Ke Alaula, Volume VII, Number 9, 1 December 1872 — Page 36
36 KE ALAULA.
NA OHINA MAKAHIKI.
Leo: GLEANINOS FROM THE YEAR. -Child's Paper. Sept. 1872.
O - li e ka la o - li - no, Me - le mai na ma - nu e, Oi - ai ma - ko - u e hu - i, Ma ka aha ha - la - wa - i, E u - la - na i lei na - ni Me na pu - a o - li nei. No ka la la ha – pe nu ia, La e o - li li - ke ai; No ka la la ha - pe nu ia, Ia e o - li li - ke ai.
2. Nani ko Iesu aloha
Ma na la i hala 'e nei,
Hookupaa i ole e hina,
Pale i na inoa e;
Kuhikuhi i ke ala
I ole hele hewa ae,
Lohe no ke noi aku
A haawi wale mai.
3. Lawe mai i mau makana,
I mau mea maikai no,
I mau hua hoohauoli,
I mau mele ano hou,
I mau hana ano pono,
Ano lokomaikai no.
I mau huna i ohiia
Mai ka makahiki i pau:
4. Ina kakou i kokua
I kekahi hune nei,
I kekahi mea pololi,
I ka mea makewai;
Kii aloha i auwana,
Noho me ke akahai,
Oluolu no ka Haku,
Hoapono, hoomaikai;
5. O ka hana a noho pu no,
He mohai aala nei,
Pii ke ala i ka lani
Honi a mahaloia e.
Oli e ma keia hora,
E ulana i mau lei
Me na lau na pua mele.
No ka hape no ia nei.
HE NANI, HE MEA MAKE NAE.
He mau mea nani a kamahao iwaena o ia mea iloko o ke kai. He wahi mea me he pua la kekahi, o ka Opeleta ka inoa haole.
He mau lau omaomao nani kona, he ulaulua hinuhinu na welau. Aole moe malie na lau, aka e lana a huli mau ana ma ke kai; pili nae ke kino o ka pua i ka nui o ka manawa i kekahi pohaku. Ma ka nana aku he mea makamae, he nani, he mea make ole. Me he mau lima nani la na lau e lana a huli ana i o i anei e imi ana i ka me ai. He waha no ko keia pua, ua hunaia nae iwaena o na lau nani. Aia a pa ka ia liilii i na lehelehe o ka pua, holo koke me he uila la, ka mea make mai ka pua a komo iloko o ka ia, ka lolo koke no ia o ka ia a oni ole. Alaila puliki na lima lana iaia a omoia oia iloko o ka waha o ka pua a nalo loa iho la ia, aole ike hou ia. A mahope iho wehe ia na lima a imi hou i na mea e ale hou ai. Ka hana mau keia a ka pua Opeleta.
Aole anei me keia Opeleta kekahi mau mea a kakou e ike maka nei, he nani ma ka nana aku, he mea make nae maloko? Nui na mea hoowalewale, nui na lima nani e huli ana i o a ianei, e imi ana i na mea e puliki a ale wale ai.
E na keiki, e kiai, e makaala, mai holo wale iloko o na lau nani o ka Opeleta.
HE MAU APO LIMA MAIKAI.
Nui ke ano o na apo lima, he apo lima, a dala, a gula, a daimana. O ka makemake nui o kekahi kaikamahine e loaa a komo ma kona manamana lima kekahi apo gula, me ka manao oia ka mea e lawe ai kona pomaikai. Ua ko no kona makemake; ua loaa ke komo gula a kau no ma kona lima, aole nae i ko kona manao, aole i loaa mai ka pomaikai, ka olioli iloko o kona naau.
Pela paha kekahi mau kaikamahine, a wahine makua paha, ua paapu paha na manamanalima i na apo kala, a gula hoi, a le nae i loaa ka pomaikai, ka olioli o ka naau.
E hoolohe a e hai aku au i na apo lima i oi k a maikai i ko ka apo gula. Eia ke apo e kau ma ka manamana mua: ka Lokomaikai ma ka manamana elua, ka Oluolu; ma ka manamana ekolu, ka Hana Pono; ma ka manamana eha; ka Haipule. Na apo keia e loaa ai ka po i a kai io a me ka olioli o ka naau. E hoao oukou e kau i keia mau apo maikai e eha, aole lilo ke dala maoli i na hale kuai. He mau pa keia e haawi wale ia mai ke imi a ke noi aku i ka Akua e kokua i ka loaa ana mai. A ne'e i keia mau apo, heaha ka pomaikai ke loaa na apo gula daimana a paapu na lima ia mau apo?
KELA MEA, KEIA MEA.
Ke Kula kaikamahine hou. - E kukuluia ana he kula hanai no na kaikamahine, ma lole, Kohala Akau, ma keia hope aku i kokoke kahi e kulaia ai na kaikamahine o ka mokupuni o Hawaii.
