Ke Aloha Aina, Volume I, Number 2, 1 June 1895 — HE MAU LONO WALE NO [ARTICLE]

HE MAU LONO WALE NO

O na lono wale i laweia mai a hoolaha ia ae maloko o na nupepa olelo haole o keia kulanakauhale e pili ana no na hana hooulu kaua ia mai, a no na poe puali powa, ua manao makou i kekahi wa, he wahi ano hana maalea loa no ia, na kekahi o na poe kiu e noho nei, i mea paha e loaa ai ka hana e hoomauia ai ka ohi dala mau ana, i kela a me keia mahina o ka makahiki. Aohe nana o keia poe nawai la na dala e ohiia nei, aia wale no ko lakou, o ka huli ae o ka mahina, ohi iho la ke kaki, hana hou aku ana ua mahina e hoea mai ana. Pela ka oiaio o na mea i hana ia e kekahi poe

a pela no lakou e olelo mau nei. Ia wai ka nana aku i ko oukou aupuni ? (wahi a ua poe nei ke pa wai o ke gini iho) eia nae, welania iho la hoi kahi manao, a i iho la. Ka! Pela iho la ka e hana ia ai makou e keia poe? Ae, pela io no. O ke dala, oia ko lakou nei Akua, aohe o lakou nei manao he Akua ma ka Lani. O ka hoike no na hana o keia ano, he mea no ia e hooia mai ana, aohe oiaio o na olelo a lakou nei i olelo ai; he aloha lakou i na poe Hawaii. No ka mea, ke pane mai nei no, aohe o lakou manao iki no ko kakou aupuni a no ko kakou hopena aku. Ke hoopuka akea nei no lakou ma na nupepa me ka olelo mai, ua haawi mai ke Akua i keia Paeaina no kakou, a ua lilo ia kakou, mamuli o ke komoo mua ana mai o na Misionari e ao, a e hoonaauao i keia lahui kanaka. Ua hoolahaia keia i keia mau la koke iho nei no, he manao no kekahi kahunapule (kailiaina) i hoea mai i anei nei iloko o na la i hala aku nei. Ua olelo mai anei ke Akua pela? A i ole, na kela manao puni ake waiwai paha i kono ae i kela kahunapule e olelo pela? O keia komo nui ana o na poe kahunapule iloko o na hana kalai aupuni, he mea ia e alakai ai ia lakou iloko o na hana kuko hanohano a imi pomaikai, a o ka hopena, he hoole i ko ke Akua ao ana.