Ke Alaula, Volume VII, Number 10, 1 January 1873 — Page 40
40 KE ALAULA.
NAUWE! NAUWE!
Leo: "EVER OOWARD." - Pure Gold.
Boys - 1. E na kei-ki nau-we Ihea e nau-we nei? No-ho a hoo-ma-ha, Ma-ha i-ki e. Girls. – O-le po-no e ma-ha'e, Ke kau nei ka la; Wi-ki i ka nau-we, O pau e ka wa. HUI. Ku a nau-we, nau-we; Mai lo-lo-hi e; Nau-we me ka ha-na; Ma-ha ma-lu-na'e.
2 Boys - E na keiki nauwe,
Luhi auanei;
Nui no na ino,
Na me' alalai.
Girls - Nauwe aku nae makou,
Nauwe ae a mau;
Iesu no ka Luna,
Ole e makau.
HUI - Ku a nauwe, nauwe, &c.
3 Boys - E na keiki nauwe,
Ihea e nauwe nei?
Iluna i ka lani,
Aina nani e.
Girls - Ae, ke pii nei i ke ao,
Ia Ziona Hou;
Hui anei oukou la
Me makou ma o!
HUI - Ku a nauwe, nauwe, &c.
4 Boys - E na keiki nauwe,
Ae anei oukou
I ko makou hui,
A kokua pu?
Girls - Ae, e hui, hui mai,
Hui aloha pu,
Hui a nauwe like
I ke ao ma o.
HUI - Ku a nauwe, nauwe, &c.
HUI A PAU - Nauue pu a like
Ma ka wa ano,
Ma ka makahiki,
Makahiki hou;
Wa maikai e hui ai
Ma ka nauwe pu
I ka aina nani,
Kahi o Iesu.
HUI - Ku a nauwe, nauwe, &c.
He keiki hewa anei o Kaina? Ae, ua huhu i kona kaikaina a pepehi iaia. Kinohi 4:8; e heluhelu.
He huhu aha ko Kaina? He huhu kumu ole, he hoohalahala no ko ke Akua makemake i ka Abela mohai a makemake ole i kana.
Maikai o Abela, mohai oia me ke aloha, me ka manaoio i ka mea e hiki mai ana, oia hoi o Iesu. Hewa o Kaina, mohai oia me ke aloha ole, me ka manaoio ole, a haalele ke Akua i kana mohai a lawe i ka Abela.
Nolaila anei ka huhu a me ka pepehi ana o Kaina i kona kaikaina? Ae, no ka hooleia o kana mohai.
E noonoo oukou i na kumu, a e hoomanao he hoapili ka huhu no ka pepehi kanaka, a e alakai aku ana ilaila.
Aole i pau na ninau, ua piha nae ka pepa, me ka pau paha o ka manawa, a i ole, na na kumu no e ninau hou aku ma Hebera 11:4; I Ioane 3:12.
Mele - "Kahuhipa maikai." Hoopaanaau a himeni i ekolu pauku.
HE POPO BERENA I PIHA I KE DALA.
Ulu ka ke dala iloko o ka popo berena? He hu paha ia e hu ai? Alia, a na'u e wehewehe aku. ke hoolohe nae oukou e na pokii.
He wi nui ma ke kauwahi o Geremania mamua aku; nui na keiki ilihune a pololi. He kanaka waiwai a lako i ka ai malaila, he kanaka lokomaikai hoi; a kauoha oia i na keiki pololi he 20 e hele i kona hale i kela la keia la e loaa'i ka ai iloko o ka wa wi.
A hele mai no he 20 keiki ma ka la mua. Aia hoi he hinai nui e ku ana ma ke keena hookipa. Olelo ka ona o ka hale, eia ka hinai, he mau popo berena ho 20 maloko, ua pakahiia na oukou a pau.
O ka lele no ia o na keiki maluna o ka hinai a aumeume kela me keia i loaa ka popo nui a maikai, a pau na popo he 19 i ka laweia e na keiki he 19, a hoi aku lakou me ke aloha ole i ka ona. Hookahi wahi popo i koe, he wahi popo uuku ia, a haaleleia no ka uuku. Koe hoi hookahi keiki, he kaikamahine uuku ia i kahikoia i ka lole ano maikai ole, ua maemae nae, o Peleneka kona inoa; hele oia a hookomo i kona lima iloko o ka hinai a lawe ia popo uuku i koe, a aloha oia i ka ona o ka hale, a hoi aku i kona home.
