu kaikamahine makamae, ka mea i kuhikuhi mai ia'u i ke ala o ke ola ma o Iesu la. O Iesu no ko'u me kona, a nona no au a mau loa aku no.
Ola keia makua i ka paipai aloha ana a me ka pule mau ana a kana kaikamahine liilii. E na kaikamahine a me na keikikane, na makuakane paakiki a huli ole mai, e like me kou e Kaanaana, me kou e Keoni, me kou e Maukaa. E hoohalike oukou me keia kaikamahine, e hele a apo i ka makua ma ka ai, a kuhikuhi aku i ke ala o ke ola, a ao paanaau aku i keia pauku himeni,
"Makua hewa wale au,
Iesu kuu hoola;
Haumia loa kuu naau,
Make Iesu no'u.
E mele au ia Iesu
I make no'u, i make no'u;
Na kona koko mana
E huikala ia'u."
A e ao aku hoi iaia i keia mau pauku Baibala: "Ua aloha nui mai ke Akua i ko ke ao nei, nolaila, ua haawi mai oia i Kana Keiki Hiwahiwa i ole e make ka mea manaoio iaia, aka, e loaa iaia ke ola mau loa. E nana aku i ke Keikihipa a ke Akua, nana e lawe aku ka hala o ke ao nei."
"Aole anei oe i makemake e hele pu kaua i ka lani?"
HAAWINA HUI NO KA HOIKE MALAMA O NA KULA SABATI NO SEPATEMABA.
Mele—"Ke Alakai." Alaula.
Pule ke Kahu.
Heluhelu like ke kula a pau Halelu 89:1, 12.
Na pokii—Heaha ka oukou e hookani mau loa aku ai? Ka lokomaikai o Iehova.
Heaha ko ke Akua lokomaikai ia oukou? Kona malama ana mai ia makou. Kona haawi ana mai i na mea e pono ai ke kino a me ka uhane.
Nohea na kula la, kula Sabati, ka Baibala, na himeni? No Kona lokomaikai mai no.
Heaha Kona lokomaikai nui? Kona haawi ana mai ia Iesu i Kalahala e ola'i makou.
Owai ma ke aouli e kulike ana me Iehova? Aole mea kulike.
Owai ka mea iwaena o ka poe kiekie e hoohalikeia me Iehova? Aohe mea e hoohalikeia'i.
He Akua aha o Iehova? He Akua weliweli loa ma ke anaina o ka poe pono.
Owai ka poe pono ke hopohopo Iaia? Makou ka poe i puni iaia.
Heaha kekahi ninau no Iehova? E Iehova, ke Akua o na kaua, owai la kekahi Iehova i like me oe? me kou oiaio hoi e hoopuni ana ia oe? Mele—"The Children are Coming." Alaula.
Na keiki nui— Haipaanaau mai i ka Halelu 89:12. "A kupikipikio ke kai, a pii nui ae kona mau ale, nawai e hoomalu a hoomalielie?
Heluhelu mai ma Mareko 4:37, 39. Owai ia mea nui a mana maluna oia moku? Owai ia moanawai? Heaha ka hoailona o ko Iesu mana a weliweli kanaka? Kana olelo ana i ka makani ikaika a me ka moanawai kupikipikio, Hamau! e noho malie, a oki iho la ka makani a pohu maikai iho la.
Haipaanaau mai i keia mau pauku himeni:
Iehova ke Akua mau,
He mana weliweli kou,
Ka la, me na makani pu,
Hoolohe i ka leo ou.
E ala kue mai ke kai,
Na ale, e popoi pu,
Kau no Kou lima, papa mai,
Pau koke ae, a malu pu.
Nowai ka lani? Nowai ka honua? Nawai i hana? Nawai i hookumu i ke ao a me kona mau mea i piha'i? Ke kukulu akau me ke kukulu hema, nawai i hana? Owai na aina me na moana akau? Owai na aina me na moana hema? Owai na aina me na moana mawaena?
Mele— Himeni 9 ma ka Buke Himeni.
Na makua—Owai na mauna ma Halelu 89:12? Tabora me Heremona.
Ua kauohaia laua e olioli i ke aha? Ua hoikeia anei keia mau mauna mamua? Aole.
Owai na mauna i hoikeia mamua? Kokua mai na kaikamahine i ka helu mai.
Na pokii—Owai ia mau mauna ehiku? Arerata, Moria, Horeba, Sinai, Hera, Pirega, Lebanona. Maikai ua paanaau pono ia oukou. Ua haule kekahi i na makua.
