Ke Alaula, Volume VII, Number 6, 1 September 1872 — Page 24

24 KE  ALAULA.

A WEHE KE ALAULA.
Leo: "WHEN BRIGHTLY BREAKS THE MORNING."—The Pearl.

A we-he mai ke alau-la; Ke alau-la Sa-ba-ti. A pii ka la i lu-na, E a-la na po-kii, E hoo-ma-nao ou-kou ka, Ko Ie-su la ao nei, Ua ka-pu ia-a no-na, A no-na e o-li ai.
2 Ke kau nei na kukuna
O kona la mai ai
Maluna o na kula,
A me na halawai
E oli na haumana,
E hui maikai mai,
E ku a mililani,
E kua a hoomaikai.
3 E oluolu Iesu
Ke mele maikai ae,
Haliu mai a hoolohe
Ke pule na pokii;
Maanei ko Iesu maka,
A nana olu mai;
Maanei ko Iesu lima,
Ua o e apo ae.
4 Eia makou, e Iesu,
He poe pokii nau,
Ke ao nei i kau olelo,
Kokua ia makou,
E kala i na hewa,
Hoomakaukau maikai,
I pii makou e noho
Me oe maluna'e.

HAINA O KA NANE.

Eia mai ka haina o ka nane maloloko o ke ALAULA o Iulai. He huaolelo ekolu lala oia ekolu hua.
Ko'u mua, he mea paakiki, A, oia kekahi inoa, o ka pohaku.
Ko'u lua, aia iloko o huli aole iloko o uli, H, ka hua mua o huli.
Ko'u kolu, aia iloko o imi aole iloko o emo, I, ka hua mua o imi.
Ko'u mua A, me kolu I, he mea maikai a make ke loaa ole, Ai.
Ko'u kolu. I, me ko'u mua, A, he mea ono iloko o ke kai, Ia.
Ko'u lua, H, me ka mua, A, me ke kolu, I, he puka mailoko mai o ka waha. Hai.
Ko'u lua, H, me ke kolu, I, me ka mua, A, he mea pili i ka naau, Hia.
Ko'u lua, H, me kolu, I, he inoa no kekahi mai, Hi.
Ko'u lua, H, me ka mua, A, he mea maikai no a kakou e hana nei, a make no ke hana ole, Ha, oia ka puka ana o ka makani ma ka waha.
A o ko'u huina, he mea makau he haule iloko, AHI.
Oia iho la ka haina a ke kula Sabati o Helani.
T. KANE, Kahu Kula Sabati.

HE NANE

Ko'u mua, iloko ia o holo aole iloko o olo.
Ko'u mua me ka lua, he mea mahiai no na haole mai.
Ko'u mua me ka  ha, he mea ia e pono ai ka berena.
Ko'u mua me ka lima, aia no ia iloko o Halelu 33:6.
Ko'u lua, he mea kani.
Ko'u mua, lua, kolu, ha, he mea iloko o ke kai a ma ka aina hoi.
Ko'u mua, lima, ha, he mea pili i ka weuweu ma ka po.
Ko'u mua, lua, lima, he mea aloha.
Ko'u mua, ha, kolu, lima, he mea makalii.
Ko'u lua, kolu, ha, he mea pehu me he puu la.
Ko'u lua me ka lima, he mea maluna o ka hale.
Ko'u lua, kolu, lima, he mea pili i ka inu rama.
Ko'u lua, me ka ha, pili ia i ka hilinai.
Ko'u kolu me ka lua, ko ka haole hoole ia.
Ko'u kolu, lima, mua, ha, he mai.
Ko'u ha, kekahi hoa kamalii i like me ka ae.
Ko'u kolu, ha, lima, ka 3/5 ia o ko'u inoa.
Ko'u kolu me ka ha, pili ia i ka mea eha a i na manu.
Ko'u ha me ka lima, he mea maikai ia mai ka lani mai.
Ko'u lima, he mea paakiki.
Ko'u kolu me ka lima, he mea e like me ka oluolu.
Ko'u lima me ka ha, he mea ikaika iloko o ke ke kai.
Ko'u lima, kolu, ha, he mea e opili ai.
Ko'u lima me ka lua, he mea maikai a pono ole ke nele.
Ko'u lima, kolu, lua, he manawa.
Ko'u ha, kolu, lima, pili i ka poe hele loihi.
Ko'u ha, mua, lima, he lala o ke kino.
Ko'u mua, ha, lima, he mea maluna o na laau.
Ko'u mua, lua, ha, he mea i loaa ke hana ikaika.
Ko'u lima, mua, lua, he mea pili i na hale pili.
Ko'u lima, mua, ha, pili ia i ka hoiliiliia.
Ko'u  huina, he  mea paa, a kaa, a hanaia i kinohi.
E halalo, e nowelo, e nonoke pu kamalii, i loaa ka haina, a loaa e hooili mai ia'u. Ua loaa no ka haina o ka nane ma Iulai, oia keia Ahi.