A ma ia la ae, hele hou mai lakou o ua 20 keiki nei, a hana, aumeume, a aloha ole ua mau keiki 19 nei. Pau na popo nui i ka lawe ia e lakou, he wahi popo uuku loa ka i koe, a lilo ia Pelenaka.
Hoi oia i kona home, a i ka okioki ana i ua popo berena uuka loa nei, aia hoi, helelei mai la mawaho ma ka papa he mau apapa dala maikai. Pihoihoi ka makuwahine a olelo, "he lalau paha keia o ka ona; e hoihoi aku oe e Pelenaka i keia mau apana dala i ka ona."
I ka hoihoi ana o ua kaikamahine uuku nei i na apana dala, pane oluolu mai ka ona. "Aole au i lalau, ua ike au ia mau apana kala, na'u no ia i hahao iloko o ka popo berena uuku i lilo ia ia oe i makana aloha nau na ke kaikamahine haahaa, akahele, noho malie, a aloha mai hoi ia'u i kou hoi ana i kou home. Pela no oe e hoomau ai ma keia ano maikai a e lako mau no oe i na mea e pono ai aole oe e nele ana.
E Mere e hoopaa i keia mele:
E hana oluolu,
E noho a haahaa,
A pau ka aumeume,
E pau ka hakaka,
Pomaikai no na keiki
Ke haahaa ka naau,
No lakou no ke aupuni
Ke aupuni oia mau.
MAKE ANA O KA MOI KAMEHAMEHA V.
Ua kahea hou ia mai nei ka lahui Hawaii e kumakena hou aku mamuli o ka make ana o ko kakou Moi alohaia Kamehameha V. Ua make oia maloko o ka Hale Alii Iolani, ma ka hora 10 me 20 minute o ka Poakolu, Dekemaba 11, a oia no hoi kona la hanau. Ua hanauia oia ma Honolulu nei i ka la 11 o Dekemaba, makahiki 1830, a no ia mea ua 42 kona mau makahiki i kona wa i make ai. Ua noho oia maluna o ka Noho Alii ma ka la 30 o Novemaba, 1863, a nolaila he 9 wale no makahiki me 11 la ona i noho alii ai.
Ma ka la 7 o Ianuari, 1873, oia ka Poalua, e hoolewaia ana kona kino kupapau a waihoia aku e moe pu me na iwi o kona makuakane a me na alii e ae o Hawaii nei maloko o ka Ilina Alii nani ma Nuuanu. O ke kolu keia o na Moi make a kakou i ike ai iloko o 18 makahiki. Make o Kauikeouli ma ka la 15 o Dekemaba 1854; a o Liholiho hoi i Novemaba 30, 1863; a o Kamehameha V., i Dekemaba 11, 1872.
He loihi ke kaa ana o ko kakou Makua Alii i ka nawaliwali a ka mai, a i na hebedoma hope iho nei, ua nui loa mai, aka he kakaikahi ka poe pili loa i ike e i keia make hikiwawe. He haawina keia nana e ao mai ia kakou e makaukau e kakou no ke kenaia mai e ka make. E pau ana no kakou a pau i ka hele imua o ka Mea nana i hana, a hoike aku i ka moolelo o ka kakou mau hana ma keia ao; a nolaila, o ka poe naauao a pau ua makaukau e lakou no ka hele aku e halawai me ke Akua a me ka Hoola. - Kuokoa.
Na Ieru mai ka lei alii
Nani, nani, nani.
Na Iesu mai ka lei alii,
Nani, nani, nani.
He aupuni mau, he lei maikai,
Nani, nani, nani.
He aupuni mau, he lei maikai,
Nani na hoaaloha.
Ke hea nei Iesu hele mai,
Nani, nani, nani.
E hele pu mai e na pokii,
E kau ka lei nani alii.
He lei nani ko ka lani,
Nani, nani, nani.
He lei nani ko ka lani,
Ka lei alii nou a no'u pu.
KE AAULA,
He Nupepa Hoikeike Kii,
Hoopuka mau ia ma Honolulu, i kela malama keia malama e ka PAPA HAWAII, no na Kamalii Hawaii.
25 Keneta ka uku no ka makahiki no ka pepa hookahi; 20 keneta akahi ka uku no na pepa he iwakalua a oi aku paha ma ke ope pokahi, ME KA HOOKAA MUA IA MAI.
L. LAIANA Luna Hoop.