Ke Alaula, Volume VII, Number 11, 1 February 1873 — Page 44
44 KE ALAULA.
E OLI, OLI.
Leo: "REJOICE, REJOICE." - Pure Gold.
E o-li e, a me-le i ka Iubile. Ua hi-ki mai ka Ha-ku e mai lu-na mai. O ka Mesia nei, O ko ke ao A-lii; Ua kau ke ka-na-wai mai-kai, Hoo-lo-he na po-kii.
2. E oli e, a mele i ka Iubile,
Ua hiki mai Iesu, ke Keikihipa e
Aloha a make no
I mohai e ola'i;
Na ke Akua i haawi mai
I ola na pokii.
HUI - E oli e, a mele i ka Iubile, &c.
3. E oli e a mele i ka Iubile.
Ua hiki mai ke Kaula e mai luna mai;
Iesu ua Kaula nei,
A nana i ao mai
Na olelo maikai e ola'i;
Hoopaa na pokole
HUI- E oli e, a mele i ka Iubile, &c.
4. E oli e, a ae e lilo no Iesu.
Na kino kamalii me na uhane pu;
A nana e kala mai
Na hewa no a pau.
A haawi mai ka makaukau
A pii ai i ke ao.
HUI- E oli e, a mele ka Iubile, &c.
heluhelu i ka moolelo no ke keiki uhauha, ma Luka 15: 11, 24.
E hoohalike me ia ma ka hoi mihi ana i ka Makua:
"Pouli no ke ala o'u,
E kuu Makua aloha,
E kuu Makua aloha,
Ke kau a hoohekili no
Na ao hakumakuma,
Ke ku a pili pu nei au
Ma keia waonahele,
E paa kuu lima, a kai ia'u,
I malu ae kuu hele.
"E noi, a e haawi ia na oukou; e imi, a e loaa hoi ia oukou; e kikeke, a e weheia no oukou."
KA RULA GULA.
He wahi kaikamahine uuku Susana; iaia i alima makahiki ai, hele oia i ke kula Sabati, a, ua aoia oia e kona makuwahine i keia mau hua olelo: "O na mea apau a oukou e makemake ai e hanaia mai ia oukou e na kanaka, oia ka oukou e hana aku ai ia lakou." A hai aku ka makuwahine i ke kaikamahine : Ka Rula Gula keia no na kanaka, a no na kamalii apau. Ma keia kula e ana ai lakou i ka lakou mau hana.
Aole paa koke keia rula ia Susana, no ka loihi, aka, ma ka hai a kuawili ana o ka makua, a o keiki hoi, ua manao ke keiki ua paa loa ia pauku iaia, aole e lalau ana ke ku, a hai imua o ke kula apau. I ke ku ana nae e hai, ua nalowale ke ano o ka hoopaa ana, penei: Mai hana aku ia hai i na mea a oukou i makemake ole ai e hanaia mai ia oukou.
Ua pololei anei keia haina o ka Rula Gula? Ua hoopono no ke kumu me ka hoohauoli ana i ka naau o Susana, olioli hoi na haumana nui i ka lohe ana i kona haina. A, ua kuhi ke kaikamahine ua pololei no. Aka, mahope loa mai, ike oia ua hewa; mahea kona hewa? Ma ka hoololi ana, e nana oukou i ka Rula Gula, a hoopaa pono e like me ke pai ana ma Mataio, Mokuna 7: 12. Ua like no ke ano o ka haina a Susana me ka pauku i paiia, aole nae ia i like me ke pai ana.
I na hoopaa naau oukou, e na keiki, i ka pauku Baibala, ka pauku himeni paha, e hoopaa pololei no, aole make e hoololi, i hoohaule i kekahi hua, a hookomo i hua hou, a hookekee E like me ke pai ana, pela e hoopanaau ai.
E hoopaa ponoi "Ka Rula Gula," Ke ano nui keia, e hana ma kai aku oe i kou hoa, e olelo maikai aku iaia, ke makemake oe e hana maikai mai, a olelo maikai mai kou hoa ia oe. Mai hana ino aku, a mai olelo ino aku oe i kou hoa, ke makemake ole oe e hana ino, a olelo ino mai kou hoa ia oe. E hoopaa i keia pauku himeni
"E hana aku ia hai
Me oe e makemake ai
E hana mai lakou;
Pela ke kanawai maikai
A Iesu Kristo i kau ai
Maluna o kakou."
"Mai manao ino aku, o manao ino ia mai."
"E hoomaikai aku, mai hooino aku."
