Ke Alaula, Volume VII, Number 7, 1 October 1872 — Page 27

KE ALAULA. 27

14:4, 5? Heluhelu. Ua aha o Oliveta i ka wa ia Uzia? Ua moku mawaena i ke olai nui.
                Ua aha o Iesu i kekahi wa ma Oliveta? Uwe nui no Ierusalema. Luka 19:37, 41.
                E uwe kakou no wai? He mauna kiekie anei o Oliveta? Aole, 2,000 kapuai wale no. Kaulana ia, aole no ke kiekie, no ke ano maikai no.
                Manao paipai.
                Mele - Himeni 440.
                Pule ke kahu.

E AA E HANA PONO.

                I kekahi kakahiaka malie o ka la Sabati ma ke kaona o Nu Ioka, ua ikeia he keiki kane i kahikoia i na lole maikai, he buke ma kona lima, e hele mama ana ma ke alanui i ke kula Sabati.
                I ka hiki ana i ke alanui e hele ana i ka luakini, lohe oia i ka leo o na keiki, a i ka huli ana, ike oia ia lakou e panapana hua ana. Hoao mua lakou e hoowalewale iaia e noho me lakou e paani; alaila hoomaewaewa lakou iaia, a i ka ike ana i kona hoomau aku imua me ka hoolohe ole i ka lakou, hooho mai lakou me ka i ana, "Makau oe i ka noho mai; makau oe i ka haalele ke kula Sabati."
                "Aole," wahi a ke keiki me ka huli ana a nana pono ia lakou, "aole, aka, aole o'u makau e hele, ke akaaka ia oukou."

AOLE ANEI I OI AKU KE INO INA HE KANAKA MAKUA?

                Ua i mai kekahi keonimana i haalele i ke puhi baka mamua ae nei; o kana keikikane uuku ke kumu o kona haalele ana.
                Penei kana olelo. "Aole nui kuu nau baka ana, aka makemake ino no au i kuu kika. Kaena au no ka maikai o na kika Havana ia'u, a ua ike mau ia i kakahiaka me ke kika ana ko'u waha i kuu iho ana ma ke alanui me ka naau nanea wale.
                "Ua hauoli mau ka'u wahi pokii, he keikikane, eono makahiki ona, i ka hele pu ana me a'u i kona hale kula, a ua makemake no au iaia i hoahele no'u.
                "He nui na keiki pelapela, i malama ole ia, i olioli i ka loaa ana o na apana kika i haaleleia, me na ipu baka paha, a hele aku me na lima ma na pakeke a e puhi ana me ke ano kohu ole.
                "I kekahi kakahiaka, he nui na puhi baka opio i halawai me maua. Ukiuki iho la au, a kuhikuhi au ia lakou ia Edega me ka hoomaopopo ana i ko lakou lalau, me ka i ana, ua pono ina ua hoopauia ia hana e na luna aupuni o ke kaona.
                "Puhi hou au i ke kika maikai o'u; a pae mai he leo uuku nahenahe i kuu pepeiao. Ua huli mai ka maka hauoli a ke keiki ma ko'u aoao, a i mai penei, 'Aole anei i oi ke ino ina he kanaka makua, e kuu makua?'
                "Nana iho au iaia, ua piha kona mau maka i na waimaka, a ua ula kona papalina me he la ua hoopuka i kekahi olelo mahaoi, a kupono ole no ke kamalii. Ninau aku la au iaia, manao anei oe, ua oi ke ino ina he kanaka makua, e Edega? 'E oluolu oe, e kuu makua; aole no e makemake na keiki e nau, a e puhi baka, ke ole ikeia na kanaka makua e hana ana pela?' Eia ka'u haina. Haalele au i kuu kika, a ma ia manawa mai aole au i lalau hou i ka baka ma kona mau ano a pau."

KE KAHUHIPA KEIKI MAIKAI.

