Ke Alaula, Volume VII, Number 7, 1 October 1872 — Page 28
28 KE ALAULA.
KE HELE MAI NEI IESU.
Leo: "JESUS COMES." - The Silver Song.
1 Kiai pono, na haipule;
Nei ke ao a luliluli;
Ku a koli i na kukui;
Noho makaukau a mau.
HUI. Eia Iesu mai ka lani
Me ka mana, me ka nani,
Lanakila! E hoonani,
Ke 'Lii mau.
2 Nauwe koonei mau aupuni;
Paa ko Iesu, ole oni;
Holo kona kaa alohi;
Ku a ee e na pokii.
HUI - Eia Iesu mai ka lani, &c.
3 Iesu no ke Kahuhipa,
He aloha, he hookipa
Nee a hui pu me ia,
Hahai pu, a malu no.
HUI - Eia Iesu mai ka lani, &c.
4 Wiki e na lawehala,
Holo, noi ae e kala,
I pakele ma ia la la
I ka make ma ka po.
HUI - Eia Iesu mai ka lani, &c.
5 Ano no ka wa e ala,
Pau ka moe, ke kula la,
Holo, holo io na la,
Io Iesu i ola mau.
HUI - Eia Iesu mai ka lani, &c.
KELA MEA KEIA MEA.
NUI ka la, ka wela, ka maloo, i keia malama ma Kohala Hema, Kohala Akau, Hamakua ame Hilo aku. Nui nae ka ua ma Kona Akau a me Kona Hema, kahi maloo a panoa mamua aku. E pule i haule mai ka ua ma na wahi maloo. Ka pule me ka manaoio ka mea e loaa'i ka ua.
IKAIKA ka aa ana o ka pele ma Mauna Loa. Paapu ka lani i ka uwahi ma ke ao, a i ka lapalapa ahi o Gehena e punohu mau ana. E pule ikaika i ole e paa o Hawaii i ka pele.
MAKENA wale na mai, na kunu, na fiva, mamua aku nei; ua emi nae a ane pau i keia manawa. Ua auhee aku hoi ka mai hepela, ua holo la ihea? E hoomaikai aku i ke Akua no ka hoopau ana i na mai.
UA KUKULUIA ka Aha Euanelio o Hawaii Komohana ma Kona mamua aku nei. Malaila no o Rev. J. F. Pokue. Maikai no ka halawai wahi ana, palaka nae na ekalesia me na kula Sabati. Hookahi kahunapule hou, o Nawahine. Hiamoe loa o Kailua; aole ka o lakou makemake i kahunapule hou i pani no Pilipo. Naaupo maoli. E pule na hoa no na Kona elua i ala.
PALAKA loa o Waipio mamua aku nei. Ua ala hou nae i keia wa, ia Haae, ka haiolelo hou. Ua ala na halawai me na kula Sabati. E pule i mau ke ala ana.
MAUNA OLIVETA.
E hoopaanaau i keia mele:
1 Ma ka mauna Oliveta,
Pii Davida me ka uwe
A malaila uwe Iesu la
No Ierusalema e.
2 Ma ka mauna Oliveta,
Hele Iese a kulou
Ma o ae o Kederona,
Pule me ka luuluu no.
3 Mai ka mauna Oliveta
Kaikaiia'e la o Iesu
Hoi hooho lanakila
I ka home ma ke ao.
HE NANE.
Ko'u mua, ka hua mua o ka alefebeta
Ko'u mua me ke kolu, he mea hoea ke pau ka po.
Ko'u mua me ka lima, pili i ke keiki koa.
Ko'u lua me ke kolu, he 1/2 ia o lono.
Ko'u lua me ka lima, he mea nui ma ka lani.
Ko'u mua, lua, kolu, mamua ia ou.
Ko'u lua, kolu, ha, lima, pili ia i ka hale lauhala.
Ko'u lua, kolu, lima, pili ia i ka hele ana.
Ko'u kolu, ha, lima, pili ia i ke kalo.
Ko'u ha, lima, he 1/2 ia o hanu.
Ko'u ha, mua, lima, pili ia i ka lealea.
Ko'u ha, kolu, iloko ia o hooho.
Ko'u ha, kolu, mua, pili ia i ka mea hele pu me oe i ke kula.
Ko'u kolu, lima, pili ia i ka mea makua ole.
Ko'u mua, ha, kolu, he mea ia e loaa'i ka ike he nui.
Ko'u ha, mua, lua, kolu, pili ia i na ia.
Ko'u lua, mua, lima, pili ia i na luakini.
Ko'u ha, lima, kolu, pili ia i ka alunu.
Ko'u mua, lima, pili ia i ka honi ana.
Ko'u mua, ha, lima, pili ia i ka ninau.
Ko'u ha, mua, lua, lima, pili ia i ka hookuli.