"E na pokii, e aloha aku oukou kekahi i kekahi."
Aloha 'kahi i kekahi,
Pela Iesu i ao mai;
Mai kue, a ahiahi,
Noho olu a maikai.
KELA MEA, KEIA MEA.
Ua hoopaneeia ke kukulu ana i ke kula kaikamahine ma Kohala, a akaka ka manao o Hilo Ma ka hui ana e holo mama ai. Ma ke kaawale ana e holo pupu ai. E hui ka pono, a alu like mai Kohala a Kau.
Ka la hanau o ka Moi, Kamehameha V., la 11 o Dekemaba, ua hoomanoia ma ke kau wahi me ka olioli no, me ka pii i na puu o na keiki a hoonani i na poo, i na kino, i na pua a lau nahelehele, me ka ike ole, ua make ka Moi ma ia la, a hui pu ka la hanau, ka la make, ma ka la hookahi. Ina ua ike e ua make ka Moi ma ia la, ina ua hui pu ke kanikau aloha me ka olioli, a nalo ka leo olioli iloko o ka leo kanikau. A hoea ka lohe, ua make ka Moi, nui ke kaumaha a me ke kanikau ana. Kanikau na Kula Sabati; kanikau na Kula Kumu; kanikau na aha halawai. Ke kau nei na hoailona kanikau ma na lima, a ma na papale.
Make na Moi o keia ao, owai ka Moi make ole?
La Karisemaka, la kalaia, Aupuni ka la 25 o Dekemaba, ka la i hanau ai Iesu, ua malama ia no ma kau wahi, aole; malama ia ma kau wahi. Kanalua kekahi poe, a ninau paha, no keaha ka lawe ana o ke Aupuni i keia la, i la Aupuni? Olelo Iesu: Aole no keia ao kou aupuni.
Maloko o ke au Moi hea i laweia'i keia la Ekalesia i la Aupuni?
Pono no ke hoomanao ia la, me ka manao maikai nae, a me na hana maikai hoi, aole me na hana lealea, a lapuwale, a kupono ole i ka la hanau o ka Moi Hemolele a lua ole, ke Poo o na Ekalesia maikai apau.
HE NANE.
Ehiku o'u mau hua.
Ko'u mua, iloko ia o kane, aole iloko o wahine.
Ko'u 1, 2, he hapalua ia o kane.
Ko'u 1, 2, 4, he mea holo.
Ko'u 2, 3, 4, he inoa ia o kekahi luahine haipule. Ma ka Mokuna 2 o Luka.
Ko'u 4, 5, 6, 7, pili i kahi hoano o ka luakini.
Ko'u 5, 6, 7, pili i na muliwai.
Ko'u 1, 6, 7, pili i ka moana.
Ko'u 3, 4, 5, 6, 7, pili i ka ninau.
Ko'u 6, 7, 3, 4, pili i ko uku.
Ko'u 7, 6, pili i kai.
I Kinohi au me ke Akua.
Kakau mua ia au ma ka paia o ka lani.
Kakau aluaia ma ka papa o ka naau.
Kakau akoluia ma ka papa pohaku.
Kakau ehaia ma ka ili.
Kakau alimaia ma ka pepa.
Hai wahaia au ma Hawaii mamua.
Paiia ma ka buke mahope.
Pili paa loa au i na mea he nui wale me ka loli ole.
Pomaikai ke malamaia.
Poino ke malama ole ia.
Owai la wau? E imi ikaika i loaa.
Haina o ka nane ma Dekemaba - Neoukaneza.
Loaa ia D. Waiau, B. Kealoha, ke Kula Sabati o Waimea, Hawaii, ke kula Sabati o Keoneula, Honolulu, a me ka poe noonoo e ae paha. Na oukou e hooiaio.
Pomaikai ka poe pololi, a makewai no ka pono; no ka mea, e hoomaonaia lakou.
Pomaikai ka poe i aloha aku; no ka mea, e alohaia mai lakou.
Pomaikai ka poe i maemae ma ka naau; no ka mea, e ike lakou i ke Akua.
KE ALAULA.
He Nupepa Hoikeike Kii,
Hoopuka mau ia ma Honolulu, i kela malama keia malama e ka PAPA HAWAII, no na Kamalii Hawaii.
25 keneta ka uku no ka makahiki no ka pepa hookahi, 20 keneta akahi ka uku no na pepa ke iwakalua a oi aku paha ma ke ope pokahi, ME KA HOOKAA MUA IA MAI.
L. LAIANA Luna Hoop.