Ke Alaula, Volume VII, Number 9, 1 December 1872 — Page 34
34 KE ALAULA.
PAU KA MAKAHIKI '72.
Nani na pono, no pomaikai o ke kino, o ka uhane, i loaa mai ia kakou iloko o ka makahiki i hala. Pomaikai wale na makua, na keiki, na kumu, na haumana, na kahu, na hoahanau, ka lunahooponopono i ke ALAULA, a me ka poe heluhelu. E hoomaikai aku i ke Akua, nana i hooloihi mai ko kakou ola ana, a nana i haawi lokomaikai mai i na mea a pau e pono ai ke kino a me ka uhane.
E mihi i na hewa i hanaia iloko o keia makahiki, i kalaia e Iesu, i oluolu oia ke komo kakou iloko o ka makahiki hou.
He mele no ka pau ana o ka makahiki.
1 Holo, holo ka manawa,
Me he mea eheu no,
Ole kali ke kaohi,
Holo, holo, holo mau.
Oiai e holo ana,
Ala, ala na pokii,
Hana, kula, a paani,
E paani maikai nae.
2 Eia ka malama hope
O ka makahiki nei,
Eia hoi ke ALAULA hope,
Ka nupepa kamalii;
Heluhelu a malama
Kana mau olelo ao,
Ao a mele i ke mele
No ka makahiki hou.
3 Hoomaikai ia Iesu Kristo
No ko ia la aloha mai
Mihi i na hewa i hala,
Noi ae i kalaia'e.
Aloha oe, ka makahiki,
Ke pau nei na pono ou;
Hoi oe eia kou hope,
O ka makahiki hou.
KO MAREKO HOOWALEWALE ANA.
E ku ana o Mareko B., ma ka puka-aniani i ka auina la Sabati, a e nana ana iwaho. E kani ana na bele a lehulehu na kanaka e wikiwiki ana i ka luakini e hoomana i ke Akua. Ua uhiia lakou i na hulu a me na koloka mehana, oiai ka hoomakaia o ka hooilo, o ka hebedoma mua ia o ka paa ana o ka wai i ka hau.
Me e ka huihui, wahi a Mareko. Kani hou ka bele ma kuu pepeiao i ka hoi ana mai mai ke kula Sabati mai. Elua la me nei a e nani ana ka hoopaheehee hau ana. Ua paa ka wai i keia wa, kupono no ka holo ana me ka piho ole iloko. Oki iho la kona noonoo ana pela, a i iho, "O ka la Sabati keia," a nana hou no ia iwaho. Ua pau ke kani ana o na bele, a kakaikahi ka poe ikeia ma ke alanui.
Ia wa komo mai o Beni iloko o ke keena, me ka i ana, "E moe ana o mama me ka nalulu, a ua i mai oia e noho no kaua a heluhelu, aole e hele i ka halawai."
"Molowa au i ka heluhelu i keia buke; ea, hiki no ia oe ke lawe, e Beni. E hele ana au e nana i ke anu iwaho." Hele aku no o Mareko; wehe malie i ka ipuka a puka aku iwaho. Anu maoli no, aole e puhi ana ka makani, aka ua huihui maoli ka ea, a haukeke o Mareko.
Ua paa loa paha ka hau, e maikai ana ka hoopaheehee hau. Aole no oia i kipaku i keia manao i kolo malie nui iloko o kona naau. Hoomanao oia i ka hau nani, kona mau kamaa hou, a me ka holo lealea ana ma ka hau, a i iho la ia, "aole no he hewa ina hele wale aku au a nana i ka hau. Aole o mama e ike ana."
Wehe hou oia i ka puka a lohe ia Beni e himeni ana,
"E ke Akua oia mau,
Ua ike oe ia makou,
Na hele me na hana a pau,
Ke kino pu me ka naau," &c.
No ke aha la ka ukiuki o Mareko i ka lohe ana i keia leo, a peku aku i ka ipuka o lohe hou ia i ka leo o Beni. Aole no he oluolu kona manao, a lalau ia i kona papale me ke kuka a haalele i ka hale. Me ka mama ua holo aku ia a i kae o ka wai. He mea makemake ino ia. Aia ka hau e moe aku ana imua ona; ke alanui ka palena ma kekahi aoao, a o kekahi ua komo loa aku iwaena o na kula, a nalowale iloko o na ululaau.
Hoao o Mareko e hele maluna, alaila lelele me kona ikaika a pau, aole i naha, aole i nauwe iki, o hooho oia me ka i ana, "nani maoli." A hookomo koke ia i kona mau kamaa hoopaheehee hau.
Aloha ino o Mareko. Me e ka poina koke ano o ka haawina o kakahiaka, a me na olelo maikai a ke kumu. Me ka lealea kona holo ana a liuliu, a luhi oia, ua paipai hou mai kona lunaikehala. Hooki koke ia i kana hana a me ka i ana, "e hoi koke au i kuu home; poina ia'u, o ka la Sabati keia," wehe oia i na kamaa. I ka nana ana iluna aia kekahi e iho mai ana. No ke aha ka ula ana o na papalina o Mareko, a kaumaha kona manao? O kona kumu kula Sabati keia e hookokoke mai ana, a me ka leo kaumaha i i mai, "Auwe, e Mareko!"
"Aole au i manao e hana i keia hana, aole loa," wahi a Mareko, me ka hilahila loa; a i ka nana ana iaia a ike i na waimaka ma kona mau maka, huna oia i kona mau maka a uwe.
