Ke Aloha Aina, Volume I, Number 2, 1 June 1895 — NA HANA HOOLAUWILI. [ARTICLE]

NA HANA HOOLAUWILI.

Mamuli o na hana hoolauwili a na manao apiki o ke kanaka, ua hoao ia ko ka lahui ahailono e umi ia, a e hoololoiahili ia hoi, i mea e hookoia ai na manao nonohua o kekahi poe; aka, aole nae i ae mai na Lani ia mau hana ino a ka lapuwale. He hana lokoino maoli, a he ake e hoohoka mai ia makou, a me ko makou lahui ponoi, keia hana a ke kolohe. No keia popilikia, ua hoonee mai makou he wahi okoa, a aia makou malaila i keia wa. Ua haawi aku makou me ka lahui i ka uku dala maikai loa, i ka mea i hoao e hanaino mai

ia makou, e like me ka olelo: "A i pai mai kekahi ma kou papalina akau, e ho hou aku ma kou papalina hema." Ua ike makou i ka mea pono e hana aku ai, oia hoi, e hoomaikai aku i ko oukou mau enemi. Ua maopopo ae la ia makou ke ano oia auna kanaka, e like me ka hoikeike a ka poe elemakule i hoopoino ia e hoolaha mai nei ma ka Makaainana o keia la! Nui a manuanua wale na mea e lohe ia nei i hoaoia mai ai e hana ia makou, aka, e waiho aku ana makou, na ke Akua no e ao mai ia lakou.