Ke Alaula, Volume VII, Number 10, 1 January 1873 — Page 38

38 KE ALAULA.

                Eia paha ka lua. E hoohiki e malama pono i keia alii hou, ia 1873. Mai hana ino, a kipi aku iaia, a hehi wale i kona mau minute, a hora, a la, a hebedoma, a malama malalo iho o ko kakou mau wawae.
                E malama pono i kana mau makana, i na kula, i na halawai, i na ALAULA, na hoike kula Sabati a me na haawina a pau o ka 1873. E heluhelu mau i ke ALAULA me ka hoomanao a noonoo pono, a hoopili pono i na mea i kakauia maloko, i ole e makehewa ka luhi o ka lunahooponopono, a poho wale ka hapaha i lilo iaia.
                Eia paha ke kolu. E noho pono oukou, e na keiki, na pokii, e noho maemae, e noho oluolu, e holoho i na makua a me na kumu , mai hookuli a olelo ino, a hookaumaha wale ia lakou. E noho kuikahi' e aloha kekahi i kekahi, e malama pono i ke Akua, e hahai mamuli o Iesu. E noho me ka manao, ka makahiki hope paha keia ou, nolaila e hana me ka ikaika i na hana maikai i haawiia mai no keia mekahiki; mai hoopanee i kekahi no ka makahiki '74. Aole akaka e loaa ana ia makahiki ia oe. E noho makaukau no ka lani ke kiiia mai oe i keia makahiki.

HE MELE MAKAHIKI HOU.
Leo: BRIGHT MANSION." - Hae Hoonani p. 13.

1 Hamau! hamau! he kani nei,
E kikeke mai ana;
E wehe i ka puka e,
He malihini paha.

HUI - Owai la oe? e hai mai;
Owai la kou inoa?
He malihini maikai ae,
A lokomaikai loa.

2 Ka makahiki hou anei?
Ina o oe, aloha;
E komo e, a noho mai
Me makou nei na hoa.

HUI - Owau no ia, a me a'u no
Na pono na makana,
A haawi wale ia oukou,
Ke pono nae ka hana.

NA HIHIA LIILII.

                I kekahi manawa, i ke au o kekahi alii nui, hoolimalima oia i na kanaka me na kamalii e ulana lole nona. Na ke alii no i hoolako ia lakou i na lopi, na pihi, na mea hana, a makemake oia i ka poe paahana maikai, e hana mau ana me ka molowa ole.
                He alii lokomaikai, a oluolu no oia. A kauoha ia i na paahana, ina he mea hihia a pohihihi a maopopo ole, e lawe aku iona la, a nana e wehewehe a kuhikuhi i ke ano o ka hana. Aole make e makau i ka hoonaukiuki ana iaia.
                Mawaena o lakou he wahi kaikamahine uuku, kupono nae ke hana, ma ka manao o ke 'lii. Ma kahi kaawale oia i hana'i, oia hookahi wale no i kekahi manawa. Hana mau no oia me ka oluolu a me ka olioli, me he la aohe mea hoohihia a hoopilikia iaia.
                I kekahi la, nui na hihia o na kanaka makua, pono ole ka hana, aole like me ke kumu hoohalike, pihoihoi lakou, a akoakoa lakou ma kahi o ua kaikamahine nei, a ninau iaia, "Ea, e ke kaikamahine liilii, heaha ke kumu o kou olioli mau ana ma kau hana, me ka loaa ole o na hihia, na pilikia? Loaa pinepine na hihia ia makou."
                Pane aku oia, "no ke aha ko oukou hoopii ole aku i ke alii me ko oukou mau hihia, e like me kana hauoha ana mai ia kakou?"
                Hoopii no makou iaia i ke kakahiaka a me ke ahiahi," wahi a lakou.
                Pane hou aku ke kaikamahine, "aka, owau nei, ke hoopii koke aku nei au i ko'u alii, ke loaa ka hihia ia'u."
                Owai keia alii a ke kaikamahine i hoopii koke ai ke pilikia?
"Na hihia, na makau,
E hoike ia Iesu.
Nana no e wehe ae,
Nana hoi e hoona mai."

"E noi a e haawiia no oukou;
E imi a e loaa hoi ia oukou;
E kikeke a e weheia no oukou;

KA HOOLOLI A MAHELE ANA.
Heaha ka mea e hoololiia ana a e maheleia ana?