KA MEA OI AKU MAMUA O KA PAANI ANA.

                E Henere, e hele pu kaua i ke kula Sabati, wahi a Ioane i kona hoa.
                Aole o'u makemake e hele, wahi a Hanare.
                Nui ka pomaikai i loaa ole ia oe ke hele ole i ke kula Sabati, wahi a Ioane.  E hele pu kaua i keia Sabati ae.  Ae o Henere e hele pu i mea e hooluolu ia Ioane kona hoa.
                Hele pu laua i ke kula Sabati, akahi no a ike o Henere i ke ano o ke kula Sabati. Kuhi oia he wahi aha ia? He hale pouli anei, he hale-paahao, he wahi hoeha, he wahi walaau, he wahi hiamoe, he wahi aha la? Hookipa oluolu ke kumu iaia, a ninau i kona inoa, a kakauia ma kana buke, a ao no iaia i kekahi mau mea mailoko mai o na buke kula Sabati, e pili ana i ke ola ma o Iesu la, me ka olelo, he makamaka aloha Iesu, aloha ia i na keiki, na keiki auwana, a hewa wale, ua make oia no lakou; ua hele i ka lani e hoomakaukau i wahi maikai e noho ai lakou ke lilo lakou i mau keiki pono.
                Lohe o Hanare i na leo himeni maikai, na mea ana i lohe ole ai mamua. Oli lea kona pepeiao. Eueu kona manao. A pau ke kula, haawi ke kumu i kekahi buke a nupepa kula Sabati, e like me ke ALAULA, ia Henere. A i ka hoi pu ana ona me Ioane, olelo oia ia Ioane, E Ioane, ea, akahi no a loaa ia'u ka manawa maikai loa ma ke kula Sabati.  Olioli loa au i ka ike, i ka lohe i na mea maikai a ke kumu i hai mai ai ia ia'u, i ka lohe hoi i ka himeni, he kumu aloha k'ou, aloha oia ia makou i na keiki kane, a kamailio oluolu mai me ka ike i na huaolelo kupono ia makou.
                Olioli au wahi a Ioane, no kou olioli i ka hele mua ana i ke kula Sabati. E hele hou oe i kela Sabati.
                Ae, kou manao paa no ia, e hele au i na Sabati a pau i ke kula Sabati.
                Hoi o Hanare i kona home me ka buke a me ka nupepa; a heluhelu oia i na mea maloko i kona mau hoa, i na muli, i na kaikuwahine, a olioli loa lakou i ka lohe ana i na mea maikai i heluheluia e Henere me ka makemake nui e hele pu e Hanare i ke kula Sabati ma ke Sabati e hiki mai ana.
                Loihi na la ma ka manao o Hanere, e aku nui ana oia e puka koke mai ka la Sabati, wikiwiei o Henere i ke ala a hoomakaukau no ke kula Sabati. A pau ka ai ana, o ka hele no ia, oia me kekahi mau hoa paani a me kona mau kaikuwahine, a komo iloko o ke kula Sabati. A mau no ko lakou hele ana i ke kula Sabati mahope iho, a ikaika loa lakou i ke ao ana i na haawina, i na pauku paanaau, i na himeni. A makemake loa lakou i ka hele ana ilaila, ua oi aku ka maikai, ka olioli, i loaa malaila mamua o ka olioli ma na paani wale ana a pau.
                E na haumana mau o ke kula Sabati e hoohalike oukou me Ioane, e imi i na keiki auwana, a e kono ia lakou e hele pu mai i ke kula Sabati, i loaa mai ka pomaikai.

                "E na keiki, e hoolohe i ko oukou mau makua no ka Haku; no ka mea, he pono keia.
                "E hoomaikai oe i kou makuakane a me ka makuwahine; o ke kauoha mua keia, e pili ana me ka olelo e pomaikai ai." Epeso 6:1, 2.

                                E na pokii makalii,
                                E nui ke ahonui,
                                I na haawina paakiki
                                I loaa ka pomaikai.

KE ALAULA,
He Nupepa Hoikeike Kii,
Hoopuka mau ia ma Honolulu, i kela malama keia malama e ka PAPA HAWAII, no na Kamalii Hawaii.

                25 keneta ka uku no ka makahiki no ka pepa hookahi; 20 keneta pakahi ka uku no na pepa he iwakalua a oi aku paha ma ke ope hookahi, ME KA HOOKAA MUA IA MAI.
L. LAIANA, Luna Hoopuka.