Owau okoa pono ke hui me na keiki a pau.
Owai la wau? Loaa ia wai?
NA NINAU POKII.
Owai ka makua o Adamu?
Owai ka wahine a Adamu?
Ehia a Adamu keiki i paa ia oukou? Kaina, Abela, Seta. Maikai.
Owai ke keiki maikai? Owai ke keiki ino?
Owai ke pani no ke keiki i pepehiia?
He pani o Iesu nowai? No makou.
I ole oukou e aha? I ole makou e make.
Aole anei oukou e make ana? E make no ke kino. A pehea ka uhane? Aole.
Ke paulele nei anei oukou ia Iesu? Ae, aole, maopopo ole. Pela paha, aole maopopo.
Heaha ka paulele? Ka pili ana ia Iesu me ka naau, me ke aloha, me ka malama ana ai kana mau kauoha, e like, - alia, e like me ke aha? e like me ke keiki liilii i pili paa i ka poli o ka makuwahine, me ke aloha, me ka uwe ke hookaawaleia, me ka malama i kana mau huaolelo. Maikai. Ina pela ka oukou pili ana ia Iesu, he poe pokii paulele oukou ia Iesu a e ola ana oukou iaia, aole e make ana ko oukou uhane.
E hoopaa i keia himeni:
He poe makalii makou,
He poe hewa wale no,
Aloha nae Iesu,
He pani oia no makou,
I make ole ma ka po,
Hooho kai lu.
HOIKE KULA SABATI O WAIHEE.
E KE ALAULA; Aloha oe:
Ma ke kauoha a ka Papa Kula Sabati o Waihee e haawi aku au i ke kope o na hana o ka hoike ana o ke kula Sabati o Waihee ma ka la 27 o Mei, na ka nupepa ALAULA.
Ma ka hora 10 1/2 ua hoonohoia ka huakai e ka hope kahu kula Sabati, L. W. Papalimu. Ua haiamu e mai na haumana mamua ae o ka hora 9. O ka poe puhi ohe mamua a me ko lakou alakai, o ka hae Hawaii iho, ka poe lunakahiko o ka ekalesia, ka papa kula Puuwai aloha a Mrs. L. Jackson, ke kula a Mrs. E. K. Nalau, ke kula a Mrs. E. B. Holualoa, kula a Mrs. Rose Huaka, kula a S. M. P. Kaleo, kula a David Kupoi, kula a J. S. Lono, kula a L. W. Papalimu, kula a J. Kealoalii ka hope loa. Ua hele ka huakai a hoopuni i ka halewili, a hui hoi mai a komo i ka hale noho o N. W. Tallant, luna o ka mahiko o Waihee nei, ua noho ka huakai malaila hookahi hora, a mai laila aku a hoi i ka luakini Paredaise.
Hoomaka na hana ponoi me ka himeni hui o "Hui mai e hoomaikai," a pau ia pule o J. S. Lono. Hoikeia na pokii ma na haawina i hoomakaukauia no ia mau papa, me na himeni pakahi no kela papa keia papa. Ua oi aku ka makaukau o keia hoike ana i ko na hoike i hala. Eia keia mea hilu, o ka maluhia, aole haunaele, aole ano hoopaapaa. A pau ka hoike ana hoolohe ke kula i na olelo paipai a L. W. Papalimu a me J. S. Lono. Ua piha e aku makou i ka olioli no ka naauao i loaa mai i na keiki me na elemakule. Ua meleia na mele o ka Hae Hoonani me ka maikai. Eia keia mea maikai i loheia, o ka leo mele i hakuia e Mrs. H. Tallant a nana no i kuupau mai a me kona mau hoa, ua kapaia ia leo o "Ulili." Hoike mai na komite imi dala no ka luakini. Hoike mai o Mrs. H. Tallant i na dala i loaa iaia he $127.82, ia Mrs. L. Jackson $34.25, ia Mrs. Kahaunaele $8.00, ia Mrs. Rose Huaka $5.75, Mrs. Mary Kawawahimoku $5.75, Mrs. E. B. Holualoa $5.00, L. W. Papalimu $4.26, J. M. Napulou $3.12, Mrs. Kahoohuli .75 keneta, J. Kealoalii .25 keneta, o ka huina pau $198.62. A pau ia na hoolakoia ka papa aina me na lako ano Hawaii, ua ai a maona. J. KEALOALII.
KE ALAULA.
He Nupepa Hoikeike Kii.
Hoopuka mau ia ma Honolulu, i kela malama keiamalama e ka PAPA HAWAII, no na Kamalii Hawaii.
25 keneta ka uku no ka makahiki no ka pepa hookahi; 20 keneta akahi ka uku no na pepa he iwakalua a oi aku paha ma ke ope pokahi, ME KA HOOKAA MUA IA MAI.
L. LAIANA Luna Hoopuka.