Ka hale aha ka i ili ma Arerata?
Owai ke keiki i laweia a mohaiia ma Moria? Ua mohaiia anei? Heaha kona pani?
Owai ka i mohaiia no oukou? Mahea? Ma ka puu o Kalevari.
Ka luakini owai ka i kukuluia ma Moria?
Owai ka i hanai holoholona ma Horeba?
Owai ka i iho ma Siinai? Owai ka i pii ilaila e halawai pu me ke Akua?
Na kanawai aha kai haawiia ma Sinai? Ua haawiia ia mau kanawai iawai? Maikai anei na kanawai? Ke malama nei anei oukou i na kanawai e pili ana i ka la Sabati a me na keiki?
Heaha ke kanawai no ka hoomaikai o na keiki i na makua?
Heaha ke kanawai no ka la Sabati?
Heaha na kanawai no ka aihue a me ka wahahee?
Owai ka i make ma Hora? Owai ka i make ma Pirega?
Owai ka i makemake loa e ike ia Lebanona mamua o kona make ana?
Maikai ka oukou mau haina.
Mele—"Hui pu anei ma ka muliwai maikai." Hae Hoonani.
Na keiki nui—Ka mauna ahia o Tabora? Ka mauna ewalu.
He mauna kaulana anei keia? Ae, ua manaoia, oia ka mauna kahi i pii ai Iesu me na haumana ekolu e hoopahaohaoia'e.
Heluhelu mai ma Mataio 17:1, 2; Mareko 9:2, 3.
Owai na haumana ekolu? Owai ka i iho mai ka lani mai e hui a kuka pu me Iesu ma ia mauna?
Ua akaka anei ko Mose komo ana iloko o ka lani ma keia launa pu ana me Iesu? Ae, ua akaka loa. Aole oia i komo iloko o Kanaana mua, aka, ua komo no iloko o Kanaana hou.
Owai o laua ka i pii i ka lani me ka make ole?
Mahea hoi i make ai o Mose a pii koke ae kena uhane i ka lani?
Owai ka mua? O Mose o Elia paha?
Ehia makahiki mai ia Mose a Iesu? 1,483.
Mai ia Elia a ia Iesu? 838. Ke helu mai ka make ana o Mose a mai ka pii ana o Elia i ka lani a hiki i ka wa i pii ai o Iesu i ka mauna o Tabora.
E hai mai ke ano o Tabora? He mauna maikai loa ia. Aia no ia ma ka papu o Esedesaelona, ma ka hema o Nazareta ma Galilaia.
He mauna kiekie loa anei keia? Aole, aole paha 2,000 kapuai kona kiekie.
Heaha ka pohaku oia mauna? He puna, a ua paapu hoi i ka ululaau liilii.
Mele—"Lira Gula." Alaula.
Na makua—Heluhelu mai ma Lunakanawai 4:6. Owai o Baraka? Owai o Debora? Owai ka mea ikaika o laua? Owai ka mea wiwo a pihoihoi? He kane anei o Baraka?
Kupanaha, ke kane ka i wiwo, ka wahine ka i wiwo ale, a hoeueu i ke kane e hele i ke kaua.
Me na kanaka ehia e hookokoke aku ai ia mauna Tabora? 10,000.
Owai ka enemi? Lunakanawai 4:2.
Owai ka alihikaua o ka enemi? Owai ka aoao i lanakila? Ka aoao o Debora laua me Baraka.
Na kaikamahine—E haipaanaau like mai i 13 pauku o ke mele a Debora ma Lunakanawai 5:1, 13. Na manao paipai.
Mele—"Who'll be for Jesus?" Alaula.
Pule ke kahunapule.
NA KAMAIKI MAKAMAE.
Leo: "LITTLE LAMBS."—The Pearl.
1 Na kamaiki makamae
Ka ke Kahu mau hanai,
Kai malie ia lakou,
Ma na kula omaomao.
Ma na kahawai maemae,
Ma na mala pua maikai.
Pale oia i ka la,
Malu e ma kona pa.
Hui—Na kamaiki makamae,
Ka ke Kahu mau hanai,
Kai malie ia lakou,
Ma na kula omaomao.
2 Na kamaiki makamae,
E hoolohe a hahai,
Ma na wahi a Iesu,
E kai aku ia oukou,
Kahuhipa maikai e,
Ma kou lima e kai ai,
Ma kou poli e hii maikai
Kau mau hanai makamae.
Hui—Na kamaiki makamae, &c.