Ua kokua mai ka Uhane Hemolele i ke kula Sabati ma Waimea, Hawaii, ua hookomoia kekahi mau kaikamahine eha iloko o ka ekalesia, a e komo hou mai ana no kekahi poe ma keia hope aku ke hoomau lakou ma ka hana pono.
He poe hana, a kuai, a ona rama ma Kawaihae-uka, a hopuia a hookolokoloia a hoopaiia i keia mau la. E pau loa aku ia hana ino.
He wahi kamaiki i make ma Waikoloa, Waimea, Hawaii, ma ka la 25 o Okatoba nei, a ma ka hoolewa ana ma ka la 26, ua akaka he keiki i aloha nui ia keia ma ka nui o ka poe i nauwe kanikau i kona hale kupapau. "E ae e hele mai na keiki liilii i o'u nei," wahi a Iesu, "meia lakou ma ka lani."
Ma na nuhou i loaa mai i ka malama i hala, ua koho hou ia no ke keiki kuaaina, a koa kaulana hoi, o Grant, i Peresidena no Amerika Huipuia.
HE NANE.
Elima o'u mau lala, palua na hua ma kela a me keia lala.
Ko'u poo, ke poo ia o ka inoa o kekahi manu haole.
Ko'u a-i iloko ia o Babulona.
Ko'u opu, ka inoa ia o kekahi iwi hope.
Ko'u poo me ko'u uha, ka inoa ia o kekahi manu haole.
Ko'u opu me ko'u uha, ke poo ia o ka wahine.
Ko'u wawae, ka inoa nui ia o na Moi o Rusia.
Ko'u kino a pau, he alii nui a kaulana i kapaia ka hamare o ka honua, a he laau hoi e kuaia ana ilalo, me ke koe nae o ke kumu kahi e ulu hou ai ilalo owai la wau?
E noonoo ka poe noeau i keia nane i loaa. E loaa, ana paha ia Maukaa, a ia Kaaukai, aole paha. E hoao nae.
Ka haina o ka nane ma ke ALAULA O Okatoba. Eia ia: Aloha. Ua loaa i ke kula Sabati o Kailua, Hawaii, a ia Kaaukai, ia Iane Maukaa, ia Iuliana.
Ka haina o ka nane i paiia ma ke ALAULA o Novemaba. Eia ia: Solomona. Hooiaio: 1, 2, So; 1, 2, 3 Sol; 1, 2, 3, 4, Solo; 2, 3, 4, Olo; 3, 4, 5, 8, Loma; 7, 2, No; 3, 4, 7, 6, Lono; 8, 5, 6, Amo; 2, 7, 8, Ona; 8, 7, 6. Ano; 2, 4, O-o; 2, 4, 6, OOO; 8, 2, Ao; 2, 8, O-a; 5, 6, 8, Moa; 5, 8, 7, 6, Mano; 2, 5, 6, Omo; 7, 8, 3, 4, Nalo; 7, 8, 6, Nao; 5, 2, 4, Moo.
Loaa ia S. K. Hiwauli no Lahainaluka.
NA UI KAMALII.
Ke lawe nei anei oukou i ke ALAULA? Ae. aole ae.
Ka poe lawe e kau na lima akau. Ha poe lawe ole e kau na lima hema.
Ehia ALAULA ke helu mai Aperila a Dekemaba? Eha, ehiku, eiwa.
Heaha ka pololei?
Ua pau anei na ALAULA i ka heluheluia? Pau kekahi hapa, pau ole kekahi hapa.
He poe uuku oukou nawai i wehewehe i na kaao, a me na mele iloko? Na ke kumu, na ke kahunapule, na ka makua.
Wehewehe pinepine anei na makua? Aole, kakaikahi, a ua ole loa no kekahi.
Ke nana nei a ke olioli nei anei oukou i na kii? Ko makou olioli nui no ia o na kii a makemake e mahuahua lakou.
Ke paanaau nei anei na mele? Paa kekahi a paa ole kekahi, no ke ao ole ia.
Heaha ka hana nui a ke ALAULA? O ka hanai i ko makou uhane, a hoonaauao mai, a hoohauoli, a hoomakaukau ia makou no ke mele ana i na mele ma ka lani.
E hiki aku ana anei oukou i ka lani? Ae ke pono.
Ma owai la? Ma o Iesu la. Maikai.
KE ALAULA.
He Nupepa Hoikeike Kii,
Hoopuka mau ia ma Honolulu, i kela malama keia malama e ka PAPA HAWAII, no na Kamalii Hawaii.
25 keneta ka uku no ka makahiki no ka pepa hookahi; 20 keneta akahi ka uku no na pepa he iwakalua a oi aku paha ma ke ope pakahi, ME KA HOOKAA MUA IA MAI.
L. LAIANA, Luna Hoopuka.