                He keiki no Geremania, o Gerehata; he malama hipa kana hana, he keiki ilihune loa, ua ku nae i ka mahaloia.
                I kona kiai ana i ka pua hipa iloko o ke awawa e kokoke ana i ka ululaau, ua puka mai he kanaka imi holoholona, a ninau mai la iaia: "Ehia mile mai nei a i ke kulanakauhale kokoke?" "Eono mile," wahi a ke keiki, "aka, he kuamoo wale no kahi a na hipa i hele ai, a e lalau wale ana ka mea e hoao hele malaila."
                Nana iho la ke kanaka i keia ala, a ua i mai, "E kuu keiki, he luhi, pololi, a makewai ko'u. Ua nalowale na hoahele o'u, a ua haalele au i ke alanui, aia i hea la. E waiho i kau poe hipa a e hoike mai ia'u i ke alanui, e uku pono no au ia oe."
                "Aole hiki ia'u ke haalele i na hipa a'u," wahi a Gerehata, "o holo aku lakou iloko o ka nahelehele, a pau i ka ai ia e na iliohae, a aihue ia e na powa paha."
                "Heaha la ka hewa?" wahi a ua kanaka nei, "aole nau ia poe hipa. Aole poho nui kou haku ina e lilo hookahi a elua paha o lakou; e haawi no hoi au i puu dala nau e oi ana i kou uku makahiki a pau."
                "Aole loa e hiki ia'u ke hele," wahi a Gerehata, me ka manao paa. "Uku mai kuu haku ia'u no kuu manawa, me ka manao, na'u e malama i kana mau hipa. Ina e kuai au i ko'u manawa nou, oiai aole no'u ia manawa, a nalowale na hipa, ua like no ia me ko'u aihue ana ia lakou."
                "Ea, pehea ke waiho mai oe i na hipa ia'u e malama ai, a e hele oe i ke kulanakauhale e kii i ai, me ka wai na'u, a i alakai no'u. E malama maikai no au ia lakou nau."
                Hooluliluli o Gerehata i kona poo me ka i ana, "aole ike na hipa i kou leo," a oki ae la kana olelo ana.
                "A heaha? Aole anei e hiki ia oe ke hilinai ia'u? He kanaka hana kekee anei au i ka naoa mai?" wahi a ke kanaka me ku huhu.
                "E kuu haku," wahi a ke keiki me ke akahele, "ua hoowalewale oe ia'u e haalele i ka'u hana, a e lilo ka'u olelo me ko'u haku i mea ole, pehea la e maopopo ai ia'u e malama ana oe i kau olelo ia'u."
                Akaaka ua kanaka nei, no ka mea ua puni maoli oia i ke keiki. I aku la ia, "ke ike nei au e kuu keiki, he keiki maikai, hooko pono no oe. Aole no au e hoopoina ia oe. E hoike mai i ke ala, a e hoao no au e hele pololei aku, owau wale no."
                Haawi o Gerehata i ke koena o kana mea ai a me ke eke iaia, a ai no ia me ka hauoli.
                Ia wa hoea mai na hoahele ona; ike o Gerehata me ke kahaha nui, o ke kiaaina ka keia ka mea nona na aina a pau ma ia wahi. No ka mahalo nui ana o ke kiaaina i ke ano pololoi a kupaa o keia keiki, ua hoouna oia iaia i ke kula e ao ia. Lilo o Gerehata i kanaka kaulana, waiwai, ikaika i ka hana, a mau no kona ano oiaio a hiki i ka la i make ai.
                O ka pololei oiaio, me ka hoomau a hooko pono i na hana, he mau momi maikai no kamalii a pau. Ina mailoko ae o ka pono, o ka haipule ke kupu ana, he mau daimana maemae lakou, a he mea ia e hoonani ai ka ona; e hoohauoli iaia, e hoohanohano ana iaia. E lei ia lakou e like me Gerehata, alaila e aloha mai ana kekahi i oi kona nui i ko keia kiaaina; e hookamaia oukou e ke Alii Nui, a lilo oukou i poe keiki alii nona ma ke aupuni o ke Akua.

MAGI LIILII.

                Ua aha o Magi liilii? Ua haule iwaho o ka puka aniani, a mai make.
                A pakele i ke aha? E hoolohe a na'u e hai aku.
                He kaikamahine liilii o Magi, he makuwahine haipule kona, he kaikunane hoi kona, o Kimo, a he mau kaikuaana hoi. I kekahi ahiahi mehana, e noho pu ana lakou ma ke keena hookahi, e humuhumu lole ana ka makuwahine, a e holoholo walaau ana na keiki. O Kimo nae ke keiki kolohe, a walaau me ka hookoele ana ma na puka pani olepelepe.
                Papa aku ka makuwahine, "e Kimo, kulikuli loa, u'oki, aole make e walaau pela." Ke pani koke no ia o Kimo i na puka olepelepe a pouli loa ke keena. Holo kiki o Magi a olelo aku, "aole pela e pani ai," a wehe ikaika aku oia i na puka; a i ka wehe ana aku haule oia iwaho ma na papa oolea malalo. A i ka ike ana o ka makuwahine i ka haule ana o Magi, holo oia i waho me ka pule ana, "E ka Haku e hoopakele i ka'u kaikamahine," a ike iaia e moe ana me ka oni ole, pihoihoi iho la oia; lalau ke kaikuaana iaia a hoihoi iloko o ka hale, a ninini i ka wai huihui ma kona maka, a kii koke aku i ke kauka, a kali i kona puka ana mai, a puka mai nana oia a hawi he wahi laau; a i ka ninau ana mai o ka makuwahine, "pehea o Magi, e make ana anei, e ola ana paha? Pane mai oia "e ola ana no, mai makau oukou."
                Oiaio no, aole i make o Magi, ua pohala mai no. Ua kaakaa na maka, ua oni ae; a ia la ae ku oia, a hele kapekepeke aku i ka hale kauka, a haawi aku i ka olelo hoomaikai no ka laau i pohala mai ai oia. A hala kekahi mau la ua ola loa oia.
                Eia ka ninau ia oukou e na pokii. Ehia mea i pakele ai o Magi i ka make a loaa ke ola? Ehia la e hai mai oe.
                1. Ka pule koke ana a ka makuwahine, iaia i ike ai kona haule ana.
                2. Ko ke Akua kokua ana, a haule e oia maluna o kekahi kaula kaulai lole mawaena o ka puka aniani a me ka papa oolea olalo, a emi iho ka ikaika o kona haule ana i ka papa.
                3. Ka ninini ana i ka wai ma kona maka, a kii koke aku i ke kauka a lapaauia.
                I ke Akua nae ka mana i mana ai ka pule, a me ka lapaau ana, a pono ke hoomaikai nui aku Iaia no ke ola ana o Magi. Malama ke Akua i kana mau pokii. E Mere, e hoopaa ia Luka 12:24.
                                E ke keiki makalii,
                                Ku, ku ae a himeni,
                                Himeni a halelu
                                I ka Haku ia Iesu.
                "E kuu keiki e, e malama oe i ka'u mau olelo, e waiho pu hoi i ka'u olelo me oe.
                E malama oe i ka'u kauoha i ola oe, a me ko'u kanawai hoi, e like me ke kii onohi o kou maka.
                E hawele oe ia mea ma kou manamanalima, e kakau hoi ia mea ma ka papa o kou naau."
Na Solomona 7:1, 2, 3.