                Ka Haawina kula Sabati Hoike Malama. Ma ke kauoha a ka Peresidena o ka Ahahui Kula Sabati, C. J. Laiana, he pono ke hoopau i ka Haawina Malama, a eia ke pani, i mau haawina pokole eha no na pokii o na kula Sabati, mai Hawaii a Kauai. E like ana ka nui o na haawina me ka nui o na Sabati ma ka malama; ina elima Sabati ma kekahi malama, elima no haawina. Hookahi no haawina ma ka Sabati hookahi. E helu ana 1, 2, 3, 4, a pela aku, e like me ka helu ana i na haawina e paiia ana ma ke Kuokoa.
                A o na kumuhana, na pauku Baibala, e paiia ana ma ke Kuokoa, oia no na kumuhana a me na pauku Baibala ma ke ALAULA no na haawina pokii. Okoa nae na ninau no ka mea, he poe pokii keia, aole i ao, aole i makaukau i ka noonoo ana, a i ka wehewehe ana, e like me na keiki nui, na ui, na kanaka makua, na elemakule, a luwahine.
                He poe ai waiu na pokii, na keiki uuku, a pono ke hakuia na ninau, na haina, na manao, na mele kupono ia lakou, i ko lakou kumu noonoo palupalu.
                E na Kahu kula Sabati a me na Kumu kula Sabati, e hoomanao oukou, he poe nui na pokii, na keiki liilii, he mau momi maikai, he mau daimana nani. Aia nae na momi iloko o ke kai, aia na daimana iloko o na lua, na mauna lanahu. Ma ke akamai, a ma ka hooikaika, a hoomanawanui ana e loaa ai ia i na kanaka.
                Pela hoi na keiki liilii; ma ke akamai, a ikaika, a ahonui, a aloha o na kumu e lilo ai lakou i mau momi maikai a i mau daimana nani.
                Nolaila, e imiia a e hoonohoia i mau kumu kupono, makaukau, aloha, ahohui, maluna o na pokii, na keiki uuku. E malama pono, e kiai pono, e alakai pono, e ao pono ia lakou.
                Ke paiia nei a e paiia ana kekahi mau ninau no na pokii. Aka, aole pau na ninau; na oukou e na kumu, na kahu, e haku i mau ninau hou ke pau ole ka manawa; e hoopiha i ka manawa. Ina kaawale ka papa pokii ma kekahi keena e hiki ke pule, a himeni me na keiki e like me ko oukou makemake. O ke kaawale ka maikai loa alaila aole e kulikuli a haunaele na papa e ae; a hiki ke mahuahua na himeni, na pule, na ninau. E hui nae na papa a pau ma ka hoomaka ana a ma ka hoopau ana i ke kula.
                E hoomanao i keia rula, e pokole na pule, aole hiki i na keiki ke hoomanawanui i na pule loihi a me na manao loihi. Pela na himeni, i hookahi. 2, 3, paha pauku i ke mele hookahi ana.
                E ao i na keiki i mau pule pokole kupono. E hoopaanaau lakou a e hoopuka ia mau pule.
                E kau ma na paia o na keena kula, i na kii maikai, i na palapala aina Baibala, i na pauku Baibala i paiia me na hua nani.
Aloha nui. L. H.

HAAWINA KULA SABATI POKII NO IANUARI 1873.
Helu 1 - Ianuari 5.
Kumuhana - KA KE AKUA HANA ANA I NA MEA A PAU. Pauku Baibala - KINOHI 1:1.

                Na keikikane - Nawai i hana na mea a pau?
                He mea nui anei ke Akua?
                Ua like pu anei kekahi kanaka, kekahi alii me ke Akua? Aole paha, he mea liilii wale iho no na 'lii nui o keia ao, ua nui loa aku ke Akua. Aole loaa kona like ke huliia ma na wahi a pau.
                Ehia hoi Akua? Hookahi wale no Akua oiaio. Pela ke kanawai akahi: "Owau no Iehova, kou Akua, aole ou Akua e ae." Maikai oukou.
                Na kaikamahine - Hai mai i kekahi pauku kokua ma Isaia 45:21, 22. "Aole anei owau o Iehova? o ke Akua pono, ka mea e ola'i, aohe mea e ae? Owau no ke Akua aohe mea e ae."
                Mahea i ikeia ai na ke Akua i hana na mea a pau? Ma ka Baibala.
                Ma ka buke hea? Ma Kinohi.
                Nohea ka inoa Kinohi? No ka pauku 1 no. I kinohi hana ke Akua.
                Na keikikane - Nawai i kakau o Kinohi? Na Mose.
                Nawai i kokua i ke kakau ana? Na ka Uhane Hemolele.
                Ae e like me kau kakau ana, e Keoni, na ka makua i haawi mai i ka manao, i na huaolelo, a kokua i kou lima i ke kakau ana i kakau pololei oe.
                He mau buke e ae anei ka Mose i kakau ai? Ae. Owai? Pukaana, Oihanakahuna, Nahelu, Kanawailua.
                A hui pu me Kinohi ehia?
                Na kaikamahine - Hai paanaau mai i na buke elima a Mose i kakau ai? Owai ka inoa nui oia mau buke elima? Penetetuka, na Kanawai kekahi inoa.
                Heaha ka ke Akua i hana ai i Kinohi? Ka lani, ka honua.
                Heaha ke ano o kinohi? Ka manawa i hoomaka ai ke Akua i kana mau hana. Ae, ke ano ia maanei.
                Owai ma kinohi wahi a Ioane? Ka Logou. I kinohi ka Logou.
                Na keikikane - Heaha ke ano o kinohi ma Ioane? Ka manawa kumu ole. Ae, i ka manawa kahiko loa, aohe mea i hanaia, o ke Akua wale no ka mea e noho ana.
                Ua hanaia anei ke Akua? Aole, oia wale no ka mea i hana ole ia.
                Ka Logou, ke Akua, ua like pu anei laua? Ae, hookahi no laua.
                Ehia mea i hui ma ka huaolelo Akua? Ekolu, ka Makua, ke Keiki, ka Uhane Hemolele.