Pane mai o Miss Balo me ka oluolu, "aole hiki ia'u ke kamailio i keia wa, aka i ka la apopo e hele mai e ike ia'u, a e hai mai no kou hoowalewaleia ana, a me kou ae ana. E Mareko, ua manao au, ua hiki ke hilinai ia oe. Minamina loa au no keia mea."
Me ke kaumaha ka hoi ana o Mareko, e noonoo ana i ka olelo a kana kumu; aole hiki ke paulele hou iaia. No ke aha ka'u hana ana i keia? Makemake ole oia e ike ia Beni, a me kona makuwahine, a o ka pau ana oia la Sabati nani, ua lilo i mea awahia loa ia Mareko.
E hoomanao oukou, e na pokii, e haka pono ana na maka o ke Akua, a o ka hua ka hewa he awahia.
HAAWINA HUI NO KA HOIKE MALAMA O NA KULA SABATI NO DEKEMABA.
Mele---"Pii i ka mauna ia Pisega."
Heluhelu paalu—Hebera 12:18-29
Pule like me keia---" E Iehova, o Oe no ke Akua mau loa, a mau hoi Kou mau ano pono a pau; mau no Kou lokomaikai, Kou ahonui; nolaila no ko makou mau ana ma ka honua nei a hiki i keia wa. Nani wale Kau mau hana, ma ka lani, ma na aina, ma na moana. O Oe no ke 'Lii kiekie loa, aia no iluna lilo Kou noho alii. Aka, ke hoohaahaa nei Oe ia Oe iho e nana mai ia makou ka poe liilii, ka poe hewa, ka poe hawawa, a naaupo, a hookuli. E nana mai Oe a makou i keia wa, i na kumu, i na haumana, e launa mai, e hoopiha ia makou i Kou Uhane Hemolele. E haawi mai i ka mihi, i ka manaoio, i ke aloha, i ka naau hou; e hoopaa i na pauku, i na himeni, i na manao paipai iloko o ko makou naau, i lilo ia i mea e naauao ai, a e makaukau ai e pii aku ai iluna, a ku ma ka mauna o Ziona hou, a hui pu, a mele pu me na haipule, a me na anela olaila a mau loa aku ma o Iesu la. Amene.
Mele na pokii— Himeni 428; leo: Jesus loves me." Golden Shower.
Na pokii—A hui elua mauna me ekolu mauna ehia ia?
Owai na mauna ekolu a oukou i ike maka ai? Maunakea.
A heaha na mea ulu ma na mauna? Heaha na mea lele a mele ma na mauna?
Owai na manu a oukou i lohe ai e mele ana?
He mele hoomaikai anei i ke Akua ko na manu? Manao anei na manu i ke Akua?
Manao anei oukou i ke Akua? No ke aha oukou e manao ai iaia? No ka mea nana makou i hana, nana makou i malama.
Heaha na mea kolo, ma na mauna?
Hai mai i kekahi mau laau e ulu nei ma na mauna. Owai ka laau kiekie loa a oukou i ike ai? He mea ulu anei na mauna? Ulu anei na pohaku? He mea ulu anei ka laau, ka uala, ke kalo, ke keiki? Aole ulu na mauna, na pohaku na laau, na keiki ka mea ulu.
Ke ulu nei no oe e Ane, e ulu ana anei oe a kiekie loa, e like me ka laau ohia? Ae, aole.
Ke ae nei, ke hoole nei, mahea ka oiaio?
Ke ulu nei na laau a kiekie, a oki, a maloo, a hina, e ala hou a ulu hou anei ia ke hina?
A oki kou ulu ana, a hina oe, oia hoi kou make ana, e ala hou, a ola hou ane oe mahope? Ae, aole, ae, e ala hou no. A noho mahea?
Mele—"A wehe ke alaula."
Na kaikamahine-Loihi ke kula ana no na mauna;ke ake nei paha oukou e pau na mauna, ua pono ia a hiki kakou i ka mauna hope; owai la ia mauna ma ka oukou koho ana? E hai mai i na mauna i pau, a e noonoo i ka mea i koe, owai la? O--mea, O---mea; O---owai?
"O Ziona paha. Ae oia no.
Ehia Ziona? Aia la mahea?
Ziona mua. Heaha ia? Oia ka mauna maoli, e pili ana ia mauna Moria.
"He nani no ke kiekie ana, he mea olioli no ka honua a pau, o mauna Ziona ma na aoao kukulu akau, ke kulanakauhale o ke 'Lii Nui." Halelu 48:2.
He mauna kiekie anei neia? Aole, he 2,500 kapuai wale no ke kiekie mai ka ili o ke Kaiwaenahonua; a mai na awawa o kona kumu a i ka piko 300 wale no kapuai, he wahi puu wale no. Aka no kona kaulana ua kapaia oia he mauna.
Owai ke kulanakauhale i kukuluia maluna o Ziona me kekahi mau mauna e ae? Ierusalema.
Nawai i hoopio ia Ziona? A lilo Ziona i kulanakauhale nowai? No Davida. 2 Sam. 5:7.
Ziona elua. Heaha ia? O ka ekalesia o ke Akua ma keia ao, oia hoi ka poe pono.
Ziona Ekolu. Heaha ia? Oia ka ekalesia ma ka lani. O ka Ziona nani loa ia.